ADផ្ទាំងផ្សព្វផ្សាយពាណិជ្ជកម្ម

សោកនាដកម្មមួយទៀតហើយ ពន្លះរថយន្តដឹកកម្មករលាន់ដូចរន្ទះរបួសធ្ងន់៣៥នាក់

4 ឆ្នាំ មុន

ស្វាយរៀង
៣១ ខែ កក្កដា ឆ្នាំ ២០១៩ ម៉ោង ០៩:៥៦

ខេត្តស្វាយរៀង ៖ បើតាមសេចក្តីរាយការណ៍បឋមបានឱ្យដឹងថា សោកនាដកម្មដ៏អាក្រក់មួយទៀតហើយបង្កដោយរថយន្ដដឹកមាន់១គ្រឿងមកពីប្រទេសវៀតណាមបានបោះពួយយ៉ាងលឿនជ្រុលចង្កូតទៅបុករថយន្ដដឹកកម្មករកម្មការិនីយ៉ាងពេញទំហឹងធ្វើឱ្យក្រឡាប់ផ្ងារជើងឡើងលើ បណ្ដាលឲ្យមនុស្សចំនួន៣៥នាក់រងរបួសធ្ងន់សន្លប់រដូករណែកលើដងផ្លូវគួឲ្យសង្វេគ។ ករណីដ៏អាក្រក់នេះបានកើតឡើងកាលពីម៉ោង៦និង៣០នាទីព្រឹក ថ្ងៃទី៣១ ខែកក្កដា ឆ្នាំ២០១៩ នៅលើកំណាត់ផ្លូវជាតិលេខ១…

បើតាមប្រភពពីកន្លែងកើតហេតុបានឲ្យដឹងថា មុនកើតហេតុ គេឃើញរថយន្ដមួយគ្រឿងម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ 3C4662 មានចំណុះ៥តោន ដោយដឹកមាន់រស់ពេញរថយន្តតែម្តងមកពីប្រទេសវៀតណាម បើកបោះពួយយ៉ាងលឿនក្នុងទិសដៅពីកើតទៅលិចបញ្ច្រាសទិសគ្នាជាមួយនឹងរថយន្ដដឹកកម្មករម៉ាកសាំងយ៉ុង ពណ៌លឿង ពាក់ស្លាកលេខកំពង់ស្ពឺ 2A-3239 ពីលិចទៅកើត ទៅកាន់ក្រុងបាវិត។

ប្រភពដដែលបន្តថា លុះពេលរថយន្ដដឹកកម្មករកម្មការិនីបើកមកដល់ចំណុចកើតហេតុ ស្រាប់តែរថយន្ដដឹកមាន់រេចង្កូតទៅបុករថយន្ដដឹកកម្មករយ៉ាងពេញទំហឹងលាន់ដូចរន្ទះក្រឡាប់ផ្ងារជើងទ្រមេឃ បណ្ដាលឲ្យមនុស្សចំនួន៣៥នាក់រងរបួសធ្ងន់-ស្រាលតែម្តង ក្នុងនោះមានបុរសចំនួន៥នាក់។

បើតាមមន្ដ្រីនគរបាលចរាចរណ៍ក្រុងស្វាយរៀងបានឲ្យដឹងថា បើតាមព័ត៌មានបឋមដែលសមត្ថកិច្ចទទួលបាន គឺហេតុការណ៍គ្រោះថ្នាក់ចរាចរណ៍ខាងលើនេះ មានអ្នករងរបួសចំនួន៣៥នាក់។ ប៉ុន្ដែសមត្ថកិច្ចមិនទាន់ដឹងថា របួសធ្ងន់ និងស្រាលប៉ុន្មាននាក់នៅឡើយ ព្រោះភ្លាមៗនោះ សមត្ថកិច្ចកំពុងរវល់បញ្ជូនអ្នករងរបួសទៅសង្គ្រោះនៅក្នុងមន្ទីរពេទ្យខេត្តស្វាយ ។

គួររំលឹកថា ៖ ហួសចិត្ត! ដឹងមូលហេតុក្រឡាប់រថយន្តដឹកកម្មករស្លាប់២នាក់ របួសធ្ងន់ស្រាលជាង៣៨នាក់(មានវីដេអូ) (កែសម្រួលដោយ ៖ បុប្ផា)