រាជធានីភ្នំពេញ៖ សេចក្តីរាយការណ៍បឋមបានឲ្យដឹងថា អ្នកបើកបររថយន្តម្នាក់ត្រូវបានលោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងស្នងការនគរបាលរាជធានីភ្នំពេញបញ្ជាអោយវាយខ្នោះ ខណៈពេលដែលបើករថយន្តដឹកកុងតឺន័រមួយគ្រឿងកិនបាក់បង្គោលដាក់ច្រវ៉ាក់ការពារចិញ្ចើមផ្លូវ និងលំអរនៅមុខស្នងការដ្ឋាន បណ្តាលអោយបាក់ចំនួន២ដើម និងរងការខូចខាតចិញ្ចើមផ្លូវ ដែលគ្រោះថ្នាក់ចរាចរណ៍នេះបានកើតឡើង កាលពីវេលាម៉ោងប្រមាណ៣និង៤០នាទីរសៀល ថ្ងៃទី៣០ ខែកក្កដានេះ នៅមុខស្នងការដ្ឋាននគរបាលរាជធានីភ្នំពេញ ក្នុងសង្កាត់ច្រាំងចំរេះទី២ ខណ្ឌឬស្សីកែវ ។
អ្នកបើកបរដែលត្រូវឃាត់ពុំត្រូវបាននគរបាលអោយស្គាល់អត្តសញ្ញាណឡើយ ជាអ្នកបើកបរ រថយន្តដឹកកុងរតឺន័រមួយគ្រឿងម៉ាកហ៊ីយ៉ាន់ដាយ ពាក់ស្លាកលេខ ភ្នំពេញ៣C.៧៥៤៩ ។ តាមព័ត៌មានអោយដឹងថា នៅមុនពេលកើតហេតុគេឃើញរថយន្តមួយគ្រឿងខាងលើបានធ្វើដំណើរចេញឈៀកនៅមន្ទីរសាធារណៈការនៅខាងស្នងការដ្ឋាននគរបាលរាជធានីភ្នំពេញ ។ ខណៈពេលធ្វើដំណើរមកដល់ផ្លូវលេខ៥៩៨ ក៏បានបត់ស្តាំ តែដោយសារតែរថយន្តវៀចកង់ក្រោយ ផ្នែកខាងស្តាក៏បានឡើងចិញ្ចឹមផ្លូវត្រង់កែងមុខស្នងការដ្ឋានកិនបាក់បង្គោលដាក់ច្រវ៉ាក់ការពារចិញ្ចើមផ្លូវ បណ្តាលអោយបាក់ចំនួន២ដើម និងបែកខូចខាតឥដ្ឋចិញ្ចើមផ្លូវ ។
តាមព័ត៌មានអោយដឹងទៀតថា បន្ទាប់ពីបង្កអោយខាចខាតរថយន្តក៏បានបែកទុយោខ្យល់ទៅមុខលែង ហើយចតជិតច្រកចេញនៅមុខស្នងការត្រូវបាន រួចអ្នកបើកបរហៅជាងមកជួសជុល ។ ភ្លាមៗនគរបាលក៏បានឃាត់រថយន្ត ដើម្បីប្រគល់អោយនគរបាលចរាចរណ៍ ។ ទន្ទឹមនោះ គាប់ជួនលោកឧត្តមសេនីយ៍ស្នងការក៏បានចេញមកឃើញក៏បានឈប់រថយន្ត សួរនាំហើយ បញ្ជាអោយនគរបាលចាប់វាយខ្នោះ អ្នកបើកបរ ហើយយករថយន្តទៅទុក ។ ទោះបីជាយ៉ាងណានគរបាលចរាចរណ៍ពុំបានចាប់វាយខ្នោះនោះទេ គីគ្រាន់តែបណ្តើរឡើងរថយន្ត និងនាំយករថយន្តទៅដោះស្រាយតែប៉ុណ្ណោះ ៕ កែសម្រួលដោយ ៖សុឃាក់
ចែករំលែកព័តមាននេះ