ប្រទេសប៉ាគីស្ថាន ៖ អ្នកទទួលខុសត្រូវម្នាក់នៃក្រុមសង្គ្រោះគូសបញ្ជាក់ថា មនុស្សយ៉ាងតិច១៧នាក់ស្លាប់កាលពីព្រឹកថ្ងៃទី៣០ កក្កដា ដោយសារយន្តហោះយោធាធុនតូចមួយគ្រឿងរបស់កងទ័ពប៉ាគីស្ថាន បានធ្លាក់ចំតំបន់មានមនុស្សរស់នៅមួយ នៃទីក្រុងរ៉ាវ៉ាល់ពីនឌី ជាទីក្រុងមួយស្ថិតនៅក្បែររដ្ឋធានីអុីស្លាម៉ាបាដ។ លោកFAROOQ…
ប្រទេសប៉ាគីស្ថាន ៖ អ្នកទទួលខុសត្រូវម្នាក់នៃក្រុមសង្គ្រោះគូសបញ្ជាក់ថា មនុស្សយ៉ាងតិច១៧នាក់ស្លាប់កាលពីព្រឹកថ្ងៃទី៣០ កក្កដា ដោយសារយន្តហោះយោធាធុនតូចមួយគ្រឿងរបស់កងទ័ពប៉ាគីស្ថាន បានធ្លាក់ចំតំបន់មានមនុស្សរស់នៅមួយ នៃទីក្រុងរ៉ាវ៉ាល់ពីនឌី ជាទីក្រុងមួយស្ថិតនៅក្បែររដ្ឋធានីអុីស្លាម៉ាបាដ។
លោកFAROOQ BUTTអ្នកនាំពាក្យរបស់ក្រុមសង្គ្រោះថ្លែងថា យើងប្រមូលសាកសពមនុស្សបាន១៧នាក់ ក្នុងនោះមានជនស៊ីវិល១២នាក់និងសមាជិកក្រុមយានិក៥នាក់។ ចំណែកមនុស្ស១២នាក់ទៀតរងរបួស។ តុល្យការមុននេះរៀបរាប់ពីមនុស្សស្លាប់១៥នាក់។ គ្រោះថ្នាក់នោះកើតមាននាពេលយប់ក្នុងតំបន់ជាយក្រុងមួយ នៃទីក្រុងរ៉ាវ៉ាល់ពីនឌីដែលមានទីតាំងរបស់កងទ័ពប៉ាគីស្ថាន។ តំបន់នោះត្រូវបានឡោមព័ទ្ធភ្លាមៗដោយកងកម្លាំងប៉ូលិស ចំណែករថយន្តសង្គ្រោះជាច្រើនគ្រឿងបានលើកទៅកាន់កន្លែងយន្តហោះធ្លាក់។
កងទ័ពប៉ាគីស្ថានបញ្ជាក់ក្នុងសេចក្ដីប្រកាសមួយថា នោះជាយន្តហោះមួយគ្រឿងប្រើសម្រាប់បណ្ដុះបណ្តាល ដែលកំពុងបំពេញបេសកកម្មបណ្ដុះបណ្ដាលជាទម្លាប់មួយពេលជួបគ្រោះថ្នាក់ ហើយសមាជិក៥នាក់នៃក្រុមយានិក ក្នុងនោះមានអ្នកបើក២នាក់បានត្រូវស្លាប់។ បណ្ដាអ្នករបួសត្រូវបានបញ្ជូនទៅកាន់មន្ទីរពេទ្យរួចភ្លើងដែលឆាបឆេះត្រូវបានពន្លត់។
យោងតាមអ្នកកាសែតម្នាក់របស់AFPមានវត្តមាននៅកន្លែងយន្តហោះធ្លាក់ថា បណ្ដាបំណែកយន្តហោះដែលនៅក្ដៅហុយ ត្រូវបានឃើញលើដំបូលផ្ទះមួយដែលបាក់។ យន្តហោះនោះធ្លាក់ចំផ្ទះពលរដ្ឋពេលមនុស្សម្នាកំពុងដេកលង់លក់។ មានការផ្ទុះឆេះដ៏ខ្លាំងហើយពួកអ្នកភូមិភ័យប្រញាប់ក្រោកពីដំណេក។ គេប៉ុនប៉ងជួយបណ្ដាអ្នកជាប់ក្នុងគំនរបាក់បែក តែអណ្ដាតភ្លើងបានឆាបឆេះយ៉ាងខ្ពស់ដែលគេមិនអាចធ្វើអ្វីកើត។ ក្នុងចំណោមអ្នកស្លាប់មានសមាជិក៧នាក់នៃគ្រួសារតែមួយ ដែលភាគច្រើនស្លាប់ក្នុងភ្លើង។
ប៉ាគីស្ថានជួបប្រទះគ្រោះថ្នាក់ធ្លាក់យន្តហោះជាញឹកញាប់។ កាលពីឆ្នាំ២០១០មានការធ្លាក់យន្តហោះដឹកអ្នកដំណើរធុនAIRBUS 321មួយគ្រឿង របស់ក្រុមហ៊ុនអាកាសចរណ៍AIRBLUE ដែលហោះហើររវាងក្រុងការ៉ាជីនិងក្រុងអុីស្លាម៉ាបាដ ក្នុងតំបន់កូនភ្នំមួយបណ្ដាលឲ្យមនុស្សស្លាប់១៥២នាក់៕ (កែសម្រួលដោយ ៖ បុប្ផា)
ចែករំលែកព័តមាននេះ