រាជធានីភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា មិនចាំបាច់អ្វីសោះលើកិច្ចព្រមព្រៀងសម្ងាត់ ។ ទោះបីសម្ដេចមិនបានលើកឱ្យច្បាស់ជាងនេះ ក៏គេបានដឹងរួចហើយ ពីការផ្សាយព័ត៌មានរបស់កាសែតអាមេរិកដែលបានចោទពីការព្រមព្រៀងសម្ងាត់រវាងកម្ពុជា-ចិន ក្នុងការបង្កើតមូលដ្ឋានទ័ពចិននៅរាម និងបានទទួលការបដិសេធ ។
សម្ដេចតេជោបន្តដោយចាក់បណ្ដោយថា ឥឡូវខ្ញុំកំពុងតែដឹកតាមនាវាមក ឆ្នាំនេះខ្ញុំបានប្រគល់ថវិកាចំនួន៤០លានដុល្លារ ដើម្បីទិញអាវុធពីប្រទេសចិន បន្ថែមលើទឹកប្រាក់២០០លានដុល្លារ ដែលបានផ្ដល់ កាល ពីមុន ហើយឲ្យ៩០លានដុល្លារពេលលើកក្រោយដែលខ្ញុំបានទៅប្រទេសចិន ។
សម្តេចតេជោនាយករដ្ឋមន្ត្រី បានមានប្រសាសន៍បែបនេះ នាព្រឹកថ្ងៃទី២៩ ខែកក្កដា ឆ្នាំ២០១៩ ក្នុងឱកាសអញ្ជើញជាអធិបតីក្នុងពិធីបំពាក់កៅអីបេតុងភ្ជាប់ទៅនឹងពហុកីឡដ្ឋានមរតកតេជោ ស្ថិតនៅក្នុងសង្កាត់ព្រែកតាសេក ខណ្ឌជ្រោយចង្វា ដែលជាសមិទ្ធផលជាប្រវត្តិសាស្ត្រដែលប្រទេសចិនជួយកម្ពុជា ។ សម្ដេចតេជោបានសង្កត់ធ្ងន់ថា ខ្ញុំចង់ពង្រឹងសមត្ថភាពកងទ័ពរបស់ខ្ញុំ ។ នៅលើលោកនេះមានប្រទេសណាដែលអត់កាំភ្លើង តែកាំភ្លើងរបស់កម្ពុជាវារាងចាស់បន្តិចហើយ ដូច្នេះខ្ញុំឲ្យទិញរាប់ម៉ឺនដើមមកទៀតយកមកស្តុកទុក ដកអាចាស់បញ្ចេញអាថ្មី យកអាចាស់មកជួសជុល ។មិនដែលមានប្រទេសមួយអត់មានកាំភ្លើងទេ ។
សម្ដេចតេជោមានប្រសាសន៍ថា កាលពីឆ្នាំមុន សម្ដេចពិជ័យសេនា ទៀ បាញ់ បានសុំថវិកា២៥លានដុល្លារទេ តែលើកនេះខ្ញុំម្ចាស់ការឲ្យរៀបចំគម្រោងឡើងវិញដើម្បីទៅទិញអាវុធពីប្រទេសចិន ។ ខ្ញុំត្រូវគិតទៅដល់គ្រប់ផ្នែកទាំងអស់ ព្រោះអាវុធកាលទិញពីលើកមុននៅក្នុងឃ្លាំង ប៉ុន្មានខ្ញុំមាន ព្រោះនៅក្នុងដៃរបស់ខ្ញុំ គ្រាប់នេះមានប៉ុន្មាន គ្រាប់នោះមានប៉ុន្មានខ្ញុំមាន ។ ខ្ញុំឃើញបងប្អូននៅពេលគាត់ហ្វឹកហាត់ ពេលខ្លះសំណើសុំគ្រាប់ដើម្បីហ្វឹកហាត់បាញ់គ្រាប់ពិត ចាប់ពីពេលនេះតទៅ កងទ័ពម្នាក់ត្រូវហាត់បាញ់គ្រាប់ពិតឲ្យបានច្រើនបន្តិច កុំឲ្យតម្រង់ចោលអត់មានគ្រាប់បាញ់ ។
សម្ដេចតេជោមានប្រសាសន៍ទៀតថា គេហាត់បាញ់គ្រាប់ពិតគ្រប់គ្នា កូរ៉េខាងជើងគេបាញ់រហូតដល់មីស៊ីល ។ សម្ដេចតេជោបានរិះគន់យ៉ាងខ្លាំងថា ចុះប្រទេសគធ្វើបាន ដល់កម្ពុជាធ្វើមិនបាន ? ខ្ញុំអត់មានថវិកាដូរប្រព័ន្ធអាវុធទេ មានអ្នកខ្លះមកប្រាប់ឲ្យយកប្រព័ន្ធនេះយកប្រព័ន្ធនោះទៅ ។ ប៉ុន្តែសម្ដេចបដិសេធថាអត់ទេ ចាយលុយច្រើនណាស់ ហើយម្យ៉ាងទៀតប្រព័ន្ធអាវុធទំនើបនោះជួនកាលគេធ្វើកិកកុកមិនលក់ឲ្យ ។ ប៉ុន្តែប្រព័ន្ធអាវុធដែលយើងប្រើរាល់ថ្ងៃទៅទិញនៅប្រទេសណាក៏មានដែរ សម្បូរបែបរាប់ទាំងប្រទេសដែលជាអតីតសហភាពសូវៀតទិញបានតាមចិត្ត ។ ខ្ញុំត្រូវគិតគូរដែរ ពីព្រោះខ្ញុំជាអ្នកដឹកនាំប្រទេស ព្រះមហាក្សត្រព្រះអង្គជាប្រ ធានឧត្តមក្រុមប្រឹក្សាការពារជាតិ ហើយនាយករដ្ឋមន្ត្រីក៏ជាអនុប្រធានក្រុមប្រឹក្សាការពារជាតិ ៕
ចែករំលែកព័តមាននេះ