ខេត្តបន្ទាយមានជ័យ ៖ សេចក្តីរាយការណ៍ឱ្យដឹងថា គ្រាប់យុទ្ធភណ្ឌប្រភេទគ្រាប់ទម្លាក់ពីលើយន្តហោះចំនួន៤គ្រាប់ប្រទះឃើញនៅតំបន់បឹងទន្លេសាបក្នុងខេត្តបន្ទាយមានជ័យនោះ មន្ត្រីជំនាញស៊ីម៉ាក់ខេត្ត
មិនទាន់យកបាននៅឡើយនោះទេ ខណៈក៏នៅរង់ចាំមន្ត្រីជំនាញពីរាជធានីភ្នំពេញវិញ ។ គ្រាប់ទាំងនេះជា ប្រភេទគ្រាប់ទម្លាក់ពីលើយន្តហោះ ដែលបន្សល់ទុកពីសម័យសង្គ្រាម ក្នុងចំណោមនោះមាន១គ្រាប់បុកជាប់កប់ក្នុងដី និង៣គ្រាប់ទៀតនៅរាយប៉ាយលើដី ក្នុងតំបន់បឹងទន្លេសាបនៃខេត្តបន្ទាយមានជ័យ ។
សូមបញ្ជាក់ថា ប្រជាពលរដ្ឋប្រទះឃើញគ្រាប់ទាំងនេះ ក៏បានរាយការណ៍មកសមត្ថកិច្ចនគរបាលស្រុកពញរះនេត្រព្រះ និងកងរាជអាវុធហត្ថស្រុកព្រះនេត្រព្រះ រួចហើយសមត្ថកិច្ចយើងក៏បានបន្តរាយការណ៍មន្ត្រីជំនាញស៊ីម៉ាក់ និងសមត្ថកិច្ច១ក្រុមនៅខេត្តបន្ទាយមានជ័យ បានចុះទៅត្រួតពិនិត្យ ប៉ុន្តែមិនទាន់មានលទ្ធ ភាពអាចយកគ្រាប់ទាំងនោះ ចេញបាននៅឡើយនោះទេ ។
ការចុះទៅត្រួតពិនិត្យបានធ្វើឡើង កាលពីថ្ងៃទី២៩ កក្កដា ស្ថិតនៅចំណុចក្រចាប់ ភូមិក្របៅ ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ។ បើតាមប្រភពព័ត៌មានពីមន្ត្រីជំនាញស៊ីម៉ាក់ប្រចាំខេត្តបន្ទាយមានជ័យ បានប្រាប់ឱ្យដឹងថា គ្រាប់ទាំងនោះមិនទាន់ដឹងផលិតនៅប្រទេសណាមួយនៅឡើយនោះទេ និងក៏មិនដឹងជាប្រភេទគ្រាប់ម៉ាកអ្វីនោះផងដែរ។ ប៉ុន្តែជាប្រភេទគ្រាប់ទម្លាក់ពីលើយន្តហោះ(ប៊ុម ប៊ី) ដែលគេប្រើប្រាស់ក្នុងតំណាក់កាលប្រទេសកម្ពុជាធ្លាក់ក្នុងសង្គ្រាមពីអតីតកាល។ក្នុងចំណោមទាំង៤គ្រាប់គឺមាន១គ្រាប់បុកកប់ក្នុងដីមានជម្រៅជាង១ម៉ែត្រ។
មន្ត្រីជំនាញស៊ីម៉ាក់ដដែលឱ្យដឹងទៀតថា គ្រាប់ទម្លាក់ពីលើយន្តហោះទាំង៤គ្រាប់នោះ មន្ត្រីជំនាញពិនិត្យលើសដែនសមត្ថភាពមន្ត្រីជំនាញនៅមូលដ្ឋាននិងបានរាយការណ៍ទៅថ្នាក់លើដើម្បីបញ្ជូនក្រុមមន្ត្រីជំនាញអន្តរាគមន៍នៅភ្នំពេញ ចុះមកយកគ្រាប់ទាំងនោះទៅរក្សាទុក ឬក៏បំផ្លាញចោលនៅកន្លែងនោះតែម្តង ដើម្បីបញ្ចៀសគ្រោះថ្នាក់អាយុជីវិតប្រជាពលរដ្ឋ។
គួររំលឹកទៀតថា ខេត្តបន្ទាយមានជ័យកាលពីកន្លងទៅថ្មីៗនេះ គ្រាប់មីននិងប្រភេទគ្រាប់ប្រឆាំងមនុស្សរួមនិងគ្រាប់ប្រឆាំងយន្តហោះ(DCA) សរុប៤២៤គ្រាប់ កប់ក្នុងដីសេសសល់ពីសម័យសង្គ្រាម ត្រូវបានប្រជាពលរដ្ឋនៅស្រុកស្វាយចេកនិងស្រុកភ្នំស្រុកប្រជាពលរដ្ឋប្រទះឃើញ ហើយត្រូវបានមន្ត្រីជំនាញដោះមីនយកទៅរក្សាទុក ដើម្បីបញ្ចៀសគ្រោះថ្នាក់អាយុជីវិតប្រជាពលរដ្ឋ ។ (សម្រួលដោយ៖ ស្រីណា)
ចែករំលែកព័តមាននេះ