រាជធានីភ្នំពេញ ៖ សេចក្តីរាយការណ៍បន្តឱ្យដឹងថា ករណីឆ្មក់ចូលបង្ក្រាបទីតាំងខារ៉ាអូខេស្ថិតក្នុងភោជនីដ្ឋាន «រាត្រីភ្នំពេញ» ជាប្រតិបត្តិការរួមរបស់កម្លាំងសមត្ថកិច្ចនគរបាលការិយាល័ទី១១នៃមន្ទីរប្រឆាំងគ្រឿងញៀនរបស់អគ្គស្នងការនគរបាលរជាតិ ដឹកដោយលោកឧត្ដមសេនីទោ វណ្ណ កុសល ក្រោមការក្រោមការសម្របសម្រួលពីសំណាក់លោក ហ៊ឹង ប៊ុនថន ព្រះរាជ្ញារងអមសាលា ដំបូងរាជធានីភ្នំពេញ និងមានសហការជាមួយកម្លាំងមូលដ្ឋាននគរបាលខណ្ឌ៧មករា កាលពីវេលាម៉ោង១០ និង៣០នាទីយប់ថ្ងៃទី២៩ កក្កដាស្ថិតតាមបណ្តោយផ្លូវលេខ២៤២ កែង ផ្លូវលេខ១០៥ សង្កាត់បឹងព្រលឹត ខណ្ឌ៧មករា រាជធានីភ្នំពេញ ។ សូមបញ្ជាក់ថា សមត្ថកិច្ចប្រមូលនិងឃាត់មនុស្សសរុបមានចំនួន៤៩នាក់ ។
សេចក្តីរាយការណ៍បន្តថា លទ្ធផលគឺឃាត់ខ្លួនមនុស្សប្រុស-ស្រីជាង៤០នាក់ ពាក់ព័ន្ធករណីប្រើប្រាស់គ្រឿងញៀនផងនោះ ។ ទាក់ទិនកិច្ចបង្ក្រាបនេះ លោកវរសេនីយ៍ត្រី ប៉ាត សំណាត នាយនគរបាលប៉ុស្តិ៍ រដ្ឋបាលសង្កាត់បឹងព្រលិត ខណ្ឌ៧មករា បានឲ្យដឹងថា ជាការពិតណាស់ ភោជនីយដ្ឋាន«រាត្រីភ្នំពេញ» មានបន្ទប់ខារ៉ាអូខេ៣បន្ទប់ ដែលកន្លងមកមិនសូវមានភ្ញៀវចេញ-ចូលច្រៀងកម្សាន្តនោះទេ ទើបតែថ្ងៃចុះបង្ក្រាបបានដឹងថា ភោជនីដ្ឋានរាត្រីភ្នំពេញមានករណីប្រើប្រាស់គ្រឿងញៀននៅក្នុងនោះ ។
ដោយឡែក លោកឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀនបានឲ្យដឹងថា កិច្ចប្រត្តិបត្តិការនោះ កម្លាំងសមត្ថកិច្ចការិយាល័យជំនាញរបស់លោក បានធ្វើការឃាត់ខ្លួនមនុស្សប្រុស-ស្រីសរុបចំនួន៤៩នាក់ និងថ្នាំញៀនមួយចំនួនទៀត ។ លោកបន្តថា ក្នុងមនុស្សទាំង៤៩នាក់ ពេលនេះ កំពុងធ្វើការសាកសួរ ដើម្បីញែកឱ្យដាច់ថា «តើជនណាមានពាក់ព័ន្ធគ្រឿងញៀន» ហើយជនណាមិនពាក់ព័ន្ធគ្រឿងញៀន ព្រោះក្នុងរង្វង់ប្រតិបត្តការរបស់សមត្ថកិច្ចត្រូវប្រមូលចាប់ទាំងអស់ ។
ត្រូវធ្វើការរកឱ្យឃើញប៉ុន្មាននាក់ចែកចាយ ប៉ុន្មាននាក់ប្រើប្រាស់ ប៉ុន្មាននាក់រក្សាទុក និងប៉ុន្មាននាក់មានផ្ទុកនូវសារធាតុញៀនក្នុងខ្លួន ដើម្បីដាក់បន្ទុកកសាងសំណុំរឿងបញ្ជូនទៅតុលាការ ប៉ុន្តែចំពោះអ្នកមិនពាក់ព័ន្ធត្រូវបានធ្វើរបាយការណ៍ជូនថ្នាក់លើ សុំការអនុញ្ញាតឲ្យគេវិលត្រឡប់ទៅផ្ទះវិញ ។ (សម្រួលដោយ៖ ស្រីណា)
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ