រាជធានីភ្នំពេញ ៖ លោកអ៊ាង សុផល្លែត ជំនួយការសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ប្រាប់ឱ្យដឹងថា នៅក្នុងជំនួបពិភាក្សាការងារជាមួយសម្តេចតេជោនាយករដ្ឋមន្ត្រី ហ៊ុន សែន នាព្រឹកថ្ងៃទី៨ មីនា នៅវិមានសន្តិភាពនៃទីស្តី ការនាយករដ្ឋមន្ត្រី លោក Oh Myung អតីតឧបនាយករដ្ឋមន្ត្រី និងជាប្រធានក្រុមហ៊ុន Woongjin Energy ជាប្រធានវិទ្យាសាស្ត្របច្ចេកវិទ្យាជាន់ខ្ពស់នៃសាធារណរដ្ឋកូរ៉េបានជម្រាបសម្តេចតេជោនាយករដ្ឋមន្ត្រីថា លោកបានជួបប្រជុំជាមួយលោករដ្ឋមន្ត្រីក្រសួងទូរគមនាគមន៍ និងបានជួបលោកអគ្គនាយក NIDA ដោយបានកត់សម្គាល់ឃើញថា កម្ពុជាមានធនធានមនុស្សក្មេងៗយ៉ាងច្រើននៅវិស័យប្រព័ន្ធបច្ចេកវិទ្យាតែម្តង ។
លោកបានជម្រាបសម្តេចតេជោនាយករដ្ឋមន្ត្រីថា ប្រទេសកូរ៉េកន្លងមកយកចិត្តទុកដាក់ទៅលើប្រព័ន្ធបច្ចេកវិទ្យា ។ ប្រព័ន្ធនេះហើយបានធ្វើឱ្យប្រទេសកូរ៉េទាញយកចំណេញប្រមាណជា៤០ពាន់លានដុល្លារក្នុងមួយឆ្នាំ ហើយបានធ្វើឱ្យប្រទេសកូរ៉េឈានមុខ និងជាកត្តាសំខាន់សម្រាប់សេដ្ឋកិច្ចរបស់ប្រទេសកូរ៉េ ។ ក្នុងន័យនេះ លោកបានផ្តោតអារម្មណ៍ជម្រាបសម្តេច ដើម្បីធ្វើយ៉ាងណាជួយដល់កម្ពុជាលើវិស័យនេះ ជាពិសេសរៀបចំគម្រោងប្លង់មេលើប្រព័ន្ធបច្ចេកវិទ្យានេះតែម្តង ។
លោក Oh បានជម្រាបសម្តេចតេជោនាយករដ្ឋមន្ត្រីអំពីការស្ថាបនាផ្លូវជាតិលេខ៣ដែលកំពុងមានសកម្មភាពសព្វថ្ងៃនេះ ដែលពីមុន មានគម្រោងបញ្ចប់នៅខែមិថុនា ប៉ុន្តែគម្រោងសាងសង់ផ្លូវនេះលោកបានធ្វើទស្សនកិច្ចនៅថ្ងៃទី៩ មីនា ហើយនឹងត្រូវបញ្ចប់មុនបុណ្យចូលឆ្នាំខ្មែរ ។ ផ្លូវនេះសាងសង់ដោយក្រុមហ៊ុន Woongjin ។ ជាការឆ្លើយតបសម្តេចតេជោនាយករដ្ឋមន្ត្រី បានថ្លែងអំណរគុណចំពោះលោក Oh Myung ក៏ដូចជាក្រុមហ៊ុន Woongjin ដែលបានជួយដល់កម្ពុជាក្នុងការស្ថាបនាផ្លូវជាតិលេខ៣នេះ ។ ផ្លូវនេះមានសារសំខាន់ណាស់ក្នុងការដឹកជញ្ជូន និងបែងចែកអំបិលក៏ដូចជាពាណិជ្ជកម្មផ្សេងៗទៀតដែរ ។
ពាក់ព័ន្ធទៅនឹងបញ្ហាបច្ចេកវិទ្យាសម្តេចតេជោនាយករដ្ឋមន្ត្រីបានស្វាគមន៍ និងសូមឱ្យភាគីកូរ៉េធ្វើយ៉ាងណាជួយដល់កម្ពុជាធ្វើសមាហរណកម្មប្រព័ន្ធរបស់រដ្ឋជាមួយនឹងប្រព័ន្ធឯកជន ។ បច្ចេកវិទ្យារបស់ឯកជន និងប្រព័ន្ធបច្ចេកវិទ្យារបស់រដ្ឋនៅពេលនេះមិនទាន់បានបូកបញ្ចូលគ្នានៅឡើយទេ ហើយក៏ពុំទាន់បានប្រើបូករួម ដើម្បីប្រើប្រាស់ឱ្យអស់ពីសក្តានុពលដែរ ដូច្នេះសូមឱ្យកូរ៉េធ្វើយ៉ាងណាសហការជាមួយនឹងប្រព័ន្ធបច្ចេកវិទ្យា NIDA ដើម្បីសិក្សាប្លង់មេបូកបញ្ចូលគម្រោងទាំងនេះ ដើម្បីទាញយកប្រយោជន៍សក្តានុពលទាំងអស់ឱ្យមានប្រសិទ្ធភាព ខ្ពស់បំផុតអំពីប្រព័ន្ធនោះ ។
ដោយឡែកនៅព្រឹកថ្ងៃដដែលនោះផងដែរ នៅវិមានសន្តិភាពនៃទីស្តីការនាយករដ្ឋមន្ត្រីលោក Imagaw Yukio សមាជិកក្រុមប្រឹក្សាភិបាលទទួលបន្ទុកការបរទេស អង្គការ JSP ជប៉ុនបានចូលជួបសម្តែងការគួរសម និងពិភាក្សាការងារជាមួយសម្តេចតេជោនាយករដ្ឋមន្ត្រី។ លោក Imagawa បានជម្រាបសម្តេចតេជោ នាយករដ្ឋមន្ត្រីថា គោលដៅខ្ពស់បំផុតនៅកម្ពុជា របស់អង្គការលោក គឺសកម្មភាពសាងសង់អគារសិក្សាលើកស្ទួយវិស័យសិល្បៈ វិស័យសុខភាព អនាម័យ និងតន្ត្រីជាដើម ។
អង្គការរបស់លោកបានធ្វើការផ្សព្វផ្សាយពាក់ព័ន្ធទៅលើបញ្ហាអនាម័យ និងបានធ្វើការចែកសៀវភៅនៅកម្ពុជាផងដែរ ។ លើសពីនោះ អ្វីដែលជាកត្តាសំខាន់របស់អង្គការនោះគឺធ្វើយ៉ាងណាជួយដល់ប្រទេសកម្ពុជាផង ជួយដល់ប្រទេសជប៉ុនផង និងតំបន់ក៏ដូចជាពិភពលោកទាំងមូល ។ អ្វីដែលជាសកម្មភាពរបស់អង្គការនេះគឺសកម្មភាពជួយជម្រុញឱ្យមានសុខសន្តិ ភាពដល់កម្ពុជា ដល់ជប៉ុនដល់តំបន់ក៏ដូចជាពិភពលោកទាំងមូល ។
លោកអ៊ាង សុផល្លែត បានរំលឹកពីប្រវត្តិរបស់លោក Imagawa ថា លោកគឺជាអតីតអ្នកការទូតប្រចាំនៅកម្ពុជាកាលពីឆ្នាំ១៩៦២ លោកគឺជាលេខាទី៣ ស្ថានទូតជប៉ុនប្រចាំនៅកម្ពុជា ។ លោកបានមានប្រសាសន៍ជម្រាបសម្តេចតេជោនាយករដ្ឋមន្ត្រី ថា ឥរិយាបថរបស់ថៃទៅលើបញ្ហាប្រាសាទព្រះវិហារនោះ គឺកាលពីឆ្នាំ១៩៦២ រូបលោកផ្ទាល់បានដឹងថា នៅពេលនោះតុលាការយុត្តិធម៌អន្តរជាតិទីក្រុងឡាអេបានចេញសាលក្រម កាត់ក្តីឱ្យកម្ពុជាឈ្នះ ។ ថៃនៅពេលនោះ ក៏មិនបានធ្វើការជំទាស់ ហើយក៏បានទទួលស្គាល់នូវសាលក្រមនេះដែរ ។ ប៉ុន្តែ៤០ឆ្នាំជាងកន្លងមកនេះ អ្វីដែលថៃបានធ្វើមិនអាចទទួលយកបានទេ នោះសោតគឺថៃខុស១០០% ព្រោះថា នៅពេលតុលាការអន្តរជាតិទីក្រុងឡាអេ កាត់ក្តីនៅពេលនោះ ក៏មានចៅក្រមជាជនជាតិជប៉ុនម្នាក់ផងដែរ ដែលចូលរួមគឺឈ្មោះណាកា កូតូរ៉ូ ដែលបានកាត់ក្តីយ៉ាងក្បោះក្បាយថា ប្រាសាទព្រះវិហារ និងតំបន់ជុំវិញប្រាសាទនេះគឺជាទឹកដីរបស់កម្ពុជា ។
ជាការឆ្លើយតបសម្តេចតេជោនាយករដ្ឋមន្ត្រីហ៊ុន សែន បានថ្លែងអំណរគុណចំពោះលោក Imagawa ដែលលោកបានស្វែងយល់យ៉ាងច្បាស់អំពីស្ថានភាពនៅកម្ពុជា ជាពិសេសការបាក់បែកលើអគារសិក្សាកម្ពុជា ។ កន្លងមកអ្វី ដែលអង្គការរបស់លោកកំពុងតែធ្វើនេះគឺជាសកម្មភាពចំគោលដៅ ហើយសាងសង់អគារសិក្សាប្រមាណចំនួន៦៦០អគារនៅកម្ពុជា គឺជាចំនួនធំ ណាស់ រួមជាមួយសកម្មភាពយ៉ាងសំខាន់របស់អង្គការ JSP នេះ គឺពិតជាបានជួយដល់សិស្សានុសិស្សកម្ពុជាតែម្តង ។
ទន្ទឹមនេះសម្តេចបន្តអំពាវនាវឱ្យផែនការស្រុកសន្ទុករបស់រាជរដ្ឋាភិបាលកម្ពុជាសម្រេចជាស្ថាពរ នោះសោតគឺឱ្យមានអនុវិទ្យាល័យគ្រប់ឃុំតែម្តង ។ សម្តេចបានណែនាំឱ្យមានការពិភាក្សាជាមួយក្រសួងអប់រំ យុវជន និងកីឡា ដើម្បីធ្វើយ៉ាងណាស្វែងយល់អំពីការខ្វះខាតអនុវិទ្យាល័យមានមួយក្នុងឃុំ ដើម្បីផ្តល់ព័ត៌មានជូនដល់អង្គការ ដើម្បីឱ្យអង្គការជួយបំពេញ បន្ថែមនូវកង្វះខាតនេះ ។
ពាក់ព័ន្ធទៅនឹងរឿងប្រាសាទព្រះវិហារសម្តេចតេជោនាយករដ្ឋមន្ត្រីបានថ្លែងអំណរគុណជូនចំពោះលោក Imagawa ដែលរូបលោកផ្ទាល់ជាអ្នកការទូតម្នាក់ ហើយបានយល់យ៉ាងច្បាស់ អំពីបញ្ហាប្រាសាទព្រះវិហារនេះ ។ សម្តេចមានប្រសាសន៍បញ្ជាក់ថា កម្ពុជាកំពុងតែស្វះស្វែងដោះស្រាយបញ្ហានេះ ដោយសន្តិវិធី ប៉ុន្តែទោះជាយ៉ាងណា ក៏ដោយការចរចាត្រូវមានភាគីទី៣ចូលរួមក្នុងបញ្ហានេះ ៕
ចែករំលែកព័តមាននេះ