រាជធានីភ្នំពេញ ៖ រដ្ឋមន្ត្រីសំខាន់ពីររូបរបស់កម្ពុជា បានស្នើភាគីចិនតាមរយៈទីប្រឹក្សាសេដ្ឋកិច្ចនិងពាណិជ្ជកម្មស្ថានទូតចិនដែលចប់អាណត្តិនិងត្រលប់ទៅប្រទេសចិនក្នុងការជួយ សម្របសម្រួលនិងគៀងគរវិនិយោគិនបន្ថែមទៀត ដើម្បីមកបណ្ដាក់ទុនវិនិយោគនៅកម្ពុជា ជាពិសេសទៅលើវិស័យដែលអាទិភាពសម្រាប់ការវិនិយោគរបស់អ្នកវិនិយោគរបស់ខ្លួន ។
«កម្ពុជាចង់បានការវិនិយោគបន្ថែមពីប្រទេសចិន លើឧស្សាហកម្មកែច្នៃ និងវេចខ្ចប់ផលិតផលកសិកម្ម ដើម្បីធ្វើពិពិធកម្មការនាំចេញទៅកាន់ទីផ្សារអន្តរជាតិ ដោយសារយើងមានកសិផលមិនទាន់កែច្នៃជាច្រើនដូចជា ផ្លែស្វាយខេត្តកំពង់ស្ពឺ, ផ្លែមៀនខេត្តប៉ៃលិន និងឈើហូបផ្លែជាច្រើនទៀត» នេះបើតាមការបញ្ជាក់របស់ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា ទៅកាន់មន្ត្រីទទួលបន្ទុកសេដ្ឋកិច្ច និងពាណិជ្ជកម្ម អមស្ថានទូតចិនប្រចាំនៅកម្ពុជានៅក្នុងជំនួបមួយកាលពីសប្ដាហ៍មុន ។ លោករដ្ឋមន្ត្រីក្រសួងពាណិជ្ជកម្មកម្ពុជា បានស្នើភាគីចិន តាមរយៈទីប្រឹក្សាសេដ្ឋកិច្ចនិងពាណិជ្ជកម្មចិនរូបនេះ អោយវិនិយោគិនបន្ថែមការវិនិយោគរបស់ខ្លួន នៅក្នុងប្រទេសកម្ពុជា លើវិស័យកសិកម្ម ខណៈវិសាលភាពនៃវិស័យនេះ នៅមានសក្ដានុពលធំធេង ។
លោកបានប្រសាសន៍ថា កម្ពុជាចង់បានការវិនិយោគពីចិនបន្ថែមទៀត លើឧស្សាហកម្មកែច្នៃ និងវេចខ្ចប់ផលិតផលកសិកម្ម ដើម្បីធ្វើពិពិធកម្មការនាំចេញទៅកាន់ទីផ្សារអន្តរជាតិ ពីព្រោះកម្ពុជា មានផលិតផលមិនទាន់កែច្នៃជាច្រើន ដូចជាផ្លែស្វាយកំពង់ស្ពឺ ផ្លែមៀនប៉ៃលិន ព្រមទាំងផ្លែឈើហូបផ្លែជាច្រើនទៀត ។ លោកបានបន្តថា កម្ពុជាចង់ឱ្យភាគីចិន ជួយសម្របសម្រួលការនាំចេញកសិផលខ្មែរ និងជួយកៀងគរក្រុមហ៊ុនចិន ដែលមានឯកទេសត្រឹមត្រូវ មកវិនិយោគនៅក្នុងប្រទេសកម្ពុជាថែមទៀត ដើម្បីពង្រឹងទំនាក់ទំនងពាណិជ្ជកម្ម និងវិនិយោគទ្វេភាគី ។ ក្រៅពីនេះ ភាគីកម្ពុជារង់ចាំស្វាគមន៍និង សន្យាបន្តសហការជាមួយភាគីចិនក្នុងវិស័យពាណិជ្ជកម្មអេឡិចត្រូនិក (E-Commerce) ដើម្បីជំរុញការលក់ និងនាំចេញផលិតផលខ្មែរ ទៅកាន់ទីផ្សារក្នុងតំបន់ និងពិភពលោក ។ ដោយឡែកលោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ ក៏បានស្នើឲ្យភាគីចិន សហការជាមួយក្រសួង និងគ្រប់ភាគីពាក់ព័ន្ធពិនិត្យ និងជំរុញចំពោះការនាំចេញផលិតផលពោតពីកម្ពុជាបន្ថែម ខណៈកម្ពុជាផលិតបាន នូវផលិតផលជាច្រើនក្នុងមួយឆ្នាំៗ ។ លោករដ្ឋមន្ត្រីបានបន្ថែមថា « តាមរយ:ចំណងសាមគ្គីភាព មិត្តភាព និងកិច្ចសហប្រតិបត្តិការគ្រប់ជ្រុងជ្រោយរវាងប្រជាជន និងរាជរដ្ឋាភិបាលនៃប្រទេសទាំងពីរ កម្ពុជានឹងទទួលបានអត្ថប្រយោជន៍ជាច្រើនថែមទៀតដើម្បីកសាង និងអភិវឌ្ឍប្រទេស » ។
ជាការឆ្លើយតប លោកលី អាន ទីប្រឹក្សាសេដ្ឋកិច្ចនិងពាណិជ្ជកម្មនៃស្ថានទូតសាធារណៈរដ្ឋប្រជាមានិតចិន ប្រចាំព្រះរាជាណាចក្រកម្ពុជា ដែលនឹងត្រូវចប់អាណត្តិរបស់ខ្លួនត្រលប់ទៅប្រទេសចិនវិញ បានស្វាគមន៍នូវសំណើររបស់ភាគីកម្ពុជា ក្នុងការគៀងគរ រកវិនិយោគិនចិនបន្ថែមទៀត លើវិស័យកសិកម្ម ។ លោកសង្ឃឹមថាមន្ត្រី ទីប្រឹក្សាថ្មី ដែលមកកម្ពុជាជំនួសលោកនឹងអាចបន្តនូវកិច្ចសហប្រតិបត្តិការល្អរវាងប្រទេសទាំងពីរ និងអាចជំរុញអោយទំហំពាណិជ្ជកម្មនៃប្រទេសទាំងពីរកាន់តែមានភាពរីកចម្រើនបន្ថែមទៀត ។ ទំនាក់ទំនងរវាងចិន និងកម្ពុជា ត្រូវបានគេមើលឃើញថាមានភាពស្អិតរមួតកាន់តែខ្លាំង ទាំងការទូត ពាណិជ្ជកម្មនិងការវិនិយោគ ជាក់ស្ដែងទាំងភ្ញៀវទេសចរ និងវិនិយោគិននៅកម្ពុជា ក៏ចិនបានឈរលំដាប់ថ្នាក់កំពូលដែរ ។
សូមរំលឹកថា កាលពីខែមុននេះ វិនិយោគិនចិន បានបណ្ដាក់ទុន៣០០លានដុល្លារក្នុងវិស័យកសិកម្មនេះដែរ ដោយបានសង់ឡសម្ងួតនិងឃ្លាំងស្តុកស្រូវនៅខេត្តចំនួន១១ទូទាំងប្រទេសកម្ពុជា ខណៈកម្ពុជាក៏កំពុងត្រូវការឡសម្ងួតនិងឃ្លាំងស្តុកស្រូវនេះ សម្រាប់ជួយរក្សាស្រូវរបស់ប្រជាកសិករ ក្នុងអំឡុងពេលប្រមូលផល ។ ការបណ្ដាក់ទុនវិនិយោគនេះ នឹងអាចធានាតម្លៃស្រូវរបស់កសិករកម្ពុជាអោយនៅថេរ និងអាចឱ្យកម្ពុជាមានសមត្ថភាពក្នុងការនាំចេញអង្ករទៅកាន់ទីផ្សារអន្តរជាតិកាន់តែច្រើនផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ