ខេត្តព្រៃវែង ៖ កុមារីម្នាក់ត្រូវឪពុកចុងតណ្ហាក្រាស់ ចាប់រំលោភជាច្រើនដង តាំងពីអាយុ១៣ឆ្នាំ ហើយរហូតដល់អាយុ១៤ឆ្នាំទើបធ្លាយរឿងដឹងដល់ឪពុកធំ ប្តឹងទៅសមត្ថកិច្ចឲ្យចាប់ខ្លួនជនល្មោភកាមរូបនេះ។ជនអប្រិយម្នាក់នេះ ឈ្មោះ ញ៉ែម នួន អាយុ៣២ឆ្នាំ ត្រូវបានចាប់ខ្លួន កាលពីវេលាម៉ោងប្រមាណ៧និង៥០នាទីយប់ថ្ងៃទី២៦ ខែកក្កដា នៅនឹងផ្ទះស្ថិតក្នុងឃុំប្រាសាទ ស្រុកកំពង់ត្របែក បន្ទាប់ពីទទួលបានពាក្យ បណ្តឹងពីសាច់ញាតិកុមារីរងគ្រោះ ។
ប្រភពព័ត៌មានពីសមត្ថកិច្ចឲ្យដឹងថា នៅវេលាម៉ោង៦និង២៥នាទីល្ងាចថ្ងៃទី២៦ ខែកក្កដា មានបុរសម្នាក់ត្រូវជាឪពុកធំរបស់កុមារីរងគ្រោះបានទៅប្តឹងលោកមេភូមិពីជនសង្ស័យឈ្មោះ ញ៉ែម នួន ចាប់រំលោភក្មួយស្រីគាត់ ហើយស្នើសុំឲ្យលោកមេភូមិជួយអន្តរាគមន៍ផង ។ ពេលនោះ លោកមេភូមិបានរាយការណ៍បន្តទៅនគរបាលប៉ុស្តិ៍ ទើបមានការចាប់ឃាត់ខ្លួនជនសង្ស័យនៅវេលាម៉ោង៧និង៥០នាទីយប់ថ្ងៃដដែល ។
សមត្ថកិច្ចបញ្ជាក់ថា មុនឈានដល់បែកការណ៍ រហូតមានការចាប់ខ្លួនជនសង្ស័យនេះ គឺនៅព្រឹកថ្ងៃទី២៦ ខែកក្កដា ឪពុកធំរបស់ក្មេងស្រី ឃើញឪពុកចុងចេះតែបន្លំថើបក្មេងស្រី ហើយចាប់ផ្តើមជម្លៀសសាច់ញាតិឲ្យចេញទៅមើលគោក្របីនៅឯវាលស្រែ និងចុងក្រោយក៏ដឹកប្រពន្ធ ឱ្យទៅមើលម្តាយនៅមន្ទីរពេទ្យទៀត ដោយទុកឱកាសឲ្យរូបគេនិងក្មេងស្រីនៅផ្ទះតែ២នាក់ ។
ដោយមានការសង្ស័យ ឪពុកធំក៏តាមឈ្លេចសួរក្មួយស្រី ហើយត្រូវបានប្រាប់ការពិតថា ឪពុកចុងនាងតែង តែចាប់នាងរំលោភរាល់ពេលដែលម្តាយនាងមិននៅផ្ទះ ហើយគំរាមមិនឲ្យប្រាប់ម្តាយទេ ។ បន្ទាប់ពីដឹងរឿងបែបនេះ ទើបឪពុកធំទៅប្តឹងលោកមេភូមិឲ្យជួយអន្តរាគមន៍ភ្លាមៗតែម្តង ។
តាមរយៈការស្តាប់ការរៀបរាប់របស់ក្មេងស្រីបានឲ្យដឹងថា ជនជាឪពុកចុងនេះ បានចាប់នាងរំលោភតាំងពីនាងអាយុ១៣ឆ្នាំមកម្លេ៉ះ ហើយបើគិតមកដល់ពេលជននេះត្រូវចាប់ខ្លួន គឺរំលោភបានច្រើនដងហើយ ប៉ុន្តែនាងមិនហ៊ានប្រាប់ម្តាយ ឬបងប្អូនសាច់ញាតិណាទេ ព្រោះឪពុកចុងគំរាមបើហ៊ានប្រាប់គេនឹងសម្លាប់ចោល ហើយពេលនេះ នាងបាត់រដូវ២ខែហើយ ។
គួរបញ្ជាក់ថា ក្រោយពីត្រូវចាប់ខ្លួន ជនសង្ស័យត្រូវបានបញ្ជូនខ្លួនទៅកាន់អធិការដ្ឋាននគរបាលស្រុកកំពង់ត្របែកដើម្បីកសាងសំណុំរឿង ហើយបញ្ជូនបន្តទៅកាន់ស្នងការដ្ឋាននគរបាលខេត្ត នៅព្រឹកថ្ងៃទី២៨ ខែកក្កដា ដើម្បីចាត់ការបន្តទៅតាមនីតិវិធី ៕ (សម្រួលដោយ៖ ស្រីណា)
ចែករំលែកព័តមាននេះ