ខេត្តស្ទឹងត្រែង ៖ សេចក្តីរាយការណ៍បឋមបានឲ្យដឹងថា រថយន្តយីឌុបចំនួន៣គ្រឿង រួមវត្ថុតាងមធ្យោបាយបម្រើអោយបទល្មើសព្រៃឈើមួយចំនួនទៀត ត្រូវបានកម្លាំងកងរាជអាវុធហត្ថនគរបាលរួម និងរដ្ឋបាលព្រៃឈើរឹបអូស និងបង្ក្រាបនៅទីទាំងផ្សេងគ្នាច្រើនកន្លែង ក្នុងរយៈពេលតែមួយថ្ងៃ ។…
ខេត្តស្ទឹងត្រែង ៖ សេចក្តីរាយការណ៍បឋមបានឲ្យដឹងថា រថយន្តយីឌុបចំនួន៣គ្រឿង រួមវត្ថុតាងមធ្យោបាយបម្រើអោយបទល្មើសព្រៃឈើមួយចំនួនទៀត ត្រូវបានកម្លាំងកងរាជអាវុធហត្ថនគរបាលរួម និងរដ្ឋបាលព្រៃឈើរឹបអូស និងបង្ក្រាបនៅទីទាំងផ្សេងគ្នាច្រើនកន្លែង ក្នុងរយៈពេលតែមួយថ្ងៃ ។
ស្ថិតក្នុងប្រតិបត្តិការខាងលើ ខេត្តស្ទឹងត្រែងនៅតែបន្តការរុករកចំពោះវត្ថុតាងទាំងឡាយណាដែលពាក់ព័ន្ធទៅនឹងសកម្មភាពជាមធ្យោបាយបម្រើអោយបទល្មើសព្រៃឈើ ក្រោមបទបញ្ជាយ៉ាម៉ឺងម៉ាតរបស់នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទនិងជាមេបញ្ជាការកងរាជអាវុអហត្ថលើផ្ទៃប្រទេស ដែលជាប្រធានគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិបានដាក់ចេញនូវផែនការដល់មេបញ្ជាការខេត្តត្រូវទទួលខុសត្រូវក្នុងមូលដ្ឋានរបស់ខ្លួនលោក អៀង វ៉ាន់ឌី មេបញ្ជាការកងរាជអាវុធហត្ថខេត្តស្ទឹងត្រែង បានដឹកនាំកម្លាំងចម្រុះ ចុះរុករករឹបអូស និងបង្ក្រាបរាល់វត្ថុតាងជាក់ស្តែង និងមុខសញ្ញាដែលជាវត្ថុតាងតាមការចង្អុរបង្ហាញពីសាក្សីបានធ្វើការដកហូត និងកម្ទេចនៅនឹងកន្លែងជាបន្តបន្ទាប់ ។
ជាក់ស្តែងចាប់ពីវេលាម៉ោង៨និង០០នាទីរហូតដល់ម៉ោង១១និង៥០នាទីកម្លាំងកងរាជអាវុធហត្ថ ក្រោមបទបញ្ជាពីលោកមេបញ្ជាការខេត្តលោកវរសេនីយ៍ឯក ដូង វិចិត្រ មេបញ្ជាការរង បានដឹកនាំផ្ទាល់ដោយមានកម្លាំងនគរបាល និងរដ្ឋបាលព្រៃឈើក្រោមការសម្របសម្រួលពីលោក វង្ស សាវ៉ាត ព្រះរាជអាជ្ញារងបានរឹបអូសវត្ថុតាងបម្រើអោយបទល្មើសមួយចំនួនរួមមានរ៉ឺម៉កអូសខ្នាតយក្សចំនួនពីរគ្រឿងមកពីខេត្តមណ្ឌលគិរី ដោយបានយកទៅលាក់ទុកនៅភូមិច្រប់ឃុំក្បាលរមាស ស្រុកសេសាន ក្រោយបញ្ចប់នីតិវិធីត្រូវដុតកម្ទេចចោលនៅនឹងកន្លែង។បន្ទាប់មកនៅវេលាថ្ងៃត្រង់កម្លាំងចម្រុះបានរឹបអូសរថយន្តប៉ាកុងមួយគ្រឿង នៅចំណុចផ្លូវអាស៊ានក្បែគល់ស្ពានមេគង្គប្រមាណជាជាងមួយគីឡូម៉ែត្រ ។
រថយន្តនេះត្រូវកងកម្លាំងចម្រុះក្រោមការសម្របសម្រួលពីព្រះរាជអាជ្ញារងបានសម្រេចកាត់បំបែកកម្ទេចចោលផងដែរ ។ បន្ទាប់មកនាវេលារសៀលម៉ោងជាង៤ថ្ងៃដដែលកម្លាំងចម្រុះដដែលបានបង្ក្រាបរថយន្តច្នៃមួយគ្រឿង ខណៈដឹកជញ្ជូនគល់ឈើប្រណីតចូលទីរួមខេត្តដោយបច្ចុប្បន្មកំពុងរក្សាទុកនៅខណ្ឌរដ្ឋបាលព្រៃឈើរង់ចាំ ចំណាត់ការចេញបទបញ្ជា ។ លុះវេលាម៉ោង១១និង៥០នាទី កម្លាំងកងរាជអាវុធហត្ថបានឃាត់ រថយន្តយីឌុបដឹកដើមឈើម៉ៃសាក់ចំនួនបីគ្រឿង នៅចំណុចក្បែស្នាក់ការសន្តិសុខ៧៤៧ ស្រុកបុរីអូរ ស្វាយសែនជ័យនាំមកបបញ្ជាការដ្ឋានកងរាជអាវុធហត្ថខេត្ត ។
បច្ចុប្បន្នរថយន្តយីឌុបដឹកដើមឈើម៉ៃសាក់ទាំងបីគ្រឿងនោះកំពុងស្ថិត ក្រោមការត្រួតពិនិត្យនៅឡើយ ។ គួរបញ្ជាក់ថា សម្រាប់ខេត្តស្ទឹងត្រែងចាប់តាំងពីថ្ងៃទី៩ ខែកក្កដានេះ កម្លាំងចម្រុះក្រោមការសម្របសម្រួលដោយស្ថាប័នអយ្យការនៃសាលាដំបូងបានរឹបអូសវត្ថុតាងមានរងយន្តប៉ាកុង១៦គ្រឿង និងត្រាក់ទ័រអូសចំនួន២គ្រឿង សរុប១៨គ្រឿង ត្រូវដុតកិនកាត់កម្ទេចចោលនៅនឹងកន្លែងផងដែរ ៕កែសម្រួលដោយ ៖ សុឃាក់
ចែករំលែកព័តមាននេះ