ខេត្តបន្ទាយមានជ័យ ៖ បើតាមសេចក្តីរាយការណ៍បឋមបានឱ្យដឹងថា ក្មេងប្រុសអាយុ២ឆ្នាំម្នាក់ ព្រោះតែម្តាយរវល់លក់ដូរភ្លេចខ្លួនមួយភ្លែត ស្រាប់តែឲ្យកូនដើរលេងតែម្នាក់ឯងធ្លាក់ទឹកប្រឡាយលង់ស្លាប់យ៉ាងសង្វេគបង្កឲ្យមានការភ្ញាក់ផ្អើលកាលពីម៉ោង៩និង៣០នាទីព្រឹក ថ្ងៃទី២៨ ខែកក្កដា ឆ្នាំ២០១៩ ស្ថិតនៅភូមិជំទាវ ឃុំប្ញស្សីក្រោក ស្រុកមង្គលបូរី ។
តាមប្រភពពីនគរបាលមូលដ្ឋានបានឲ្យដឹងថា ក្មេងរងគ្រោះខាងលើមានឈ្មោះ សន្តិវ័ន្ត ពេជ្រថាន់ ភេទប្រុស អាយុ២ឆ្នាំ រស់នៅភូមិជំទាវ ឃុំប្ញស្សីក្រោក ស្រុកមង្គលបូរី ខេត្តបន្ទាយមានជ័យ មានឪពុកឈ្មោះ អាង សន្តិវ័ន្ត អាយុ៣៨ឆ្នាំ និងម្តាយឈ្មោះ យ៉ា លក្ខិណា អាយុ៣៤ឆ្នាំ។
ប្រភពដដែលបន្តទៀតថា នៅមុនកើតហេតុ ម្តាយរវល់តែលក់ដូរអីវ៉ាន់នៅតូបខាងមុខផ្ទះ ចំណែកកូនប្រុសតូចបានដើរលេងម្នាក់ឯងនៅខាងក្រោយផ្ទះ លុះនៅពេលបាត់កូនម្តាយក្មេងប្រុសរងគ្រោះក៏ដើររក ស្រាប់តែប្រទះឃើញសពកូនស្លាប់ក្នុងប្រឡាយទឹកខាងក្រោយឈៀងខាងលិចផ្ទះចម្ងាយប្រហែល៤ម៉ែត្រទៅហើយ ក៏ស្រែកផ្អើលឆោឡោឲ្យគេជួយស្រង់យកមកលើវិញ។
បច្ចុប្បន្នសពកុមារារងគ្រោះត្រូវបានឪពុកម្តាយរៀបចំធ្វើបុណ្យតាមប្រពៃណីទាំងក្តីសោកស្តាយ និងឡោះអាល័យបំផុត។ (កែសម្រួលដោយ ៖ បុប្ផា)
ចែករំលែកព័តមាននេះ