រាជធានីភ្នំពេញ ៖ ស្ត្រីជាមេអណ្តើក២នាក់ កាលពីថ្ងៃទី២៨ ខែកក្កដា បានត្រូវនគរបាលការិយាល័យប្រឆាំងការជួញដូរមនុស្ស និងការពារអនីតិជនរាជធានីភ្នំពេញ បញ្ជូនទៅកាន់សាលាដំបូង ពាក់ព័ន្ធនឹងករណីនាំមនុស្សឆ្លងដែនដោយខុសច្បាប់ ។ ស្ត្រីទាំង២នាក់នេះ ម្នាក់ឈ្មោះ សុខា រដ្ឋធានី ហៅយ៉ា អាយុ១៨ឆ្នាំ មុខរបរលក់គ្រឿងក្រអូប និងម្នាក់ទៀតឈ្មោះ ថាច់ ដាវី អាយុ៣០ឆ្នាំ មុខរបរលក់ដូរ ។ ពួកគេត្រូវបានឃាត់ខ្លួននៅមុខ វត្តមហាមេត្រី តាមផ្លូវលេខ១៧៣ ក្នុងសង្កាត់អូឡាំពិក ខណ្ឌបឹងកេងកង ។
ទាក់ទិននឹងករណីឃាត់ខ្លួនជនសង្ស័យជាមេអណ្តើកនាំមនុស្សឆ្លងដែនមិនស្របច្បាប់ បញ្ជូនទៅសាលាដំបូងរាជធានីភ្នំពេញនេះ លោកវរសេនីយ៍ឯក កែវ ធា នាយការិយាល័យនគរបាលប្រឆាំងការជួញដូរមនុស្សនិងការពារអនីតិជន បានឲ្យដឹងថា កាលពីព្រឹកថ្ងៃទី២៦ ខែកក្កដា កម្លាំងការិយាល័យរបស់លោកបានធ្វើការស្រាវជ្រាវ និងឈានដល់ឃាត់ខ្លួនស្ត្រី២នាក់ខាងលើ នៅមុខវត្តមហាមន្ត្រី ក្នុងសង្កាត់បឹងកេងកង២ខណ្ឌបឹងកេងកង ខណៈស្ត្រីទាំង២នាក់នេះ កំពុងធ្វើដំណើរចេញទៅនាំស្ត្រីរងគ្រោះ ដើម្បីឆ្លងដែនតាមប្រទេសវៀតណាមទៅកាន់ប្រទេសចិន ។ ជាមួយនេះ សមត្ថកិច្ចក៏បានរំដោះនិងអញ្ជើញជនរងគ្រោះ៤នាក់ទៅធ្វើការបំភ្លឺជុំវិញអ្វីដែលពួកនាងចង់ទៅយកប្តីចិន ។
ស្ត្រីរងគ្រោះឈ្មោះ វ៉ា សាមិ អាយុ២៤ឆ្នាំ រៀបរាប់ថា កាលពីខែមុនមានប្អូនជីទួតមួយឈ្មោះ យ៉ា ដែលគេមានប្តីជាជនជាតិចិន និងរស់នៅប្រទេសប្រទេសចិន បានមកលេងស្រុកខ្មែរជួបនាង ។ ដោយឃើញជីវភាពនាងមានការខ្វះខាត គេក៏បានសួរនាងថាចង់ទៅយកប្តីចិននិងរស់នៅប្រទេសចិនអត់ ? យកប្តីចិននឹងមានលុយចាយធូរធារ ហើយបើកូនកំលោះចិនគេពេញចិត្ត គេប្រគល់លុយឲ្យច្រើនៗ នាងនឹងបានលុយផ្ញើមកឲ្យឪពុកម្តាយទៀតផង ។
ពេលឮថាបានប្តីចិននិងទៅរស់នៅប្រទេសចិន នាងក៏ឆ្លើយភ្លាមថា«ចង់ទៅ» ទើបអ្វីៗសម្រេចតាមមេអណ្តើកទាំងអស់ គ្រាន់តែដំបូងមេអណ្តើកតម្រូវឱ្យនាងធ្វើលិខិតឆ្លងដែន ដើម្បីត្រៀមចាំគេនាំចេញពីស្រុកខ្មែរ ។ លុះនៅថ្ងៃទី២៤ ខែកក្កដា ឆ្នាំ២០១៩ ឈ្មោះ យ៉ា បានមកស្រុកខ្មែរ និងនាំនាងទៅស្នាក់នៅផ្ទះសំណាក់កាពីតូល បន្ទប់លេខ១២ ជាន់ទី២ ពេលនាងទៅស្នាក់នៅទីនោះក៏បានជួបស្ត្រីរងគ្រោះ៣ នាក់ទៀត ។
ថ្ងៃទី២៥ ខែកក្កដា ឈ្មោះ យ៉ា បាននាំពួកនាងទាំង៤នាក់ទៅដើរលេងផ្សារ និងទិញសម្លៀកបំពាក់ឲ្យគ្រប់គ្នា ដើម្បីរៀបចំខ្លួនទៅយកប្តីចិន ក្នុងនោះក៏មានឈ្មោះ ថាច់ ដាវី ចូលរួមដែរ ។ លុះព្រឹកថ្ងៃទី២៦ ខែកក្កដា ឈ្មោះ យ៉ា បាននាំពួកនាងជិះម៉ូតូកង់បីឥណ្ឌាមកដល់មុខវត្តមហាមន្ត្រី បម្រុងជិះរថយន្តហាយឡែនឌ័រ ចេញដំណើរទៅកាន់ប្រទេសវៀតណាម និងបន្តទៅប្រទេសចិនទៀត ស្រាប់តែត្រូវសមត្ថកិច្ចចាប់ខ្លួនទាំងអស់គ្នាតែម្តងទៅ ។
ចំណែកស្ត្រីរងគ្រោះ៣នាក់ទៀត មានឈ្មោះ ស៊ុម ថាវី អាយុ១៧ឆ្នាំ ឈ្មោះ ថន ចាន់ធី អាយុ១៦ឆ្នាំ និងឈ្មោះ នី ម៉ី អាយុ១៧ឆ្នាំ ក៏បាននិយាយប្រហាក់ប្រហែលគ្នានេះដែរ ដូច្នេះសមត្ថកិច្ចសន្និដ្ឋានថា ជនជាមេអណ្តើកទាំង២នាក់ ពិតជាបានប្រព្រឹត្តអំពើល្មើស ទាក់ទិនទៅនឹងករណីនាំមនុស្សឆ្លងដែនដោយមិនស្របច្បាប់ ។
ជនសង្ស័យត្រូវបានកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញតាមនីតិវិធី ចំណែកជនរងគ្រោះដែលចង់បានប្តីចិន សមត្ថកិច្ចប្រគល់ឲ្យអាណាព្យាបាលរបស់ពួកគេវិញ ។ មេអណ្តើកទាំង២នាក់នោះ ត្រូវបានឃុំខ្លួនក្នុងពន្ធនាគារជាបណ្តោះអាសន្ន ដើម្បីរង់ចាំបើកសវនាការជំនុំជម្រះទោសតាមច្បាប់ ៕ (សម្រួលដោយ៖ ស្រីណា)
ចែករំលែកព័តមាននេះ