ខេត្តបាត់ដំបង ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់បានព្រមានចាក់សាំងដុតសម្លាប់ខ្លួនម្ដងជាពីរដងនៅចំពោះមុខម្ដាយដោយគ្មានមូលហេតុ លុះនៅម៉ោង៦និង១៥នាទីព្រឹកថ្ងៃទី២៨ កក្កដានេះ ក្រោយពីបាត់កូនពីផ្ទះ១យប់ ស្រាប់តែម្ដាយដើររកឃើញបុរសនេះដេកស្លាប់ទាំងស្នាមឆេះរលាកពេញខ្លួននៅក្នុងបរិវេណសាលាបឋមសិក្សាពពាលខែ ដែលស្ថិតក្នុងភូមិពពាលខែ ឃុំអូរតាគី ស្រុកថ្មគោល ធ្វើឲ្យមានការភ្ញាក់ផ្អើលពេញភូមិតែម្តង។
លោកឧត្តមសេនីយ៍ត្រី ជេត វណ្ណនី ស្នងការរងខេត្តបានឲ្យដឹងថា បុរសនោះឈ្មោះ គុណ សំរិទ្ធ អាយុ៣២ឆ្នាំ រស់នៅភូមិ-ឃុំកើតហេតុខាងលើ។ បើតាមការអះអាងពីក្រុមគ្រួសារថា បុរសនេះមានសតិមិនប្រក្រតី។ ហើយជននេះបានដេកស្លាប់នៅក្នុងបរិវេណនៃសាលាបឋមសិក្សាពពាលខែ ដោយមានស្នាមឆេះរលាកពេញរាងកាយផង គឺស្របពេលមួយថ្ងៃមុនពេលកើតហេតុដែលជននេះបានព្រមានជាញឹកញ៉ាប់នៅចំពោះមុខម្ដាយអំពីការធ្វើអត្តឃាតដោយចាក់សាំងដុតខ្លួនឯង។
តាមការបំភ្លឺរបស់ម្ដាយឈ្មោះជុន ចិន្ដា អាយុ៦៤ឆ្នាំ ប្រាប់ថា កាលពីរសៀលថ្ងៃទី២៧ កក្កដា នៅសុខៗកូនគាត់សុំលុយ២ពាន់រៀល ហើយប្រើកូនក្មេងឲ្យទៅទិញសាំងឲ្យវា តែគ្មាននរណាទិញវាទេ ដោយវានិយាយថា វាយកសាំងមកចាក់ដុតខ្លួនឯង។
ម្តាយជនរងគ្រោះនិយាយបន្តថា កូនប្រុសរូបនេះបានព្រមានដុតខ្លួនជាបន្តបន្ទាប់ តែគាត់មិនដឹងពីមូលហេតុទេ ព្រោះវាមានសតិមិនប្រក្រតី។ បន្ទាប់មកគាត់ក៏លួងលោមកូនទៅដេក ប៉ុន្តែនៅល្ងាចថ្ងៃដដែល ក្រោយភ្ញាក់ពីដេកកូនក៏ប្រាប់គាត់ថា «ចាំមើលខ្ញុំដុតខ្លួនឯងឲ្យបានសម្រេច» រួចវាក៏ដើរចេញពីផ្ទះបាត់ទៅរហូតដល់យប់ក៏មិនឃើញមកផ្ទះវិញដែរ។ លុះព្រឹកឡើងពេលគាត់ដើររកនៅក្នុងបរិវេណសាលារៀនពពាលខែ ស្រាប់តែឃើញកូនដេកស្លាប់ដោយដុតខ្លួនតែម្ដង ធ្វើឲ្យគាត់តក់ស្លុតយ៉ាងខ្លាំង។ សមត្ថកិច្ចចុះទៅកាន់កន្លែងកើតហេតុ ដើម្បីពិនិត្យសាកសពភ្លាមៗដែរ ក្រោយពីទទួលព័ត៌មាននេះ។
លោកជេត វណ្ណនី ស្នងការរងខេត្តប្រាប់ថា ជនរងគ្រោះពិតជាធ្វើអត្តឃាតខ្លួនឯងមែន។ នេះបើតាមការសន្និដ្ឋានរបស់មន្ត្រីជំនាញ។ ហើយជនរងគ្រោះសម្លាប់ខ្លួនដោយប្រើសាំងចាក់ដុត តែបានធ្វើឡើងនៅពេលយប់ទើបគ្មាននរណាបានដឹង ខណៈនៅក្នុងបរិវេណសាលានោះស្ងាត់ និងបាំងដោយជញ្ជាំងថ្មផង។ ប៉ុន្តែយើងមិនបានដឹងអំពីមូលហេតុជាក់លាក់ទេ ដោយគ្រាន់តែទទួលបានព័ត៌មានពីក្រុមគ្រួសារថា ជនរងគ្រោះជាមនុស្សមានសតិមិនប្រក្រតី។ ទោះយ៉ាងណា ក្រោយពិនិត្យមន្ត្រីជំនាញបានធ្វើកំណត់ហេតុ រួចប្រគល់សពឲ្យក្រុមគ្រួសារធ្វើបុណ្យតាមប្រពៃណីហើយ។ (កែសម្រួលដោយ ៖ បុប្ផា)
ចែករំលែកព័តមាននេះ