រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរសជាជនជាតិចិនម្នាក់បាននាំសង្សារចូលទៅរកកន្លែងម៉ាស្សា ស្រាប់តែត្រូវនារីម៉ាស្សាលួចលុយអស់១៥០ដុល្លារ ដោយដាក់បន្លំលុយដុល្លារសែនជំនួសវិញ បង្កឲ្យមានការភ្ញាក់ផ្អើលកាលពីម៉ោង2និង15នាទីរំលងអធ្រាត្រឈានចូលថ្ងៃទី27 ខែកក្កដា ឆ្នាំ2019 តាមបណ្តោយផ្លូវ172 នៅចំណុចក្រោយវត្តឧណ្ណាលោម ស្ថិតនៅក្នុងសង្កាត់ជ័យជំនះ ខណ្ឌដូនពេញ ។
បើតាមសាក្សីជាសង្សារជនរងគ្រោះមានឈ្មោះ ស្រី សរ អាយុ24ឆ្នាំ បានឱ្យដឹងថា មុនពេលកើតហេតុ គាត់ជាមួយសង្សារជាជនជាតិចិនមិនប្រាប់ឈ្មោះវ័យ25ទៅ26ឆ្នាំ បាននាំគ្នាទៅរកកន្លែងម៉ាស្សា ហើយដើររហូតមកដល់ផ្លូវ172 ពីកើតទៅលិច ស្រាប់តែឃើញកន្លែងម៉ាស្សាមួយកន្លែងនៅលើផ្លូវ172 ក៏នាំគ្នាចូលទៅ ប៉ុន្តែរូបគាត់មិនបាននៅម៉ាស្សាទេ បានចេញទៅទិញបាយឆាញ៉ាំ ។
ប្រភពដដែលបន្តថា លុះពេលត្រឡប់មកវិញ គាត់ក៏ឃើញជនសង្ស័យស្រីៗ២នាក់កំពុងតែរើខោអាវជនរងគ្រោះក៏ចូលទៅសួរនាំ ជនសង្ស័យនិយាយថា «រកក្រដាសជូតមាត់» លុះដល់ពេលគិតលុយក៏ស្រាប់តែបាត់លុយអស់150$ ឃើញមានតែលុយដុល្លារសែនទៅវិញ ក៏ចូលទៅសួរខាងម្ចាស់ហាងម៉ាស្សា តែបែរជាត្រូវម្ចាស់ហាងចង់រករឿង និងវាយគាត់ទៀត ទើបបង្កឱ្យផ្អើលទៅដល់អ្នកសារព័ត៌មានចុះមកផ្តឹតយករូបភាព ភា្លមៗនោះម្ចាស់ហាងម៉ាស្សាបានបិទទ្វារ រួចគេចខ្លួនបាត់ស្រមោលតែម្តង ។
ក្រោយពេលកើតហេតុ ជនរងគ្រោះបានទៅដាក់ពាក្យបណ្តឹងនៅប៉ុស្តិ៍រដ្ឋបាលនគរបាលជ័យជំនះ ដើម្បីជួយអន្តរាគមន៍តែម្តង។ (កែសម្រួលដោយ ៖ បុប្ផា)
ចែករំលែកព័តមាននេះ