រាជធានីភ្នំពេញ ៖ អ្នកនាំពាក្យនៃអគ្គស្នងការនគរបាលជាតិបានសេចក្តីប្រកាសព័ត៌មានថាបានទទួលដីកាពីតុលាការក្នុងការអនុវត្តដីកាបង្គាប់ឲ្យចាប់ខ្លួនទណ្ឌិត សម រង្ស៊ី និងបក្សពួក ដែលត្រូវតុលាការផ្តន្ទាទោស និងរត់គេចខ្លួន ។ ការប្រកាសព័ត៌មានរបស់អគ្គស្នងការនគរបាលជាតិនេះ បន្ទាប់ពីលោកសម រង្ស៊ី និងបក្សពួកដែលកំពុងរត់គេពីសំណាញ់ច្បាប់កម្ពុជា ហើយរស់នៅក្រៅប្រទេសបានប្រកាសថា នឹងចូលមកកម្ពុជាវិញនៅពេលឆាប់ៗនេះ ដោយមានសមាជិកសភារបស់បណ្តាប្រទេសមួយចំនួនអមដំណើរមកចូលស្រុកផងដែរ ។
យោងតាមសេចក្តីប្រកាសព័ត៌មានរបស់អគ្គស្នងការនគរបាលជាតិចេញផ្សាយនៅថ្ងៃទី២៧ ខែកក្កដា បានឲ្យដឹងថា អគ្គស្នងការដ្ឋាននគរបាលជាតិនឹងចាត់វិធានការតាមគ្រប់រូបភាព និងគ្រប់មធ្យោបាយស្របតាមច្បាប់ ដើម្បីអនុវត្តឲ្យមានប្រសិទ្ធភាពតាមដីការបស់តុលាការក្នុងការស្វែងរក និងចាប់ខ្លួនទណ្ឌិត សម រង្ស៊ី និងបក្សពួកយកមកផ្តន្ទាទោសតាមច្បាប់ជាធរមាន ។
ទន្ទឹមនេះក្នុងស្មារតីរួមចំណែកពង្រឹង និងការពារនីតិរដ្ឋព្រមទាំងធានាការរក្សា សន្តិសុខ និងសណ្តាប់ធ្នាប់សង្គមឲ្យបានល្អប្រសើរអគ្គស្នងការដ្ឋាននគរបាលជាតិ សូមអំពាវនាវដល់សាធារណៈជនជាតិ និងអន្តរជាតិចូលរួមគាំទ្រដល់ការអនុវត្តភារកិច្ចរបស់កងកម្លាំងអនុវត្តច្បាប់ និងកុំធ្លាក់ក្នុងឧបាយកលញុះញង់របស់ជនអគតិមួយក្តាប់តូច ដែលកំពុងបំផុសឲ្យប្រជាពលរដ្ឋ បះបោរប្រឆាំងអាជ្ញាធរមានសមត្ថកិច្ច ដែលសកម្មភាពនេះ គឺជាទង្វើខុសច្បាប់ ហើយក៏ជាទង្វើ ដែលបង្កឲ្យមានអសន្តិសុខដល់សង្គម ។ ជាមួយគ្នានេះដែរ សូមបញ្ឈប់ជាបន្ទាន់នូវរាល់ចេតនារារាំងការអនុវត្តដីការបស់តុលាការ ព្រោះសកម្មភាពរារាំងការអនុវត្តដីការបស់តុលាការ គឺជាអំពើដែលត្រូវផ្តន្ទាទោសតាមច្បាប់ជាធរមាន ។
អគ្គស្នងការដ្ឋាននគរបាលជាតិ សង្ឃឹមយ៉ាងមុតមាំថា សាធារណៈជនជាតិ និងអន្តរ ជាតិនឹងចូលរួម សហការគោរព និងអនុវត្តឲ្យបានត្រឹមត្រូវតាមច្បាប់ នៃព្រះរាជាណាចក្រកម្ពុជា ៕ កែសម្រួលដោយ ៖ សុឃាក់
ចែករំលែកព័តមាននេះ