រាជធានីភ្នំពេញ ៖ គណៈកម្មាធិការសិទ្ធិមនុស្សកម្ពុជាបានចេញសេចក្តីថ្លែងការណ៍ច្រានចោលចំពោះការសេចក្តីប្រកាសព័ត៌មានរបស់ឧត្តមស្នងការអង្គការសហប្រជាជាតិទទួលបន្ទុកសិទ្ធមនុស្សនៅទីក្រុងហ្សឺណែវ ប្រទេសស្វីសដែលចោទមកលើករាជរដ្ឋាភិបាលកម្ពុជា ។ យោងតាមសេចក្តីរបស់អ្នកនាំពាក្យគណៈកម្មាធិការសិទ្ធិមនុស្សកម្ពុជាដែលកោះសន្តិភាពបានទទួល នៅថ្ងៃទី២៨ ខែកក្កដានេះ ។
ដោយលើកឡើងថា អ្នកនាំពាក្យគណៈកម្មាធិការសិទ្ធិមនុស្សកម្ពុជាមានការសោកស្តាយយ៉ាងខ្លាំង ក្រោយពីបានទទួលដំណឹងអំពីការចេញផ្សាយសេចក្តីប្រកាសព័ត៌មានចុះថ្ងៃទី២៦ ខែកក្កដានេះ ដោយការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស នៅទីក្រុងហ្សឺណែវ ដែលក្នុងនោះក្រុមអ្នករាយការណ៍ពិសេសបានធ្វើការចោទប្រកាន់ម្តងហើយ ម្តងទៀត ដោយគ្មានមូលដ្ឋាន និងផ្អែកលើព័ត៌មានតែមួយជ្រុងមកលើយន្តការអនុវត្តច្បាប់របស់រាជរដ្ឋាភិបាលថា ជាការរឹតត្បិតទៅលើសិទ្ធិសេរីភាពនៃការបញ្ចេញមតិ និងការជួបប្រជុំដោយសន្តិវិធីជាដើម ។
អ្នកនាំពាក្យគណៈកម្មាធិការសិទ្ធិមនុស្សកម្ពុជា សូមធ្វើការបដិសេធយ៉ាងដាច់អហង្ការចំពោះការចោទប្រកាន់ដោយគ្មានមូលដ្ឋានច្បាស់លាស់ប្រឆាំងនឹងរាជរដ្ឋាភិបាលកម្ពុជាដោយផ្អែកលើព័ត៌មានមិនពិត លម្អៀង ក្រោមរបៀបវារៈនយោបាយ និងស្តង់ដាពីរ ។ ដើម្បីកុំឱ្យ សាធារណមតិមានការយល់ច្រឡំ អ្នកនាំពាក្យគណៈកម្មាធិការសិទ្ធិមនុស្សកម្ពុជា សូមធ្វើកា របកស្រាយបំភ្លឺការពិតដូចតទៅ ១- ករណីចាប់ខ្លួនលោក គង់ រ៉ៃយ៉ា និងលោក សួង នាគព័ន្ធ មិនមែនជាការជាការរឹតត្បិតទៅលើសិទ្ធិសេរីភាពនៃការបញ្ចេញមតិ និងការជួបប្រជុំដោយ សន្តិវិធីនោះទេ តែជាការអនុវត្តច្បាប់របស់អាជ្ញាធរមានសមត្ថកិច្ចក្នុងការទប់ស្កាត់កុំឱ្យមានភាពចលាចលកើតឡើងនៅក្នុងសង្គម ដែលកើតចេញពីសកម្មភាពបង្កប់នូវ ចេតនាទុច្ចរិត ក្នុងការបង្កភាពចលាចលបញ្ចុះកំហឹងប្រជាពលរដ្ឋឱ្យមានការស្អប់ខ្ពើម និងបះបោរប្រឆាំងទៅ នឹងរាជរដ្ឋាភិបាលស្របច្បាប់ដែលកើតចេញពីការបោះឆ្នោត ដោយមានការឧបត្ថម្ភគាំទ្រ រៀបចំ និងចាត់ចែងពីអង្គការចាត់តាំងផ្នែកនយោបាយយ៉ាងច្បាស់លាស់នៅពីក្រោយ ហើយដែលសមត្ថកិច្ចមានមូលដ្ឋានព័ត៌មានគ្រប់គ្រាន់ ក្នុងចំណាត់ការផ្លូវច្បាប់របស់ខ្លួនលើករណីនេះ ។ ២- ករណីឃាតកម្មលោក កែម ឡី តុលាការបានបិទបញ្ចប់សំណុំរឿងទីមួយ ដោយ ផ្តន្ទាទោសជនដៃដល់ឈ្មោះ អឿត អាង ហៅជួប សំលាប់ ឱ្យជាប់ពន្ធនាគារអស់មួយជីវិត ចំណែកឯសំណុំរឿងមួយទៀតដែលបំបែកចេញពីសំណុំរឿងទីមួយនេះ ក្នុងការស្វែងរកជន ពាក់ព័ន្ធដទៃទៀត កំពុងស្ថិតក្នុងដំណើរការនីតិវិធីតុលាការ ដែលបាន និងកំពុងអនុវត្តកិច្ចការ របស់ខ្លួន ដោយឯករាជ្យ និងយកចិត្តទុកដាក់ស្របតាមច្បាប់ និងនីតិវិធីជាធរមាននៃព្រះរាជាណាចក្រកម្ពុជា ហើយក៏មិនមានភាពចាំបាច់ណាមួយក្នុងការបង្កើតស្ថាប័នឯករាជ្យដោយឡែកផ្សេងទៀតដែរ ។
ដើម្បីជាប្រយោជន៍នៃការស៊ើបអង្កេតក្នុងសំណុំរឿងទីពីរនេះ សមត្ថកិច្ច និងតុលាការក៏តែងតែបានធ្វើការអំពាវនាវដល់សាធារណជន និងគ្រប់ភាគីពាក់ព័ន្ធទាំងអស់ផងដែរឱ្យចូលរួម ជាមួយសមត្ថកិច្ចក្នុងការបំបែកសំណុំរឿងនេះតាមរយៈការផ្តល់នូវព័ត៌មាន និងភស្តុតាងជាក់ច្បាស់ពីប្រភពនានា ដើម្បីជាពន្លឺក្នុងការស្វែងរកជនពាក់ព័ន្ធដទៃទៀត ជាជាងការធ្វើអត្ថាធិ ប្បាយដោយមន្ទិលសង្ស័យ គ្មានមូលដ្ឋាន និងចោទប្រកាន់មកលើសមត្ថកិច្ចដោយអសុទ្ធិ ចិត្ត ។ ៣- ករណីចំណាត់ការផ្លូវច្បាប់លើលោក អ៊ួន ឈិន និងលោកយាង សុទ្ធារិន មិនមែនជាការវាយប្រហារទៅលើសេរីភាពនៃកាសំដែងមតិ និងសេរីភាពសារព័ត៌មាននោះទេ ព្រោះសកម្មភាពរបស់អ្នកទាំងពីរមិនមែនជាការអនុវត្តនូវវិជ្ជាជីវៈអ្នកសារព័ត៌មាននោះទេ តែសកម្មភាពទាំងនោះត្រូវបានសមត្ថកិច្ចរកឃើញថា ជាបទល្មើស និងត្រូវបានចោទពីបទ «ប្រគល់ឱ្យរដ្ឋបរទេសនូវព័ត៌មានជាអាទិ៍ដែលនាំឱ្យអន្តរាយដល់ការការពារជាតិ»និងបទចោទផ្សេងៗទៀតតាមបញ្ញត្តិនៃក្រមព្រហ្មទណ្ឌនៃព្រះរាជាណាចក្រកម្ពុជា ដោយផ្អែកលើមូលដ្ឋាន ព័ត៌មានចារកម្ម រួមទាំងវត្ថុតាង និងភស្តុតាងផ្សេងៗទៀតដែលប្រមូលបាននៅនឹងកន្លែង ហើយដែលសំណុំរឿងនេះកំពុងស្ថិតក្នុងដំណាក់កាលជំនុំជម្រះដល់អង្គសេចក្តីក្នុងដំណើរការ នីតិវិធីរបស់សាលាដំបូងរាជធានីភ្នំពេញ ។
ក្នុងនាមប្រទេសប្រកាន់ប្រជាធិបតេយ្យ ការគោរពសិទ្ធិមនុស្ស និងនីតិរដ្ឋជនគ្រប់រូបត្រូវទទួលខុសត្រូវតាមផ្លូវច្បាប់ រួមទាំងអ្នកសារព័ត៌មានសកម្មជនបក្សនយោបាយ និងអង្គការសង្គមស៊ីវិលនានាផងដែរ មិនមែនដោយសារពួកគេជានរណានោះទេ តែដោយសារបទល្មើសដែល ពួកគេបានប្រព្រឹត្ត ។ ការអំពាវនាវឱ្យរាជរដ្ឋាភិបាលធ្វើការដោះលែង ឬលើកលែងការចោទប្រកាន់ដល់ជនណាមួយដែលកំពុងស្ថិតក្នុងដំណើរការនីតិវិធីរបស់តុលាការ គឺជាការអំពាវនាវ ដោយមិនផ្អែកទៅលើទិដ្ឋភាពច្បាប់ និងរដ្ឋធម្មនុញ្ញរបស់កម្ពុជាឡើយ ដោយហេតុថា តុលាការជាស្ថាប័ន ឯករាជ្យ ហើយរាជរដ្ឋាភិបាលជាស្ថាប័ននីតិប្រតិបត្តិដែលមិនអាចជ្រៀតជ្រែកចូលក្នុងកិច្ចការរបស់តុលាការ ដែលជាស្ថាប័នឯករាជ្យបានឡើយ ។ ជាមួយគ្នានោះដែរអ្នកនាំពាក្យគណៈកម្មាធិការសិទ្ធិមនុស្សកម្ពុជាសូមស្នើដោយទទូចដល់ក្រុមអ្នករាយការណ៍ពិសេស និងភាគីពាក់ព័ន្ធទាំងអស់ ពិចារណាឡើងវិញពីការយល់ឃើញ និងការសម្រេចចិត្ត ដែលខ្វះព័ត៌មានពិតប្រាកដច្បាស់លាស់ និងគ្រប់ជ្រុងជ្រោយ ដែលត្រូវអាចគេមើលឃើញថាជាទង្វើជ្រៀតជ្រែកក្នុងកិច្ចការផ្ទៃក្នុងនៃរដ្ឋ អធិបតេយ្យដែលផ្ទុយនឹងធម្មនុញ្ញអង្គការសហប្រជាជាតិ ព្រមទាំងវត្ថុបំណងនៃយន្តការនីតិវិធីពិសេស ។
ទន្ទឹមនឹងនេះ អ្នកនាំពាក្យគណៈកម្មាធិការសិទ្ធិមនុស្សកម្ពុជាក៏សូមធ្វើការអំពាវនាវផងដែរដល់ក្រុមសកម្មជននយោបាយ អង្គការសង្គមស៊ីវិល និងអ្នកសារព័ត៌មានមួយចំនួនតូចឱ្យ ចូលរួមក្នុងការគោរពនីតិរដ្ឋប្រជាធិបតេយ្យ និងសិទ្ធិមនុស្សនៅកម្ពុជាដោយមិនត្រូវធ្វើសកម្មភាពទាំងឡាយណាដែលជាការបំពានច្បាប់ សិទ្ធិសេរីភាពរបស់អ្នកដ៏ទៃ និងប៉ះពាល់ដល់សណ្តាប់ធ្នាប់សាធារណៈ ដើម្បីតែផលប្រយោជន៍នយោបាយរបស់ក្រុម និងបក្សពួកខ្លួន ដែលនឹងនាំឱ្យមានការទទួលខុសត្រូវតាមផ្លូវច្បាប់ដែលមានជាធរមាននៅកម្ពុជា ។
អ្នកនាំពាក្យគណៈកម្មាធិការសិទ្ធិមនុស្សកម្ពុជា សូមអះអាងជាថ្មីម្តង ទៀតនូវការប្តេជ្ញាចិត្តយ៉ាងមុតមាំរបស់កម្ពុជា ក្នុងការលើកកម្ពស់នីតិរដ្ឋ ប្រជាធិបតេយ្យ សិទ្ធិមនុស្ស និងការថែរក្សាសន្តិភាព ស្ថិរភាព និងសណ្តាប់ធ្នាប់សាធារណៈតាមរយៈយន្តការនៃការអនុវត្តច្បាប់យ៉ាងម៉ឺងម៉ាត់ និងដោយគ្មានការលើកលែង ៕កែសម្រួលដោយ ៖ សុឃាក់
ចែករំលែកព័តមាននេះ