រាជធានីភ្នំពេញ ៖ រដ្ឋមន្ត្រីក្រសួងយុត្តិធម៌លោកអង្គ វង្សវឌ្ឍានា បានធ្វើការវះកាត់លើសំណុំរឿងស្នេហាត្រីកោណរបស់ក្រុមមន្ត្រីក្នុងស្ថាប័នអយ្យការ ដែលបង្កឱ្យមានការកត់សម្គាល់ពេញបណ្តាញសង្គម បន្ទាប់ពីស្ត្រីជាភរិយាមានប្រតិកម្មជាចំហ ចំពោះលោកប្តីដែលលួចមានស្រី ។ នៅថ្ងៃទី២៥…
រាជធានីភ្នំពេញ ៖ រដ្ឋមន្ត្រីក្រសួងយុត្តិធម៌លោកអង្គ វង្សវឌ្ឍានា បានធ្វើការវះកាត់លើសំណុំរឿងស្នេហាត្រីកោណរបស់ក្រុមមន្ត្រីក្នុងស្ថាប័នអយ្យការ ដែលបង្កឱ្យមានការកត់សម្គាល់ពេញបណ្តាញសង្គម បន្ទាប់ពីស្ត្រីជាភរិយាមានប្រតិកម្មជាចំហ ចំពោះលោកប្តីដែលលួចមានស្រី ។
នៅថ្ងៃទី២៥ ខែកក្កដា ឆ្នាំ២០១៩ លោករដ្ឋមន្ត្រី អង្គ វង្ស វឌ្ឍានា បានសម្រេចផ្អាកមុខងារលោក ជា ពេជ្រ ព្រះរាជអាជ្ញានៃអយ្យការអមសាលាដំបូងខេត្តរតនគិរី ជាបណ្តោះអាសន្ន និងបានដាក់ជំនួសដោយលោក ងិន ពេជ្រ ព្រះរាជអាជ្ញារងអមសាលាដំបូងរាជធានីភ្នំពេញ ជាព្រះរាជអាជ្ញាស្តីទី ។
ការសម្រេចនេះ គឺក្រោយពីតំណាងអយ្យការអមសាលាដំបូងរាជធានីភ្នំពេញ បានចោទប្រកាន់ពីបទផិត ។ ការចោទប្រកាន់លើលោក ជា ពេជ្រ ព្រះរាជអាជ្ញានៃអយ្យការអមសាលាដំបូងខេត្តរតនគិរីពីបទផិត គឺយោងតាមមាត្រា១០នៃច្បាប់ស្តីពី ឯកព័ន្ធភាព ។
អ្នកស្រី ហ៊ាន លក្ខិណា ជាភរិយាដើមរបស់លោក ជា ពេជ្រ ព្រះរាជអាជ្ញានៃអយ្យការអមសាលាដំបូងខេត្តរតនគិរី កាលពីថ្ងៃទី២៥ ខែកុម្ភៈ ដើមឆ្នាំនេះ បានប្តឹងលោក ជា ពេជ្រ ចូលស្ថាប័នអយ្យការអមសាលាដំបូងរាជធានីភ្នំពេញ ពីបទផិត បន្ទាប់ពីលោកស្រីរកឃើញថា លោក ជា ពេជ្រ បានលួចលាក់មានប្រពន្ធចុងរហូតមានកូនប្រុសម្នាក់ ។
កាលពីថ្ងៃទី២៤ ខែកក្កដាកន្លងទៅ លោក អង្គ វង្ស វឌ្ឍានា រដ្ឋមន្ត្រីក្រសួងយុត្តិធម៌ ក៏បានសម្រេចដក លោក អ៊ង រី ព្រះរាជអាជ្ញារងអមសាលាដំបូងខេត្តកោះកុងដែរ បន្ទាប់ពីមានរឿងអាស្រូវនាំស្រីចូលផ្ទះសំណាក់ ហើយភរិយារបស់លោកដែលតាមដានបានធ្វើការបរិហារផ្អើលផ្ទះសំណាក់ ។
សេចក្តីសម្រេចដកតំណែងលោក អ៊ង រី ធ្វើឡើង បន្ទាប់ពីមានសេចក្តីរាយការណ៍ពាក់ព័ន្ធ នឹងករណីព្រះរាជអាជ្ញារងរូបនេះ លួចលាក់ដឹកស្រីស្នេហ៍ចូលផ្ទះសំណាក់«ស្រែនាង» ស្ថិតក្នុងសង្កាត់ផ្សារដើមថ្គូវ ខណ្ឌចំការមន រាជធានីភ្នំពេញ ហើយប្រពន្ធដើមតាមទាន់ កាលពីយប់ថ្ងៃទី១៨ ខែកក្កដា ឆ្នាំ២០១៩ កន្លងទៅ ។ លោក អ៊ង រី ត្រូវបានតម្រូវឱ្យបង្ហាញវត្តមាននៅក្រសួងយុត្តិធម៌រៀងរាល់ម៉ោងធ្វើការផងដែរ ៕
ចែករំលែកព័តមាននេះ