រាជធានីភ្នំពេញ ៖ មានការភ្ញាក់ផ្អើលមួយបានកើតឡើងបន្ទាប់ស្ត្រីវ័យជាង៤១ឆ្នាំម្នាក់បានជិះរថយន្តតាក់សុី១គ្រឿងធ្វើដំណើរតាំងពីស្រុកកំណើតនៅឯខេត្តស្វាយរៀងឆ្ពោះមកភ្នំពេញ ដើម្បីនាំកូនស្រីជាទីស្រឡាញ់របស់គាត់ម្នាក់ដែលធ្វើជាកម្មការិនីរោងចក្រ ហើយកំពុងតែលង់ស្នេហ៍យ៉ាងងប់ងុលជាមួយស្ត្រីម្នាក់ទៀត រហូតរស់នៅជាមួយគ្នាក្រោមដំបូលផ្ទះជួលតែមួយដូចជាប្ដីប្រពន្ធ ។
លុះបានជួបកូនស្រីសំណព្វចិត្តគាត់បានចាប់អូសទាញនាងឲ្យត្រឡប់ទៅផ្ទះវិញជាមួយគាត់ព្រោះគាត់មិនចង់ឲ្យកូនស្រីវ័យ២២ឆ្នាំរបស់គាត់ម្នាក់នេះយកមនុស្សស្រីដូចគ្នាធ្វើជាប្ដីប្រពន្ធឡើយ ។ ប៉ុន្តែខណៈនោះមិនត្រឹមតែនាងមិនព្រមទៅជាមួយប៉ុណ្ណោះទេ នាងបានក្រាញននៀលបង្កការភ្ញាក់ផ្អើល ហើយថែមទាំងព្រមានដល់ស្ត្រីជាម្ដាយថា«បើម៉ែយកខ្ញុំត្រឡប់ទៅស្រុកត្រូវយកសង្សារខ្ញុំទៅនៅជាមួយដែរបើមិនអញ្ចឹងទេពួកខ្ញុំសុខចិត្តស្លាប់»ដែលជាហេតុធ្វើឲ្យម្ដាយហួសចិត្ត និងស្រែកយំ ។
ហេតុការណ៍នេះបានកើតឡើងកាលពីវេលាម៉ោង៧និង ៣០នាទីព្រឹកថ្ងៃទី២៧ ខែកក្កដា ឆ្នាំ២០១៩ នៅតាមផ្លូវវ៉េងស្រេង មុខរោងចក្រកាត់ដេរសំលៀកបំពាក់ ហុង វ៉ា ស្ថិតនៅក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ ។
ស្ត្រីជាម្តាយខាងលើនោះឈ្មោះ ស.ដ.រ អាយុ៤១ឆ្នាំ ជាស្ត្រីមេម៉ាយ សព្វថ្ងៃគាត់មានកូនស្រីតែ២នាក់ប៉ុណ្ណោះនៅក្នុងបន្ទុកគ្រួសារ ហើយកូនស្រីដែលស្រឡាញ់ភេទដូចគ្នានេះគឺជាកូនច្បងមានឈ្មោះ ស.ល.ណ អាយុ២២ឆ្នាំ មុខរបរជាកម្មការិនីរោងចក្រកាត់ដេរយីហោ ហុង វ៉ា ស្នាក់នៅបន្ទប់ជួលជាមួយស្ត្រីម្នាក់ទៀតដែលជាគូស្នេហ៍នៅម្តុំផ្សារទួលពង្រ ស្ថិតនៅក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ ។
តាមប្រភពព័ត៌មានបានឲ្យដឹងថា នៅមុនពេលកើតហេតុបានឃើញស្ត្រីម្នាក់ចុះពីលើរថយន្តឈ្នួលនៅចំណុចមុខរោងចក្រកាត់ដេរ ហុង វ៉ា បន្ទាប់មកបានស្ទុះទៅចាប់អូសដៃនាងកម្មការិនីខាងលើដែលជាកូនឲ្យឡើងរថយន្តឈ្នួលត្រឡប់ទៅផ្ទះវិញជាមួយគាត់ ។ ប៉ុន្តែខណៈនោះនាងបានប្រកែក ព្រមទាំងធ្វើការរើបម្រាស់ និងប្រវាយប្រតប់ជាមួយម្ដាយមិនព្រមឡើងរថយន្តឡើយ មិនតែប៉ុណ្ណោះអ្នកទាំង២គឺទាំងម្ដាយ និងកូនស្រីសុទ្ធតែបានយំដូចគ្នាថែមទៀតផង ។
បន្ទាប់ពីឃើញបែបនេះកម្មរកររោងចក្រនេះរាប់រយនាក់បានចោមរោមមើល ហើយខណៈនោះបានឮកូនស្រីរូបនេះយំផងនិយាយផងថា «ខ្ញុំសូមប្រាប់ម៉ែឯងចុះតាំងពីខ្ញុំធំដឹងក្ដីរហូតមកភ្នំពេញធ្វើជាកម្មការិនីនៅរោងចក្រ ហុង វ៉ា នេះ ខ្ញុំមិនដែលមានអារម្មណ៏ស្រឡាញ់មនុស្សប្រុសឬក៏ចង់បានមនុស្សប្រុសណាម្នាក់មកធ្វើជាសង្សារ ឬប្ដីសូម្បីតែប៉ុន១សរសៃសក់នោះទេ ។ ខ្ញុំស្រឡាញ់តែមនុស្សស្រីដូចគ្នាប៉ុណ្ណោះ ហើយស្នេហាដំបូងរបស់ខ្ញុំជាមួយយុវតីភេទដូចគ្នាម្នាក់ធ្លាប់រួមរស់នៅបន្ទប់ជួលជាមួយគ្នារយៈពេល៣ឆ្នាំតែទីបំផុតម៉ែបានបំបែកខ្ញុំចេញពីគ្នាបានសម្រេច ។ នេះជាលើកី២ហើយដែលខ្ញុំទទួលបានស្នេហាថ្មីជាមួយមនុស្សភេទដូចគ្នាហើយម៉ែមកតាមបំបែកទៀត ពេលនេះបើម៉ែចង់ឲ្យខ្ញុំត្រឡប់ទៅស្រុកវិញត្រូវយកសង្សារខ្ញុំទៅនៅស្រុកជាមួយដែរបើមិអញ្ចឹងទេពួកខ្ញុំសុខចិត្តស្លាប់ មិនទៅឡើយ» ។
ស្ត្រីជាម្ដាយបាននិយាយថា គាត់ពិតជាមានការហួសចិត្តខ្លាំងណាស់គ្មានពាក្យអ្វីដែលត្រូវនិយាយឡើយបន្ទាប់ពីឮកូនស្រីនិយាយដាក់គាត់បែបនេះ ព្រោះទង្វើរបស់គាត់គ្មានអ្វីក្រៅតែពីចង់ឲ្យកូនមានអនាគត មានសុភមង្គល និងមិនចង់ឲ្យញាតិជិតខាងសើចពេបជ្រាយ រិះគន់ដល់ពូជពង្សវង្សត្រកូលតែប៉ុណ្ណោះ។
នៅព្រឹកកើតហេតុគាត់បានជិះរថយន្តតាក់ស៊ីចេញមកពីស្រុកកំណើតមកឈប់នៅមុខរោងចក្រដើម្បីនាំកូនស្រីគាត់ត្រឡប់ទៅផ្ទះវិញរស់នៅជួបជុំជាមួយគាត់រួម និងកូនស្រីម្នាក់ទៀតដែលកំពុងតែសិក្សាថ្នាក់ទី៩ និងបានជួយមើលថែជីដូនចាស់ជរាអាយុ៧៥ឆ្នាំនៅផ្ទះដែរ ។ ប៉ុន្តែពេលនោះកូនស្រីរូបនេះមិនព្រមទៅជាមួយឡើយដោយនិយាយនូវពាក្យខាងលើដាក់គាត់ថែមទៀត ហើយចោទប្រកាន់ថា គាត់ពង្រាត់ពីគូស្នេហ៏ភេទដូចគ្នាដើម្បីយកនាងទៅរៀបកាជាមួយបុរសផ្សេងទៅវិញ ។
នគរបាលបាននិយាយថា ខណៈនោះមានការភ្ញាក់ផ្អើលពេញមុខរោងចក្រហើយដោយខ្លាចមានអំពើហិង្សា កើតឡើងកម្លាំងនគរបាលប៉ុស្តិ៍ចោមចៅ១បានចុះទៅអន្តរាគមន៍ហៅទាំងម្ដាយទាំងកូនស្រីទៅប៉ុស្តិ៍ដើម្បីសម្រួលគ្នា ហើយខណៈនោះនាងដែលជាកូនបានជិះម៉ូតូជាមួយស្ត្រីដែលតែងខ្លួនជាប្រុសត្រូវជាគូកំណាន់ ។ លុះពេលទៅដល់ម្ដាយសុំឲ្យកូនស្រីត្រឡប់ទៅផ្ទះជាមួយតែកូននៅតែមិនព្រមដដែល ហើយដោយសារតែមិនអាចយកឈ្នះចិត្តកូនស្រីបានទើបស្ត្រីជាម្ដាយវិលត្រឡប់ទៅផ្ទះវិញទាំងទឹកភ្នែក និងការហួសចិត្ត ៕
កែសម្រួលដោយ ៖ សំណាង
ចែករំលែកព័តមាននេះ