ខេត្តសៀមរាប ៖ ភ្ញៀវទេសចរបរទេសដែលទៅទសុ្សនានៅតាមប្រាសាទនានាក្នុងខេត្តសៀមរាប ក៏ចាប់អារម្មណ៍ទៅតំបន់ជនបទជិះរទេះគោតាមភូមិទស្សនាដំណាំ ផ្សេងៗ និងទស្សនាសត្វស្លាបនៅតាមបឹងទន្លេសាប ។ តំបន់ពេញនិយមគឺសង្កាត់ជ្រាវ និងសង្កាត់សៀមរាប ។
នេះជាផ្នែកមួយនៃទេសចរណ៍ធម្មជាតិដែលត្រូវបានបង្កើតឡើងក្នុងគោលបំណងលើកកម្ពស់ផលិតផលកសិកម្ម ជាពិសេសប្រជាកសិករផ្សារភ្ជាប់ជាមួយភ្ញៀវទេសចរជាតិ និងអន្តរជាតិក្នុងការបង្កើនចំណូលបន្ថែមក្រៅពីប្រកបមុខរបរកសិកម្ម ។ ការបង្កើតទេសចរណ៍វិស័យនេះបានចូលរួមនៅក្នុងកំណើនសេដ្ឋកិច្ចជាតិតាមរយៈការបង្កើតឱកាសការងារ ការរកប្រាក់ចំណូល ការលើកកម្ពស់ជីវភាពរស់នៅ ការកាត់បន្ថយភាពក្រីក្រ ការអភិរក្សបេតិកភណ្ឌធម្មជាតិវប្បធម៌និងប្រវត្ដិសាស ្ដ្រនិងការចូលរួមកាត់បន្ថយការប្រែប្រួលអាកាសធាតុពិភពលោកផងដែរ ។
លោកគ្រួច លី ស្ថាបនិកភូមិកសិទេសចរធម្មជាតិនៅសង្កាត់ជ្រាវ និងសង្កាត់សៀមរាប នៃក្រុងសៀមរាប និងជាអ្នករៀបចំពលរដ្ឋក្នុងសង្កាត់ជ្រាវទាំងអស់ឱ្យយកចិត្តទុកដាក់លើវិស័យដឹកជញ្ជូនតាមរទេះគោបានឱ្យដឹងកាលពីពេល ថ្មីៗកន្លងមកថា រទេះគោខ្មែរនាបច្ចុប្បន្ននេះកំពុងទទួលបានការចាប់អារម្មណ៍ជាខ្លាំងពីភ្ញៀវទេសចរបរទេសសម្រាប់ជិះទស្សនាទិដ្ឋភាពបៃតងដែលជាប្រភេទដំណាំដាំដុះដោយមិនប្រើជាតិគីមី នៅក្នុងភូមិ និងនៅតំបន់ព្រៃលិចទឹកមួយចំនួន ។ ជាពិសេសការកម្សាន្តដោយជិះរទេះគោនេះមិនត្រឹមធ្វើឱ្យពួកគាត់មានអារម្មណ៍ភ្លឺថ្លាប៉ុណ្ណោះនោះទេ គឺធ្វើឱ្យពួកគាត់បានស្គាល់ពីវប្បធម៌ អរិយធម៌ និងប្រពៃណីទំនៀមទម្លាប់ខ្មែរនៅក្នុងតំបន់ជនបទនេះដែលមានតាំងពីបុរាណមកម្ល៉េះ ។
ប្រភពដដែលបន្តថា ការប្រើរទេះគោនេះ គឺជាផ្នែកមួយដែលមិនត្រឹមតែធ្វើឱ្យពលរដ្ឋកាត់បន្ថយការធ្វើចំណាកស្រុក គឺធ្វើឱ្យពួកគាត់មានជីវភាពគ្រួសារធូរធារប៉ុណ្ណោះទេ ប៉ុន្ដែវាថែមទាំងបានជួយដល់ការអភិរក្សរទេះគោខ្មែរសម្រាប់យុវជនជំនាន់ក្រោយបានស្គាល់ និងយល់ដឹងពីវប្បធម៌ដូនតារបស់ខ្មែរយើងពីជំនាន់មុនផងដែរ ។ តាមរយៈនេះសូមអំពាវនាដល់ស្ថាប័នពាក់ព័ន្ធរួមមានក្រសួងទេសចរណ៍ក្រសួងវប្បធម៌ជួយដឹកនាំភ្ញៀវ និងជួយអភិរក្សរទេះគោខ្មែរនេះឲ្យបានគង់វង្សជាយូរអង្វែង ។
ចំពោះវិស័យអេកូទេសចរណ៍ត្រូវបានរដ្ឋាភិបាលចាត់ទុកជាឧបករណ៍ដ៏មានប្រសិទ្ធភាពក្នុងការកាត់បន្ថយភាពក្រីក្រនៅតាមជនបទ តាមរយៈការពង្រីកសកម្មភាពទេសចរណ៍ទៅកាន់តំបន់ដាច់ស្រយាល ដើម្បីបង្កើតការងារនៅនឹងកន្លែងចូលរួមកាត់បន្ថយការចំណាកស្រុកពីជនបទទៅទីក្រុង ឬទៅក្រៅប្រទេស និងធានាឱ្យបាននូវកំណើនប្រកបដោយសមធម៌ ។
ការចូលរួមគាំទ្រពីសហគមន៍ ជាពិសេស គឺប្រជាជនក្នុងសហគមន៍តែម្តងក្នុងការជួយសម្រេចឱ្យបាននូវការអភិវឌ្ឍអេកូទេសចរ ហើយការអភិវឌ្ឍអេកូទេសចរនេះត្រូវតែបម្រើផលប្រយោជន៍សហគមន៍ជាមួយនឹងការបង្កើតប្រាក់ចំណូលដោយផ្ទាល់ និងមិនផ្ទាល់ទៅកាន់សហគមន៍ដូចជា ការផ្តល់ការងារ កាត់បន្ថយចំណាកស្រុក គឺបានន័យថា អភិវឌ្ឍន៍នៅនឹងកន្លែង ដើម្បីគាំទ្រដល់សហគមន៍ ។ អត្ថប្រយោជន៍នៃវិស័យទេសចរក្នុងការអភិវឌ្ឍសេដ្ឋកិច្ច និងសង្គមកិច្ចព្រោះ វិស័យនេះចូលរួមចំណែកយ៉ាងសំខាន់ក្នុងការអភិរក្សសម្បត្តិវប្បធម៌ ការការពារបរិស្ថាន និងធនធានធម្មជាតិរបស់ខ្មែរឱ្យបានគង់វង្ស ៕ (កែសម្រួលដោយ ៖ បុប្ផា)
ចែករំលែកព័តមាននេះ