រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរសជនជាតិបរទេសម្នាក់ដែលគេស្គាល់ថា ជាគ្រូបង្រៀនភាសាបរទេស ត្រូវបានសាច់ញាតិប្រទះឃើញអង្គុយស្លាប់នៅកាំជណ្ដើរផ្ទះស្នាក់នៅរបស់ខ្លួន បង្កឱ្យមានការភ្ញាក់ផ្អើលរាយការណ៍ទៅសមត្ថកិច្ចមូលដ្ឋានចុះមកត្រួតពិនិត្យភ្លាមៗ កាលពីម៉ោង២និង៣០នាទីរំលងអធ្រាត្រឈានចូលថ្ងៃទី២៦ ខែកក្កដា ឆ្នាំ២០១៩ នៅចំនុចផ្ទះលេខ 152E1 នៅតាមបណ្ដោយផ្លូវលេខ១៩ កែងនឹងផ្លូវលេខ១១០ ស្ថិតក្នុងសង្កាត់ផ្សារចាស់ ខណ្ឌដូនពេញ ។
សេចក្តីរាយការណ៍បន្តថា ជនរងគ្រោះខាងលើនេះត្រូវគេស្គាល់ថា ឈ្មោះ john harrison អាយុ57ឆ្នាំ ជាគ្រូបង្រៀន ស្នាក់នៅផ្ទះកន្លែងកើតហេតុ មានប្រពន្ធជាជនជាតិខ្មែរ និងមានកូនប្រុសម្នាក់អាយុ9ឆ្នាំ ។
តាមប្រភពពីសាច់ញាតិសពប្រាប់ឱ្យដឹងថា សពបុរសខាងលើជាបុរសញៀនស្រា គឺគាត់តែងតែផឹកស្រាស្រវឹងរាល់ថ្ងៃ។ ហើយកាលពីថ្ងៃអាទិត្យ ទី21 បុរសបរទេសនោះមិនដឹងថាមានរឿងអីនោះទេ បានលេបថ្នាំសរសៃប្រសាទអស់ចំនួន60គ្រាប់ បណ្តាលឲ្យពុលតែត្រូវក្រុមគ្រួសារឃើញទាន់ក៏នាំទៅសង្គ្រោះបន្ទាន់ភ្លាមៗនៅមន្ទីរពេទ្យកាល់ម៉ែតទាន់ពេលវេលា ។
ប្រភពដដែលបន្តថា លុះសម្រាកនៅពេទ្យបាន១យប់ព្រឹកឡើងស្រាប់តែជនបរទេសនោះលួចចេញពីពេទ្យរត់មកផ្ទះវិញ ហើយប្រពន្ធក៏មកតាមដល់ផ្ទះរករឿងឈ្លោះប្រកែកគ្នាតិចតួច បណ្តាលឱ្យមានការប្រវាយប្រតប់គ្នា ហើយបុរសជាជនបរទេសបានច្រាញប្រពន្ធគាត់បណ្តាលឱ្យដួលត្រូវជើងដែលប្រពន្ធគាត់ធ្លាប់មានគ្រោះថ្នាក់ចរាចរណ៍បាក់ធ្វើឱ្យឈឺឡើងវិញ ក៏ត្រូវសាច់ញាតិបញ្ជូនទៅសម្រាកព្យាបាលនៅមន្ទីរពេទ្យកាល់ម៉ែត ។ លុះនៅយប់កើតហេតុនេះ នៅផ្ទះមានតែបុរសបរទេស និងសាច់ញាតិខាងប្រពន្ធ ចំណែកប្រពន្ធគាត់កំពុងសម្រាកព្យាបាលជើងនៅមន្ទីរពេទ្យកាល់ ។
ប្រភពដដែលបន្តថា ហើយមុនមានការភ្ញាក់ផ្អើលនោះ គ្រួសារគាត់បានឃើញបុរសជនបរទេសនោះបើកទ្វារផ្ទះចេញមកក្រៅតែម្នាក់ឯង ទំនងដូចជាទៅទិញស្រា លុះដល់ម៉ោងកើតហេតុ ស្រាប់តែប្រទះឃើញអង្គុយស្លាប់នៅកាំជណ្ដើរឡើងផ្ទះដោយមិនដឹងមូលហេតុបង្កជាការភ្ញាក់ផ្អើលរាយការណ៍ទៅសមត្ថកិច្ចមូលដ្ឋានចុះមកត្រួតពិនិត្យភ្លាមៗនៅកន្លែងកើតហេតុ។
ក្រោយកើតហេតុ សពជនរងគ្រោះត្រូវសមត្ថកិច្ចមូលដ្ឋានហ៊ុមព័ទ្ធនៅកន្លែងកើតហេតុ រង់ចាំខាងជំនាញកោសល្យវិច្ឆ័យ មកពិនិត្យធ្វើកំណត់មូលហេតុនៃការស្លាប់របស់ជនបរទេសនោះ ៕ (កែសម្រួលដោយ ៖ បុប្ផា)
ចែករំលែកព័តមាននេះ