អធិការបតីអាល្លឺម៉ង់ លោកស្រីអេនចឺឡា ម័រកែល កាលពីថ្ងៃទី១៥ មីនា បានប្រកាសពីការបិទបណ្តោះអាសន្នរយៈពេល៣ខែនូវម៉ាស៊ីនរេអាក់ទ័រ នុយក្លេអ៊ែរ៧ ដែលចាស់ទៅហើយ រង់ចាំការពិនិត្យមើលឡើងវិញនូវបញ្ហាសុវត្ថិភាពទាក់ទិនទៅនឹងគ្រោះមហន្តរាយដោយការរញ្ជួយដីដ៏ខ្លាំងនៅប្រទេសជប៉ុន ។ លោកស្រីម័រកែល ថ្លែងថា «យើងកំពុងចាប់ផ្តើមពិនិត្យមើលឡើងវិញនូវបញ្ហាសុវត្ថិភាពនៃម៉ាស៊ីនរេអាក់ទ័រទាំងអស់ ដែលត្រូវដាក់ឱ្យដំណើរការចាប់តាំងពីចុងទសវត្សឆ្នាំ១៩៨០មក ដោយផ្អាកដំណើរការបណ្តោះអាសន្នរយៈពេល៣ខែសិន ។ ក្រោយពីការផ្អាករហូតដល់ថ្ងៃទី១៥ មិថុនា ខាងមុខ យើងនឹងបន្តដំណើរការទៀត» ។
ប្រទេសអាល្លឺម៉ង់បានសម្រេចបិទម៉ាស៊ីនរេអាក់ទ័រនុយក្លេអ៊ែរទាំង៧នោះ ក្រោយពីមានការផ្ទុះជាបន្តបន្ទាប់នៅរោងចក្រថាមពលនុយក្លេអ៊ែររបស់ប្រទេសជប៉ុនដោយសារការរញ្ជួយដីដ៏មានឥទ្ធិពលកម្រិត៩រីស្ទ័រ ញ៉ាំងឱ្យលិចធ្លាយវិទ្យុសកម្មកម្រិតខ្ពស់បង្កគ្រោះថ្នាក់ដល់សុខភាពមនុស្ស ៕
ចែករំលែកព័តមាននេះ