ការមានចិត្តអំណត់អត់ធ្មត់ គឺជាគុណតម្លៃដ៏ថ្លៃថ្លាមួយសម្រាប់មនុស្សម្នាក់ៗ ។ វាជួយឲ្យមនុស្សជោគជ័យក្នុងការងារក្លាយជាឪពុកម្តាយ និងដៃគូជីវិតដ៏ល្អ ព្រមទាំងជៀសវាងជម្លោះក្នុងគ្រប់ផ្នែកនៃជីវិតផងដែរ ។ លើសពីនេះទៅទៀតការអត់ធ្មត់ដើរតួយ៉ាងសំខាន់ក្នុងការជួយឲ្យមនុស្សសន្សំលុយផងដែរ ព្រោះតែមូលហេតុខាងក្រោមនេះ ៖
១. អ្នកមានពេលមើលការវាយតម្លៃរបស់អតិថិជនដទៃ
អតិថិជនដែលធ្វើការសម្រេចចិត្តទិញបន្ទាប់ពីមានការស្រាវជ្រាវច្បាស់លាស់ គឺជាអតិថិជនដែលវៃឆ្លាត ។ ការអត់ធ្មត់ជួយឲ្យអតិថិជនមានឱកាសក្នុងការប្រៀបធៀបតម្លៃ និងការវាយតម្លៃរបស់អតិថិជនដទៃដែលធ្លាប់ទិញទំនិញ ឬប្រើសេវាដែលអ្នកចង់សាកល្បង ។
ការធ្វើដូច្នេះជួយឲ្យអ្នកជៀសផុតពីការចំណាយលើផលិតផល ឬសេវាកម្មណាមួយក្នុងតម្លៃខ្ពស់ជាងតម្លៃលើទីផ្សារ និងជួយឲ្យអ្នកជ្រើសយកផលិតផល និងសេវាកម្មដែលល្អបំផុតលើទីផ្សារផងដែរ ។
២. អ្នកមានពេលសម្រេចចិត្តថា អ្នកពិតជាត្រូវការវា ឬទេ
អ្នកត្រូវដឹងថា មនុស្សជាច្រើនសម្រេចចិត្តចាយវាយលើអ្វីមួយ ព្រោះតែអារម្មណ៍ចង់បានតែមួយពេល ឬបន្ទាប់ពីឃើញអ្នកដទៃប្រើ ឬការផ្សាយពាណិជ្ជកម្មផ្សេងៗទាំងដែលខ្លួនមិនត្រូវការ ។ អតិថិជនដែលមិនមានចិត្តអត់ធ្មត់ធ្វើការសម្រេចចិត្តទិញតាមតែចិត្តចង់ដោយមិនមានការគិតគូរពិចារណាច្បាស់លាស់ជាមុនសិនថា ខ្លួនពិតជាត្រូវការផលិតផល ឬសេវាកម្មដែលខ្លួនចង់បានឬទេ ។
៣. អ្នកមានពេលស្វែងរកជម្រើសដទៃ
ចូរចងចាំថាទីផ្សារយើងមានផ្តល់ជម្រើសជាច្រើនដល់អ្នក ដូច្នេះអ្នកមិនចាំបាច់ប្រញាប់សម្រេចចិត្តទិញផលិតផល ឬសេវាកម្មណាមួយឡើយ ។ ភាពអត់ធ្មត់អាចជួយឲ្យអ្នកមានពេលក្នុងការស្រាវជ្រាវ និងស្វែងរកជម្រើសដទៃដែលអាចនឹងល្អជាងអ្វីដែលអ្នកចង់បានពីដំបូង ។
៤. អ្នកអាចរង់ចាំរហូតមានសេរ៊ី និងម៉ូដថ្មី
ផលិតផលជាច្រើនដែលមានលើទីផ្សារតែងតែមានការចុះថ្លៃពេលដែលម៉ូដថ្មីត្រូវបានចេញលក់លើទីផ្សារ ។ ឧទាហរណ៍ដូចជា ទូរស័ព្ទដៃស្មាតហ្វូនជាដើម ដែលតែងតែធ្លាក់ថ្លៃពេលដែលម៉ូដថ្មីមានលើទីផ្សារ ។ សម្លៀកបំពាក់ និងសម្ភារប្រើប្រាស់ដទៃក៏ស្រដៀងគ្នាដែរ ដោយអ្នកលក់ភាគច្រើនមានការលក់លាងឃ្លាំងមុនពេលយកឥវ៉ាន់ថ្មីមកដល់ជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ