លោកចែក ម៉ា (Jack Ma) ដែលជាអាជីវករជោគជ័យមួយរូបបាននិយាយ ពីរឿងសម្ងាត់នៃភាពជោគជ័យ របស់លោក ដែលដំបូងមិនមានចំណេះអ្វីទាំងអស់ទាក់ទងនឹងបច្ចេកវិទ្យា ។ លោកបានចែករំលែកថា «ពីដំបូង ខ្ញុំមិនមានចំណេះដឹងទាល់តែសោះទាក់ទិននឹងបច្ចេកវិទ្យា ។ ខ្ញុំក៏មិនដឹងពីការគ្រប់គ្រងដែរ ។ ប៉ុន្តែអ្នកមិនចាំបាច់ត្រូវចេះដឹងគ្រប់សព្វបែបយ៉ាងទេ ។ អ្នកគ្រាន់តែត្រូវរកមនុស្សដែលឆ្លាតជាងអ្នកប៉ុណ្ណោះ ។ ជាច្រើនឆ្នាំមកនេះ ខ្ញុំតែងតែព្យាយាមរកមនុស្សដែលឆ្លាតវៃជាងខ្ញុំ។»
លោកបានបន្តថា «ពេលដែលរកបានមនុស្សឆ្លាតវាងវៃជាច្រើនហើយ ការងាររបស់ខ្ញុំ គឺធានាថា មនុស្សដែលឆ្លាតវាងវៃទាំងនោះអាចធ្វើការសហការគ្នាបានល្អ។» គ្រប់ក្រុមការងារតែងតែមានមនុស្សដែលមានគំនិតខុសគ្នាមានទម្លាប់ធ្វើការខុសគ្នា និងមានវិធីសម្រេចកិច្ចការដែលមានខុសគ្នាផងដែរ ប៉ុន្តែអ្នកដែលឆ្លាតវាងវៃ និងមានបទពិសោធន៍ក៏យកអំនួតជាប់ខ្លួនដែរ ។ ព្រោះតែពួកគេធ្លាប់បានជោគជ័យពីមុនមក បុគ្គលទាំងនេះមានការលំបាកក្នុងការគាំទ្រគំនិតអ្នកដទៃ ។ ពេលខ្លះទៀតសមាជិកក្រុមថែមទាំងចាត់ទុកគ្នាជាដៃគូប្រកួតប្រជែងទៅទៀត ។
ប៉ុន្តែអ្នកគ្រប់គ្រងដែលល្អអាចជួយឲ្យសមាជិកក្រុមធ្វើការជាមួយគ្នាបានដោយរលូន ។ អ្នកគ្រប់គ្រងដែលល្អដឹងច្បាស់ពីចំណុចខ្លាំង និងខ្សោយនៃសមាជិកក្រុមរបស់ពួកគេ ។ អ្នកគ្រប់គ្រងដែរល្អយល់ដឹងពីស្ថានការដែលនឹងបង្កឲ្យមានជម្លោះ និងមានជំនាញក្នុងការដឹកនាំក្រុមឲ្យឆ្លងផុតវាផងដែរ ។ លើសពីនេះទៅទៀតពួកគេដឹងថា ជម្លោះមិនតែងតែមិនល្អទាំងស្រុងទេ បើសិនពួកគេគ្រប់គ្រងបានល្អ ។
អ្នកគ្រប់គ្រងដែលល្អជំរុញដល់សមាជិកក្រុមឲ្យអាចសម្រេចបានលទ្ធផលដែលល្អបំផុត ។ អ្នកគ្រប់គ្រងដែលល្អដឹងពីវិធីក្នុងការផ្តល់ជាយោបល់ ដើម្បីជួយឲ្យសមាជិកក្រុមអាចបន្តលូតលាស់បាន ។ លើសពីនេះទៅទៀត អ្នកគ្រប់គ្រងដែលល្អដឹងពីវិធីក្នុងការកសាងជំនឿចិត្ត ។ ប្រាកដណាស់ វាមិនងាយទេ ក្នុងការក្លាយជាទៅជាអ្នកគ្រប់គ្រងដែលល្អម្នាក់ ។ អ្នកត្រូវការភាពអត់ធ្មត់ និងចំណេះដឹង EQ ឬ Emotional Intelligence ។
ដូច្នេះប្រសិនបើអ្នកចង់គ្រប់គ្រងក្រុមការងារមួយឲ្យបានប្រសិទ្ធភាពខ្ពស់ អ្នកត្រូវទទួលស្គាល់ថា អ្នកប្រហែលជាមិនមែនជាមនុស្សឆ្លាងវាងវៃជាងគេទេ ប៉ុន្តែអ្នកក៏មិនចាំបាច់ធ្វើជាមនុស្សដែលឆ្លាតជាងគេដែរ ។ អ្នកគួរតែផ្តោតស្មារតីក្នុងការធ្វើឲ្យអ្នកដែលឆ្លាតវាងវៃ និងមានសមត្ថភាពអាចធ្វើការ ដើម្បីសម្រេចបានលទ្ធផលឲ្យអ្នកវិញ៕ កែសម្រួលដោយ ៖ សុឃាក់
ចែករំលែកព័តមាននេះ