រាជធានីភ្នំពេញ ៖ សេចក្តីរាយការណ៍បឋម កោះសន្តិភាពបានធ្វើការចុះផ្សាយរួចមកហើយអំពីសកម្មភាពរបស់កម្លាំងអាជ្ញាធរខណ្ឌពោធិ៍សែនជ័យចុះទៅត្រួតពិនិត្យ និងផ្អាកដំណើរការសាងសង់សំណង់បុរីផ្ទះល្វែង «គឹម ធី» ដែលមានទីតាំងស្ថិតនៅក្នុងភូមិកាកាប សង្កាត់កាកាប២ ខណ្ឌពោធិ៍សែនជ័យ…
រាជធានីភ្នំពេញ ៖ សេចក្តីរាយការណ៍បឋម កោះសន្តិភាពបានធ្វើការចុះផ្សាយរួចមកហើយអំពីសកម្មភាពរបស់កម្លាំងអាជ្ញាធរខណ្ឌពោធិ៍សែនជ័យចុះទៅត្រួតពិនិត្យ និងផ្អាកដំណើរការសាងសង់សំណង់បុរីផ្ទះល្វែង «គឹម ធី» ដែលមានទីតាំងស្ថិតនៅក្នុងភូមិកាកាប សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ កាលពីវេលាម៉ោង១០ព្រឹក ថ្ងៃទី២៤ ខែកក្កដា ឆ្នាំ២០១៩ ។
សេចក្តីរាយការណ៍បានបន្ត ដោយការផ្អាកមិនឲ្យសាងសង់បន្តនេះត្រូវបានអាជ្ញាធរប្រាប់ថាបានត្រួតពិនិត្យឃើញថា សំណង់ខាងលើមានចំនួន២០៩ល្វែង ដែលកំពុងសាងសង់គ្មានច្បាប់ត្រឹមត្រូវ ទើបអាជ្ញាធរសម្រេចឃាត់បណ្ដោះអាសន្ន ដើម្បីឲ្យម្ចាស់សុំច្បាប់ឲ្យបានត្រឹមត្រូវសិន ។ ក្រោយពេលមានការចុះផ្សាយនូវព័ត៌មានខាងលើ តំណាងម្ចាស់បុរីមួយនេះបានចេញមកបកស្រាយភ្លាមៗដែរ ដោយអះអាងថា បុរីមានច្បាប់អនុញ្ញាតត្រឹមត្រូវ ហើយការបកស្រាយនេះ គឺជាការពិត និងដើម្បីកុំឲ្យអតិថិជនដែលទិញផ្ទះពីបុរីរបស់ខ្លួនក៏ដូចជា មហាជនទាំងអស់មានការយល់ច្រឡំថា បុរីគ្មានច្បាប់ និងនាំឲ្យអតិថិជនមានការព្រួយបារម្ភចំពោះរឿងនេះ ។
តំណាងរូបនេះបានបញ្ជាក់ថា មុននឹងសាងសង់បង្កើតនូវបុរី «គឹម ធី» នេះលោកសុខ សម្បត្តិ ដែលជាម្ចាស់បុរីបានសុំច្បាប់ទៅអាជ្ញាធរខណ្ឌ និងសង្កាត់ត្រឹមត្រូវរួចរាល់ហើយ ទើបដំណើរការ មិនមែនចេះតែធ្វើអ្វីៗ ដោយលោតឆ័ត្រនោះឡើយ ។ បន្ទាប់មកអាជ្ញាធរបានអនុញ្ញាតច្បាប់ឲ្យ ដោយខាងសាលាខណ្ឌពោធិ៍សែនជ័យចុះហត្ថលេខា ដោយអភិបាលខណ្ឌហែម ដារិទ្ធិ លេខ១៤២ ចុះថ្ងៃទី០១ ខែមេសា ឆ្នាំ២០១៦ និងសាលាសង្កាត់កាកាបចុះហត្ថលេខាដោយលោកចៅសង្កាត់ សុខ អ៊ែល លេខ២០៩៦/២០១៦ចុះថ្ងៃទី០១ ខែមសា ឆ្នាំ២០១៦ ដែលបានអនុញ្ញាតឲ្យលោក សុខ សម្បត្តិ ធ្វើការសាងសង់ផ្ទះចំនួន១៥០ល្វែង ។
ប្រភពដដែលបានបន្តថា ក្រោយពីទទួលបានការអនុញ្ញាតក្រុមហ៊ុនបានធ្វើការសាងសង់រហូតមកដល់ពេលនេះថ្វីដ្បិតតែក្រុមហ៊ុនបានសាងសង់លើសពីច្បាប់អនុញ្ញាតខ្លះមែន ប៉ុន្តែពុំមែនមានន័យថា ល្មើសច្បាប់នោះទេ ។ គឺក្រុមហ៊ុនកំពុងរត់ការសុំច្បាប់បន្ថែមទៀត ប៉ុន្តែដោយសារតែតម្រូវការរបស់អតិថិជនដែលមានការប្រញាប់ក្នុងការទទួលបានផ្ទះ ហើយសំអាងថា មានច្បាប់ស្រាប់ផងនោះ ទើបក្រុមហ៊ុនធ្វើការសាងសង់បណ្ដើរ និងរត់សុំច្បាប់បណ្ដើរ ហើយគ្រាន់តែច្បាប់មិនទាន់ធ្លាក់មកតែប៉ុណ្ណោះទេ ដូច្នេះសូមអតិថិជនរបស់បុរី គឹមធី ទាំងអស់កុំមានការយល់ច្រឡំ ឬព្រួយបារម្ភអីសូមទុកចិត្តលើបុរីចុះ ៕ កែសម្រួលដោយ ៖ សុឃាក់
ចែករំលែកព័តមាននេះ