ខេត្តបាត់ដំបង៖ មុខសញ្ញាចោរប្លន់នៅស្រុកបាណន់ កាលពីចុងខែឧសភា កន្លងទៅថ្មីៗនេះ ដែលនៅសេសសល់ម្នាក់ ពេលនេះ ត្រូវកម្លាំងផ្នែកអនុវត្ថដីកាចាប់ខ្លួនបានហើយ កាលពីវេលាម៉ោង០១និង៣០នាទីរំលងអធ្រាត្រឈានចូលថ្ងៃទី២៤ កក្កដា ខណៈជនត្រូវចោទរូបនេះ កំពុងរាំគ្រវីយ៉ាងសប្បាយនៅក្នុងក្លិបឌីស្កូមួយកន្លែង ស្ថិតក្នុងក្រុងបាត់ដំបង ។ សូមរំលឹកថា៖ ក្រសួងមហាផ្ទៃឱ្យស្នងការខេត្តបាត់ដំបង ត្រូវមើលឡើងវិញ«ចោរប្លន់»នៅបាណន់
លោកកង សុផាន់ណា នាយរងការិយាល័យព្រហ្មទណ្ឌកំរិតធ្ងន់ ទទូលកន្ទុកផ្នែកអនុវត្តដីកា បានឲ្យដឹងថា ជនត្រូវចោទរូបនេះឈ្មោះចេក ចម ប្រុសអាយុ២១ឆ្នាំ រស់នៅភូមិបបុះ ឃុំឈើទាល ស្រុកបាណន់។ ជននេះត្រូវបានចាប់ខ្លួន តាមដីការបស់ចៅក្រមស៊ើបសួរ នៃសាលាដំបូងខេត្ត ដែលពាក់ព័ន្ធនឹងអំពើ«ប្លន់» កាលពីចុងខែឧសភា កន្លងទៅថ្មីៗនេះ នៅឃុំឈើទាល ស្រុកបាណន់ ខណៈដែលបក្សជននេះម្នាក់ត្រូវចាប់ខ្លួនដំបូង បន្ទាប់ពីកើតហេតុបានជាង១សប្ដាហ៍ ។ លោកបានបញ្ជាក់ថា ជននេះបានព្យាយាមគេចខ្លួនមួយរយៈនេះ ទៅកាន់រាជធានីភ្នំពេញ លុះត្រឡប់មកវិញ បង្ហាញមុខក្នុងក្លិបរាត្រី ទើបត្រូវចាប់ខ្លួនតែម្ដង។
សូមរំលឺកថា កាលពីវេលាម៉ោងជិត១០យប់ថ្ងៃទី៣០ឧសភាកន្លងទៅនេះ នារីម្នាក់ឈ្មោះនឿន សុខា អាយុ២៨ឆ្នាំ រស់នៅភូមិថ្កូវ ឃុំឈើទាល ស្រុកបាណន់ ត្រូវជនមិនស្គាល់មុខចំនួន២នាក់ជិះម៉ូតូទៅភ្ជង់.កដល់ខាងមុខផ្ទះនាងដោយកាំបិតចុងស្រូច ហើយបាន«ប្លន់» យកខ្សែ.កប្លាទីន១ខ្សែទម្ងន់៥ជី រួចជិះម៉ូតូគេចខ្លួនដោយសុវត្ថិភាពមិនរំខានសមត្ថកិច្ចមូលដ្ឋានឡើយ ខណៈនាងនិងម្ដាយកំពុងចាក់សោរបើកទ្រវាចូលផ្ទះ ។ (សម្រួលដោយ៖ ស្រីណា)
ចែករំលែកព័តមាននេះ