រាជធានីភ្នំពេញ ៖ អូស្ត្រាលីបានកោតសរសើរកម្ពុជាក្នុងពង្រីកវិសាលភាពគួរឲ្យកត់សម្គាល់លើវិស័យហេដ្ឋារចនាសម្ព័ន្ធសំណង់ ។ នេះបើតាមលោកស្រីឯកអគ្គរដ្ឋទូតអូស្ត្រាលី ក្នុងជំនួបពិភាក្សាជាមួយលោកគួច ចំរើន អភិបាលនៃគណៈអភិបាលខេត្តព្រះសីហនុ ។ យោងតាមបណ្តាញសង្គមរបស់រដ្ឋបាលខេត្តព្រះសីហនុបានឲ្យដឹងថា…
រាជធានីភ្នំពេញ ៖ អូស្ត្រាលីបានកោតសរសើរកម្ពុជាក្នុងពង្រីកវិសាលភាពគួរឲ្យកត់សម្គាល់លើវិស័យហេដ្ឋារចនាសម្ព័ន្ធសំណង់ ។ នេះបើតាមលោកស្រីឯកអគ្គរដ្ឋទូតអូស្ត្រាលី ក្នុងជំនួបពិភាក្សាជាមួយលោកគួច ចំរើន អភិបាលនៃគណៈអភិបាលខេត្តព្រះសីហនុ ។ យោងតាមបណ្តាញសង្គមរបស់រដ្ឋបាលខេត្តព្រះសីហនុបានឲ្យដឹងថា ក្នុងជំនួបកាលពីរសៀលថ្ងៃទី២៤ ខែកក្កដា លោកស្រី អេនជីឡា ខូខូរាន អគ្គរដ្ឋទូតនៃស្ថានទូតអូស្ត្រាលីប្រចាំព្រះរាជាណាចក្រកម្ពុជាបានលើកឡើងថា ខេត្តព្រះសីហនុបានធ្វើបច្ចុប្បន្នភាពក្នុងការពង្រីកវិសាលភាពគួរឲ្យកត់សម្គាល់លើផ្នែកហេដ្ឋារចនាសម្ព័ន្ធសំណង់ ទន្ទឹម និងនេះលោកជំទាវក៏ចង់ដឹងពីការប្រឈមចំណុចអាទិភាពរបស់ខេត្ត និងការអភិវឌ្ឍថ្មី ។
ក្នុងនាមស្ថានទូត និងរដ្ឋាភិបាលអូស្ត្រាលី សូមចូលរួមរំលែកទុក្ខចំពោះប្រជាជនកម្ពុជាដែលបានរងគ្រោះដោយសារការរលំបាក់អគារនៅខេត្តព្រះសីហនុ កាលពីខែមិថុនាកន្លងមកថ្មីៗនេះ ។ លោកស្រីបានបញ្ជាក់ថា ដោយមើលឃើញពីការរីកចម្រើនលើវិស័យសំណង់ ពិសេសស្តង់ដាគុណភាពសំណង់ កន្លងមកលោកស្រីបានជួបលោក ជា សុផារ៉ា ទេសរដ្ឋមន្ដ្រី រដ្ឋមន្ត្រីក្រសួងដែនដី ពិភាក្សាពង្រឹងគុណភាពសំណង់ ដោយយល់ព្រមបង្កើតកម្មវិធីរួមមួយជួយផ្នែកបច្ចេកទេសដល់ក្រសួងដែនដី និងអាជ្ញាធរខេត្តយើងនឹងដំណើរការសាកល្បង មុនគេនៅខេត្តព្រះសីហនុ ។
ជាមួយគ្នានោះដែរ លោកស្រីក៏បានឲ្យដឹងថា ប្រទេសអូស្ត្រាលី និងកម្ពុជាមានទំនាក់ទំនង ៦៥ឆ្នាំ លើកិច្ចសហប្រតិបត្តិការជួយអភិវឌ្ឍ ផ្នែកសន្តិសុខក្នុងតំបន់វិស័យការពារជាតិ ពាណិជ្ជកម្ម ផ្នែកអភិវឌ្ឍន៍សេដ្ឋកិច្ច ហេដ្ឋារចនាសម្ព័ន្ធ ដោះមីន កម្មវិធីទាំងនេះមានក្នុងខេត្តព្រះសីហនុផងដែរ ។ មានគម្រោងសមធម៌ សុខាភិបាលដល់មន្ទីរពេទ្យខេត្តជួយក្រសួងផែនការ ក្នុងការកំណត់អត្តសញ្ញាណកម្មជួយប្រជាពលរដ្ឋក្រីក្រ និងបានផ្តល់អាហារូបករណ៍ដល់និស្សិតផ្តល់ជំនួយដល់អង្គការនៅខេត្តព្រះសីហនុ (អង្គការម្លប់តាប៉ាង ) និងគម្រោងជួយកុមារពីការរំលោភបំពាន និងកេងប្រវ័ញ្ច ។ កិច្ចសហប្រតិបត្តិការរបស់សហព័ន្ធអូស្ត្រាលីជួយលើផ្នែកលិខិតឆ្លងដែន គ្រឿងញៀន ផ្តល់ការហ្វឹកហ្វឺនដល់ប៉ូលិស ជំនួយផ្នែកយោធាដល់មូលដ្ឋានកងទ័ពជើងទឹករាម សង់រោងជាង ថែទាំបច្ចេកទេស អគារសម្ភារៈ ជួយដល់គណកម្មការជាតិសន្តិសុខ លម្ហសមុទ្រលើផ្នែកព័ត៌មានវិទ្យាផ្តល់អគារធ្វើការបណ្តុះបណ្តាលភាសារអង់គ្លេសជាដើម ។
ចំណែកលោកគួច ចំរើន អភិបាលខេត្តព្រះសីហនុបានអំណរគុណរដ្ឋាភិបាលអូស្ត្រាលី ដែល បានចូលរួមរំលែកទុក្ខប្រជាជនកម្ពុជា និងជំរាបជូនពីបញ្ហាប្រឈមមានដូចជា ផ្លូវថ្នល់ លូទឹកកខ្វក់ និងអនាម័យ បរិស្ថាន (សំរាម) បច្ចុប្បន្នខេត្តព្រះសីហនុប្រែមុខមាត់ទៅជាខេត្តពាណិជ្ជកម្មដឹកជញ្ជូន កាស៊ីណូ និងទេសចរណ៍ ដែលតម្រូវឱ្យមានហេដ្ឋារចនាសម្ពន្ធ័ល្អ ។ លោកបន្តថា ការអភិវឌ្ឍយ៉ាងគំហុកបង្កឱ្យខូចខាតផ្លូវថ្នល់ និងគ្រោះថ្នាក់ចរាចរណ៍ រដ្ឋបាលខេត្តបានកៀរគរគ្រប់ស្ថាប័នពាក់ព័ន្ធ និងវិស័យឯកជនចូលរួមកែលម្អបរិស្ថាន និងសោភ័ណភាព ដោយសារតែកំណើនប្រជាពលរដ្ឋមានការកើនឡើងមកពីបណ្តាខេត្តនានាក្នុងព្រះរាជាណាចក្រកម្ពុជាមករកស៊ីទទួលទានតាមសមត្ថភាព ម្យ៉ាងទៀតក្រោយពេលសំណង់ត្រូវបានសាងសង់រួចខេត្តព្រះសីហនុ ត្រូវការកម្លាំងពលកម្មកាន់តែច្រើន ហើយបញ្ហាទឹកកខ្វក់ បរិស្ថានមានបញ្ហាប្រឈម ចាប់ពីពេលនេះ រហូតទៅអនាគតការគ្រប់គ្រងទឹកកខ្វក់តាមបច្ចេកទេស ។
លោកគូសបញ្ជាក់ថា រដ្ឋធម្មនុញ្ញនៃព្រះរាជាណាចក្រកម្ពុជាមិនប្រកាន់និន្នាការ នយោបាយ មិនថា ចិន អាមេរិក បារាំង ឬប្រទេសណាទេ កម្ពុជានឹងស្វាគមន៍ទទួលយកអ្នកវិនិយោគ និងទេសចរណ៍មកពីគ្រប់ទិសទីមកកាន់ខេត្តព្រះសីហនុ ក៏ប៉ុន្តែអ្នកវិនិយោគ និងអ្នកទេសចរត្រូវតែគោរពច្បាប់កម្ពុជា ៕ កែសម្រួលដោយ ៖ សុឃាក់
ចែករំលែកព័តមាននេះ