ខេត្តបាត់ដំបង ៖ ដូចជាគ្មានប្រសិទ្ធភាពក្នុងការទប់ស្កាត់រាល់អំពើបំពានច្បាប់សាងសង់ផ្ទះល្វែងនៅផ្សារ១៣មករា សង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបង ទាល់តែសោះ ខណៈបាននិងកំពុងសាងសង់រំលោភខុសពីការអនុញ្ញាតសាងសង់ជិត២ឆ្នាំមកហើយ ។
លោកអ៊ូ ដារី ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តបាត់ដំបង បានចេញលិខិតផ្អាកតាំងពីថ្ងៃទី៣០ សីហា ឆ្នាំ២០១៧ និងយោងតាមកំណត់ហេតុចុះថ្ងៃទី០៤ មិថុនា ឆ្នាំ២០១៩ របស់ក្រុមការងារត្រួតពិនិត្យរដ្ឋបាលក្រុងបាត់ដំបងរួចមក លោកផេង សិទ្ធី អភិបាលក្រុងបាត់ដំបងបានចេញលិខិតផ្អាកសាងសង់ជាបន្តទៀត នៅថ្ងៃទី១០ មិថុនា ឆ្នាំ២០១៩ បន្ថែមទៀត តែម្ចាស់សំណង់នោះ មិនព្រមទទួលផ្អាកការសាងសង់សោះឡើយ មានតែលួចធ្វើ ផ្គើននិងលិខិតផ្អាកនោះ ហើយថែមទាំងបំពានធ្វើបន្ថែមដោយគ្មាខ្លាច និងគោរពច្បាបអ្វីបន្តិចសោះឡើយ ។
លិខិតផ្អាកការសាងសង់បានប្រកាស់ឲ្យសាម៉ីខ្លួនបានដឹង និងទៅបិទនៅកន្លែងកំពុងសាងសង់ ដែលចេញដោយរដ្ឋបាលខេត្តបាត់ដំបង តាមក្នុងរបាយការណ៍លេខ២៧ដន ចុះថ្ងៃទី២២ខែសីហា ឆ្នាំ២០១៧ ស្តីពីការចុះពិនិត្យសំណង់ និងសម្របសម្រួលការប្រើប្រាស់ជញ្ជាំងអឌ្ឍសិទ្ធិ របស់ការិយាល័យរៀបចំដែនដី និងនគរូបនីយកម្មខេត្តបាត់ដំបង បានជូនដំណឹងប្រាប់ទៅលោក ពឹង ហ៊ុយលាង ជាម្ចាស់សំណង់ ដែលមានទីតាំងស្ថិតនៅលើក្បាលដីលេខ ២៤៣ ភូមិ១៣មករា សង្កាត់ព្រែកព្រះស្តេច ក្រុងបាត់ដំបង ដែលបាននឹងកំពុងសាងសង់ ខុសពីលិខិតអនុញ្ញាតសាងសង់ដែលចេញដោយរដ្ឋបាលខេត្តបាត់ដំបង ដូច្នេះការដ្ឋានសំណង់កំពុងសាងសង់របស់លោកពឹង ហ៊ុយលាង ត្រូវផ្អាកការសាងសង់ លុះត្រាតែធ្វើការកែសម្រួលតាមប្លង់ស្ថាបត្យកម្មដែលបានអនុញ្ញាតទើបមានសិទ្ធសាងសង់ជាបន្តទៅទៀត ក្នុងករណីការដ្ឋានសំណង់នេះមិនផ្អាកតាមការកំណត់ទេ ម្ចាស់សំណង់ផ្ទះត្រូវទទួលទោសចំពោះមុខច្បាប់ ។
លោក សុង ហួត និងអ្នកស្រីស៊ុន ឡាច បានបញ្ជាក់ថា ដីខ្ញុំនៅកណ្តាលជាអ្នករងគ្រោះ ព្រោះសុំការសាងសង់តែមិនអនុញ្ញាតដែលមានទីតាំងដីឡូតិ៍លេខ២៤២ ប្រឡោះដីឡូតិ៍លេខ២៤១ និង២៤៣ ត្រូវបានគេសាងសង់ទាំងសងខាងដែលមានបង្កាន់ដៃកាន់កាប់ត្រឹមត្រូវដូចគ្នា ហើយមានទទឹង៤,៤០ម៉ែត្រ ដល់គេធ្វើសងខាងអស់ទៅ ឥឡូវដីត្រួវរួញតូចនៅសល់ទទឹងតែ៤,១០ម៉ែត្រតែប៉ុណ្ណោះ ហើយមិនទាន់ចេញច្បាប់ឲ្យសាងសង់ទៀត ចំពោះអ្នកដែលសាងសង់ខុសច្បាប់បំពានបានចេះតែធ្វើទៅ ទោះបីមានការហាមឃាត់តាំងពីសំណង់សាងសង់បានប្រមាណ២០% រហូតដល់ពេលនេះ ធ្វើបានប្រមាណ៨០%ទៅហើយក្តី ក៏គ្មានសមត្ថកិច្ចណាចេញមកអន្តរាគមន៍ហាមឃាត់ដែរ គឺចេញតែក្រដាស់ផ្អាកការសាងសង់ តែសកម្មភាពនៅតែមានលួចធ្វើដដែល ព្រោះម្ចាស់សំណង់នេះបានរត់ការក្រៅច្បាប់ និងអាងខ្សែ អ្នកមានលុយ មានអំណាចនៅពីក្រោយផងទើបគ្មានសមត្ថកិច្ចទាំងសាលាក្រុង និងរដ្ឋបាលខេត្តមិនហ៊ានចុះមកហាមឃាត់ទៀតដែរ តែអ្វីៗគឺខុសច្បាប់ទាំងស្រុង ។ (សម្រួលដោយ៖ ស្រីណា)
ចែករំលែកព័តមាននេះ