រាជធានីភ្នំពេញ ៖ សំណង់ផ្ទះល្វែងមួយកន្លែងរបស់«បុរី គឹម ធី» ដែលកំពុងដំណើរការសាងសង់យ៉ាងមមារញឹក រហូតដល់ទៅជាង២០០ល្វែង ហើយល្វែងខ្លះសាងសង់ជិតរួចរាល់ជាស្ថាពរ និងខ្លះទៀតសាងសង់បាន៧០ទៅ៨០ភាគរយទៅហើយនោះត្រូវបានអាជ្ញាធរខណ្ឌពោធិ៍សែជ័យចុះធ្វើការត្រួតពិនិត្យ និងរកឃើញថា…
រាជធានីភ្នំពេញ ៖ សំណង់ផ្ទះល្វែងមួយកន្លែងរបស់«បុរី គឹម ធី» ដែលកំពុងដំណើរការសាងសង់យ៉ាងមមារញឹក រហូតដល់ទៅជាង២០០ល្វែង ហើយល្វែងខ្លះសាងសង់ជិតរួចរាល់ជាស្ថាពរ និងខ្លះទៀតសាងសង់បាន៧០ទៅ៨០ភាគរយទៅហើយនោះត្រូវបានអាជ្ញាធរខណ្ឌពោធិ៍សែជ័យចុះធ្វើការត្រួតពិនិត្យ និងរកឃើញថា អត់មានច្បាប់អនុញ្ញាត្រឹមត្រូវឡើយ ។
បន្ទាប់មកអាជ្ញាធរបានសម្រេចផ្អាកសកម្មភាពមិនឲ្យសាងសង់បន្តទៀតទេ ព្រមទាំងបានធ្វើលិខិតមួយទៅកាន់ម្ចាស់ទីតាំងបុរីផ្ទះល្វែងមួយនេះ បង្គាប់ឲ្យផ្អាកសកម្មភាព និងសុំច្បាប់អាជីវកម្មឲ្យបានត្រឹមត្រូវជាមុនសិនទើបអនុញ្ញាតឲ្យមានការសាងសង់បន្តទៀត បើមិនដូច្នោះទេ មិនឲ្យដំណើរតទៅទៀតឡើយ ។
បុរីផ្ទះល្វែង«គឹម ធី» ខាងលើនេះមានទីតាំងស្ថិតនៅក្នុងភូមិកាកាប សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ ហើយត្រូវបានអាជ្ញាធរខណ្ឌពោធិ៍សែនជ័យដឹកនាំដោយលោកអភិបាលរងខណ្ឌ ប៉ាង លីដា ចុះផ្អាក កាលពីវេលាម៉ោង១០ព្រឹក ថ្ងៃទី២៤ ខែកក្កដា ឆ្នាំ២០១៩ ។ អាជ្ញាធរបាននិយាយថា បច្ចុប្បន្ននេះអ្នកធ្វើអាជីវកម្មបុរីផ្ទះល្វែងមួយចំនួនបានបន្លំរកស៊ី ដោយគេចវេសមិនព្រមសុំច្បាប់អនុញ្ញាតឲ្យបានត្រឹមត្រូវនោះឡើយ ហើយអាជ្ញាធរថ្នាក់ខណ្ឌ និងសង្កាត់ស្ទើរមិនហ៊ានទៅជិតទេ ព្រោះខ្លាចពួកគាត់សុំច្បាប់ពីថ្នាក់លើរួចរាល់ហើយ ប៉ុន្តែនៅពេលចុះទៅពិនិត្យជាក់ស្ដែងទើបដឹងថា គ្មានច្បាប់ត្រឹមត្រូវឡើយ ។ ប៉ុន្តែបើតាមច្បាប់ទោះបីជាអ្នកនោះមានខ្នងមានច្បាប់អនុញ្ញាតពីថ្នាក់ណាក៏ដោយក៏ត្រូវតែសុំច្បាប់ពីអាជ្ញាធរខណ្ឌ និងសង្កាត់ដោយមិនអាចរំលងបានទេ ព្រោះថ្នាក់ខណ្ឌ និងសង្កាត់ក៏មានចំណែកទទួលខុសត្រូវធំ នៅពេលមានហានិភ័យផ្សេងៗកើតឡើងក្នុងមូលដ្ឋានរបស់ខ្លួនផងដែរ ។
ដោយឡែកបុរីផ្ទះល្វែងគឹម ធី នេះមានការសាងសង់រហូតដល់ទៅចំនួន២០៩ល្វែង ដែលល្វែងខ្លះសង់ជិតរួច និងខ្លះទៀតបាន៧០ទៅ៨០ភាគរយទៅហើយ ប៉ុន្តដោយមានការសង្ស័យថា ដំណើរការសាងសង់គ្មានច្បាប់ទើបលោកហែម ដារិទ្ធិ ដែលជាអភិបាលខណ្ឌពោធិ៍សែនជ័យចាត់ឲ្យលោកអភិបាលរង ប៉ាង លីដា ដឹកនាំកម្លាំងចុះទៅត្រួតពិនិត្យមើលទៅលើឯកសារពាក់ព័ន្ធទៅនឹងច្បាប់ទម្លាប់នានា ។ ប្រភពដដែលបានបន្តថា ពេលកម្លាំងចុះទៅដល់ទីតាំងនេះមិនបានជួបម្ចាស់បុរីនោះឡើយ គឺជួបតំណាងរបស់គាត់ដោយម្ចាស់បុរីជាប់រវល់ទៅក្រៅប្រទេសបាត់ទៅហើយ ខណៈនោះបានពិនិត្យឃើញថា សំណង់ខាងលើគ្មានច្បាប់អនុញ្ញាតត្រឹមត្រូវនោះទេ ដំណើរការដោយគ្មានច្បាប់ឡើយ ។
បន្ទាប់ពីពិនិត្យឃើញបែបនេះ លោកអភិបាលរងប៉ាង លីដា បានរាយការណ៍សុំគោលការណ៍ពីលោកអភិបាលខណ្ឌហែម ដារិទ្ធិ ហើយត្រូវបានលោកអភិបាលខណ្ឌសម្រេចឲ្យផ្អាកសកម្មភាពសាងសង់ជាបណ្ដោះអាសន្ន ។ បន្ទាប់មកបានធ្វើលិខិតផ្ញើទៅកាន់ម្ចាស់បុរីគឹម ធី នេះផ្អាកសកម្មភាពរបស់ខ្លួន និងសុំច្បាប់ឲ្យបានត្រឹមត្រូវមុន និងសាងសង់បន្តទៀត ហើយនៅពេលនោះអាជ្ញាធរមិនបានធ្វើការដកហូតសម្ភារៈអ្វីពីការដ្ឋានសំណង់មួយនេះឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ