ខេត្តស្ទឹងត្រែង ៖ ផ្ទះកម្មកររបស់ក្រុមហ៊ុនឧកញ៉ា អាន ម៉ារឌី ជាច្រើនខ្នង ត្រូវអគ្គិភ័យលេបត្របាក់អស់ ទាំងស្រុងនៅក្នុងដីឡូត៍ចំការកៅស៊ូ កាលពីវេលាម៉ោងជិត១២ថ្ងៃត្រង់ ថ្ងៃទី២៣…
ខេត្តស្ទឹងត្រែង ៖ ផ្ទះកម្មកររបស់ក្រុមហ៊ុនឧកញ៉ា អាន ម៉ារឌី ជាច្រើនខ្នង ត្រូវអគ្គិភ័យលេបត្របាក់អស់ ទាំងស្រុងនៅក្នុងដីឡូត៍ចំការកៅស៊ូ កាលពីវេលាម៉ោងជិត១២ថ្ងៃត្រង់ ថ្ងៃទី២៣ កក្កដា ស្ថិតនៅភូមិទឹកលិច ឃុំកំភុន ស្រុកសេសាន ។
ប្រភពព័ត៌មាននៅកន្លែងកើតហេតុបានឱ្យដឹងថា គ្រាអគ្គិភ័យកំពុងឆេះសន្ធោសន្ធៅនោះក្រុមកម្មករទាំង អស់កំពុងបំពេញការងារជាក្រុមៗនៅតាមឡូត៍ចំការកៅស៊ូ ដោយពុំដឹងពីមូលហេតុនៃការឆេះនេះឡើយ ។ ប្រភពដដែលបន្តថា នាវេលាម៉ោងប្រមាណជិត១២ថ្ងៃត្រង់មានស្ត្រីម្នាក់ រត់ទៅហៅគេឯងដែលជាកម្មករកំពុងប្រមូលជ័រ ក៏ផ្អើលឆោឡោឡើងនាំគ្នារត់ទៅពន្លត់ភ្លើង រីឯអ្នកខ្លះប្រវេប្រវាយករបស់របរចេញពីផ្ទះ និងខ្លះទៀតទំនាក់ទំនងទៅសមត្ថកិច្ចដើម្បីសុំការជួយអន្តរាគមន៍ ។
តាមការឱ្យដឹងពីលោក ចាន់ សុផា ស្នងការរងទទួលផែនអាវុធជាតិផ្ទុះ និងអគ្គិភ័យនៃស្នងការដ្ឋាននគរបាលខេត្តមានប្រសាសន៍ថា តាមការស្រាវជ្រាវ អគ្គិភ័យនេះបង្កឡើងចេញពីភ្លើងចង្ក្រាន ដែលម្ចាស់ផ្ទះបានស្លរួចមិនបានពន្លត់រងើកភ្លើងហើយចេញទៅធ្វើការ ទើបភ្លើងបានជ្រុះទៅប៉ះនឹងជញ្ជាំងក្តារ ទើបបង្កជាអគ្គិភ័យកើតឡើង ។
លោកថា បន្ទាប់ពីមានសេចក្តីរាយការណ៍ពីករណីអគ្គិភ័យនេះ លោកបានបញ្ជាកម្លាំងចេញរថយន្តអន្តរាគមន៍ បាញ់ទឹកទប់ស្កាត់មិនឱ្យមានការរាលដាលដោយប្រើប្រាស់រថយន្តចំនួនពីរគ្រឿង អស់ទឹកជាង១០រថយន្តទើបរលត់ជាស្ថាពរ ។ ចំណែកផ្ទះដែលក្លាយជាចំណីភ្លើងមានចំនួន៩ខ្នងស្មើនឹង១៨បន្ទប់ គឺឆេះទាំងស្រុងដោយមិនអាចយកអ្វីៗចេញបានឡើយឃើញនៅសល់តែដែកសង្កសីដំបូលបាក់ធ្លាក់តែប៉ុណ្ណោះ។
បើតាមការឱ្យដឹងពីម្ចាស់ផ្ទះរងគ្រោះខាងលើថា ទ្រព្យសម្បត្តិត្រូវរលាយទាំងស្រុង ដោយគ្រួសារនីមួយៗបាត់បង់លុយរាប់លានរៀលរួមនឹងរបស់របរសម្ភារប្រើប្រាស់ទាំងអស់ ដែលខ្លះសល់តែមួយចង្កេះ ព្រោះកំពុងធ្វើការនៅក្នុងចំការកៅស៊ូ ។ បន្ទាប់ពីការឆេះនេះ ម្ចាស់ក្រុមហ៊ុនក៏បានកោះហៅកម្មករដែលរងគ្រោះ ដើម្បីក្រុមហ៊ុននឹងជួយផ្តល់មកវិញផងដែរ ។
នាយកគ្រប់គ្រងក្រុមហ៊ុនលោក ឈុន កុសល បានបញ្ជាក់ថាក្នុងឆ្នាំនេះអគ្គិភ័យបានឆេះចំនួនពីរលើកមកហើយ ដែលលើកទី១ កាលពីប៉ុន្មានខែថ្មីៗនេះផ្ទះកម្មករចំនួន៥ខ្នងក្បែររោងចក្រក៏ត្រូវភ្លើងឆេះដែរដោយសារឆ្លងចរន្តអគ្គិសនី ៕ (សម្រួលដោយ៖ ស្រីណា)
ចែករំលែកព័តមាននេះ