រាជធានីភ្នំពេញ ៖ បន្ទាប់ពីសង្កេតឃើញថា សកម្មភាពមូលនិធិគន្ធបុប្ផាមួយចំនួនមានលក្ខណៈមិនសមរម្យ និងឆ្លៀតឱកាសបម្រើផលប្រយោជន៍ផ្ទាល់ខ្លួននោះមូលនិធិគន្ធបុប្ផាកម្ពុជាស្នើឲ្យបញ្ឈប់ជាបន្ទាន់នូវសកម្មភាពមិនប្រក្រតី បើពុំដូច្នេះមូលនិធិគន្ធបុប្ផានឹងចាត់វិធានការតាមផ្លូវច្បាប់ ។
យោងតាមសេចក្ដីជូនដំណឹងរបស់មូលនិធិគន្ធបុប្ផាកម្ពុជាចេញផ្សាយនាពេលថ្មីៗនេះបានឲ្យដឹងថា មូលនិធិគន្ធបុប្ផាសង្កេតឃើញមានសកម្មភាពកៀរគរមូលនិធិក្រោមរូបភាពផ្សេងៗ រួមមាន ការប្រគុំតន្ត្រី ការលក់ផលិតផល និងការដើររៃអង្គាសប្រាក់ជាដើម ។ ក្នុងគោលបំណងប្រមែប្រមូលធនធានបរិច្ចាគជូនមន្ទីរពេទ្យគន្ធបុប្ផាដោយផ្ទាល់ ឬតាមរយៈមូលនិធិគន្ធបុប្ផាកម្ពុជា ។ ជាមួយគ្នានោះដែរមូលនិធិគន្ធបុប្ផាថ្លែងអំណរគុណចំពោះសប្បុរសជន និងចលនាកៀរគរការបរិច្ចាគទាំងអស់ ដែលទាំងនេះសុទ្ធសឹងជាកាយវិការ សប្បុរសធម៌ដ៏ប្រសើរបំផុតក្នុងការចូលរួមធានាឲ្យបាននូវនិរន្តរភាពនៃមន្ទីរពេទ្យគន្ធបុប្ផាទាំង៧ នៅរាជធានីភ្នំពេញ និងខេត្តសៀមរាប។
មូលនិធិគន្ធបុប្ផាកម្ពុជាបញ្ជាក់ថា «មានសកម្មភាពមួយចំនួនដំណើរការដោយមានលក្ខណៈមិនសមរម្យ និងមិនប្រក្រតីដែលអាចជាការឆ្លៀតឱកាស និងមិនបម្រើឲ្យផលប្រយោជន៍របស់មន្ទីរពេទ្យទាំងស្រុង ។ មូលនិធិគន្ធបុប្ផាកម្ពុជា សូមធ្វើការអំពាវនាវ សូមបញ្ឈប់ជាបន្ទាន់នូវសកម្មភាពមិនប្រក្រតីទាំងនោះ បើពុំដូច្នេះមូលនិធិគន្ធបុប្ផាកម្ពុជានឹងសហការជាមួយអាជ្ញាធរមានសមត្ថកិច្ច ដើម្បីមានវិធានការផ្លូវច្បាប់» ។
សូមរំលឹកថា មូលនិធិគន្ធបុប្ផាកម្ពុជាដាក់ឲ្យដំណើរការ កាលពីខែមេសា ឆ្នាំ២០១៨ ដូច្នេះកន្លងមកមូលនិធិគន្ធបុប្ផាកម្ពុជាបានទទួលការបរិច្ចាគយ៉ាងច្រើនកុះករពីសំណាក់មន្ត្រីរា ជការកងកម្លាំងប្រដាប់អាវុធ ក្រុមហ៊ុនឯកជន អង្គការ សមាគមន៍ និងប្រជាពលរដ្ឋនៅទូទាំ ងប្រទេសក៏ដូចជា ពលរដ្ឋដែលរស់នៅតាមបណ្តាប្រទេសផ្សេងៗផងដែរ ។ មូលនិធិគន្ធបុប្ផាត្រូវបានយកថវិការទៅជួនកុមារដែលមានជំងឺផ្សេងៗដែលមួយថ្ងៃៗមានកុមាររាប់រយនាក់បានព្យាបាលនៅមន្ទីពេទ្យគន្ធបុប្ផា ៕ កែសម្រួលដោយ ៖ សុឃាក់
ចែករំលែកព័តមាននេះ