រាជធានីភ្នំពេញ ៖ ពិតជាឈាមស្រែកស្បែកហៅមែន នៅថ្ងៃទី២២ កក្កដា អាចចាត់ទុកថា ព្រលឹងនាងជាជនរងគ្រោះបានអន្ទងជនជាឃាតករនៅចិន ឱ្យចូលមកស្រុកខ្មែរវិញ ក៏ត្រូវកម្លាំងសមត្ថកិច្ចចាប់ឃាត់ខ្លួនតែម្តង ។…
រាជធានីភ្នំពេញ ៖ ពិតជាឈាមស្រែកស្បែកហៅមែន នៅថ្ងៃទី២២ កក្កដា អាចចាត់ទុកថា ព្រលឹងនាងជាជនរងគ្រោះបានអន្ទងជនជាឃាតករនៅចិន ឱ្យចូលមកស្រុកខ្មែរវិញ ក៏ត្រូវកម្លាំងសមត្ថកិច្ចចាប់ឃាត់ខ្លួនតែម្តង ។ តាមចម្លើយសារភាពឃាតករបានឱ្យដឹងទៀតថា រាល់សកម្មភាពឈានដល់ការសម្លាប់ និងដុតសាកសពនារីរងគ្រោះជាសង្សារនេះ គឺរូបខ្លួនធ្វើតែម្នាក់ឯងគត់ មិនមានអ្នកចូលរួមទេ ដោយសារតែជម្លោះបែកការណ៍ដឹងដល់ប្រពន្ធដើមគេ ។
សូមរំលឹកថា សំណុំរឿងឃាតកម្មសម្លាប់ដុតសពស្ត្រីរងគ្រោះទាំងមានផ្ទៃពោះ នៅចំណុចដីឡូត៍មួយកន្លែងក្បែរស្ពានព្រែកព្នៅ ត្រូវបានវែកមុខឃាតករឃើញហើយ កាលពីថ្ងៃទី២២ កក្កដា នេះ ដែលជនដៃដល់ជាចិន ឯជនរងគ្រោះជាស្ត្រីជនជាតិចិនដូចគ្នា និងមានផ្ទៃពោះផងដែរ ។ ការសម្លាប់នេះ ចាត់ទុកជាអំពើឃោរ ឃៅព្រៃផ្សៃ សូម្បីទារកក្នុងផ្ទៃ ដែលគ្មានកំហុសក៏មិនអនុគ្រោះដែរ ។
ជនជាឃាតករ ឈ្មោះ Yang Yang ភេទប្រុស អាយុ២៨ឆ្នាំ កាន់លិខិតឆ្លងដែនលេខ ED 1029380 ជាបុគ្គលិកក្រុមហ៊ុនដឹផាកវេ ស្ថិតនៅផ្លូវលេខ២៧៣ សង្កាត់ទួលសង្កែទី១ ខណ្ឌឫស្សីកែវ ។ ទាក់ទិននឹងការចាប់ខ្លួនឃាតករខាងលើនេះ លោកវរសេនីយ៍ឯក ជាវ វិបុល អនុប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ បានបង្ហើបឲ្យដឹងថា កាលពីយប់ថ្ងៃទី២៩ មិថុនា ឆ្នាំ២០១៩ មានការភ្ញាក់ផ្អើលមួយនៅចំណុចដីឡូត៍មួយកន្លែងក្បែរស្ពានព្រែកព្នៅ ស្ថិតក្នុងសង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ ដោយគេបានឃើញសាកសពមនុស្សម្នាក់ ត្រូវជនមិនស្គាល់ដុតឆេះរោលខ្លោចស្ទើរក្លាយទៅជាផេះ ។
ក្រោយពីមានការភ្ញាក់ផ្អើលករណីដុតសាកសពនោះ លោកឧត្តមសេនីយ៍ឯក អុិន បូរ៉ា អគ្គស្នងការរងនគរបាលជាតិ និងជាប្រធាននាយកដ្ឋានកណ្តាលនគរបាលយុត្តិធម៌ និងលោកឧត្តមសេនីយ៍ឯក ង៉េង ជួរ ប្រធាននាយកដ្ឋាននគរបាលព្រហ្មទណ្ឌ បានដាក់បទបញ្ជានិងប្រើប្រាស់កម្លាំងជំនាញព្រហ្មទណ្ឌឲ្យចុះបើកការស៊ើបអង្កេតលើសំណុំរឿងឃាតកម្មមួយនេះជាបន្ទាន់ ទើបឈានដល់ការឃាត់ខ្លួនជនដៃដល់រូបនេះ ។
លោកវរសេនីយ៍ ជាវ វិបុល បន្តថា ក្រោយមក តាមរយៈការធ្វើកោសល្យវិច័យសមត្ថកិច្ចបានស្គាល់អត្ត សញ្ញាណជនរងគ្រោះឈ្មោះ Mou Xiao Lin ភេទស្រី អាយុ២៧ឆ្នាំ នាងមានផ្ទៃពោះ បានចូលមកប្រទេសកម្ពុជា នៅខែមេសា ឆ្នាំ២០១៩ ស្នាក់នៅសណ្ឋាគារញូវហ្វី ប៉ារីស បន្ទប់លេខ២០៦ សង្កាត់ស្រះចក ខណ្ឌដូនពេញ និងមានសង្សារឈ្មោះ Yang Yang ជាជនជាតិចិនដូចគ្នា ។
ដោយសារតែនារីរងគ្រោះជាសង្សារកំពុងមានផ្ទៃពោះ បុរសជាសង្សារដែលខ្លាចប្រពន្ធដឹងបានបង្ខំឲ្យនាងទម្លាក់កូនចោល តែនាងមិនព្រម ។ លុះដល់ថ្ងៃទី២៩ មិថុនា ឆ្នាំ២០១៩ ក៏បាត់ខ្លួនជនរងគ្រោះពីបន្ទប់ដែលស្នាក់នៅ រហូតដល់ម៉ោង៩និង២០នាទីយប់ ក៏មានប្រជាពលរដ្ឋប្រទះឃើញគេយកសពទៅដុតចោលនៅដីឡូត៍មួយក្បែរផ្លូវលំ ក្រុម១៨ ភូមិបាក់ខែងលើ សង្កាត់បាក់ខែង ខណ្ឌជ្រោយចង្វា ។
តាមការពិនិត្យ និងឆែកមើលកាមេរ៉ាសុវត្ថិភាពរបស់សណ្ឋាគារញូវហ្វី ប៉ារីស នៅថ្ងៃទី២៩ ខែមិថុនា ឆ្នាំ២០១៩ មានបុរសជនជាតិចិនម្នាក់ បានអូសវ៉ាលីសពណ៌ទឹកប្រាក់ ចេញពីបន្ទប់លេខ២០៦ លើកដាក់រថយន្តឡិចសុីស RX330 ពណ៌.ស ហើយបើកចេញទៅបាត់ ។ លុះដល់ថ្ងៃទី៧ ខែកក្កដា ឆ្នាំ២០១៩ នាយកដ្ឋាននគរបាលព្រហ្មទណ្ឌ បានធ្វើការស្រាវជ្រាវរកឃើញរថយន្តឡិចសុីសRX330 ពណ៌ស មានស្លាកលេខ 2AM 1334 ជារថយន្តដឹកសពដាក់ក្នុងវ៉ាលីសយកទៅដុតចោលរបស់ឈ្មោះ Jiang Qing Hua ជាជនជាតិចិន ។ ម្ចាស់រថយន្តបានឲ្យដឹងថា ខ្លួនបានឱ្យឈ្មោះ Yang Yang ខ្ចីដឹកមិត្តភក្តិទៅព្រលានយន្ត ហោះអន្តរជាតិភ្នំពេញ ។
លុះដល់ថ្ងៃទី៣០ ខែមិថុនា ទើបឃើញយករថយន្តមកទុក នៅមុខការិយាល័យរបស់ខ្លួនវិញ ដោយមានបន្សល់ទុកកាបូបស្ពាយស្រី្តពណ៌ខ្មៅមួយនៅក្នុងរថយន្តផង ។ ក្រោយទទួលបានព័ត៌មាននេះ នាយកដ្ឋាននគរបាលព្រហ្មទណ្ឌបានស្រាវជ្រាវ និងកំណត់មុខសញ្ញាជនសង្ស័យជាឃាតកររួចស្រេចទៅហើយ តែដោយសារជនដៃដល់បានគេចខ្លួនទៅស្រុកចិនបាត់ ទើបបានជារង់ចាំឲ្យគាត់ត្រឡប់មកវិញសិន ។
នៅចំពោះមុខសមត្ថកិច្ច ជនជាឃាតករបានសារភាពថា ខ្លួនបានចូលមកកម្ពុជានៅខែតុលា ឆ្នាំ២០១៦ ដើម្បីធ្វើការឲ្យក្រុមហ៊ុនមួយ លុះដល់ឆ្នាំ២០១៨ ក៏បានស្គាល់នារីជនជាតិចិនម្នាក់ឈ្មោះ Miao Xao Lin ហើយក៏ស្រឡាញ់គ្នាធ្វើជាសង្សារ ដោយជួលសណ្ឋាគារញូវហ្វីប៉ារីសស្នាក់នៅបណ្តោះអាសន្ន ។ ក្រោយមកនារីជាសង្សារមានផ្ទៃពោះ ខ្លួនក៏បានបង្ខំឲ្យនាងយកកូនចេញ ដោយខ្លាចរឿងរ៉ាវលួចមានស្រីបែកធ្លាយដល់ប្រពន្ធ តែនាងមិនព្រម ។
លុះដល់ថ្ងៃទី២៩ ខែមិថុនា ឆ្នាំ២០១៩ ក៏កើតមានជម្លោះនឹងគ្នា ហើយពេលនោះ ខ្លួនក៏ច្រាននាងឲ្យដួលលើឥដ្ឋ បណ្ដាលឲ្យបោកក្បាលសន្លប់ ។ ឃើញដូច្នោះ ខ្លួនក៏បានយកកន្សែងរឹត.កបន្ថែមដើម្បីឲ្យនាងស្លាប់តែម្តងទៅ ។ ពេលដឹងថា នាងជាសង្សារស្លាប់ហើយ ខ្លួនបានទៅទិញវ៉ាលីសធំមួយនៅផ្សារថ្មី ក្នុងតម្លៃ៨០ដុល្លារអាមេរិក ដើម្បីយកមកដាក់សាកសពនាង រួចបានខ្ចីរថយន្តមិត្តភក្តិលើកវ៉ាលីសសាកសពដឹកយកទៅដុតចោលនៅដីឡូត៍មួយកន្លែងទាំងយប់ ។
ជនសង្ស័យជាឃាតករសម្លាប់ ដុតជនរងគ្រោះជានារីជនជាតិចិនដូចគ្នានេះ សមត្ថកិច្ចបានរៀបចំសំណុំរឿងបញ្ជូនទៅកាន់សាលាដំបូងរាជធានីភ្នំពេញតាមនីតិវិធី ៕
ចែករំលែកព័តមាននេះ