រាជធានីភ្នំពេញ៖ ក្នុងន័យពង្រីកទីផ្សារនៃការនាំចេញអង្កររបស់កម្ពុជាទៅកាន់ទីផ្សារអន្តរជាតិ ថ្មីៗនេះរដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានគូសបញ្ជាក់ថា កម្ពុជាមានបំណងនាំអង្ករក្រអូប «ផ្កាម្លិះអង្គរ» ដែលទទួលបានចំណាត់លេខ១ កាលពីឆ្នាំ២០១៨ ទៅកាន់ប្រទេសឥណ្ឌូនេស៊ី ដើម្បីបង្កើនទំហំពាណិជ្ជកម្មទ្វេភាគី និងពង្រឹងកិច្ចសហការលើឧស្សាហកម្មផលិតសម្ភារ និងគ្រឿងបង្គុំទោចក្រយាននៅក្នុងប្រទេស ព្រមទាំងអភិវឌ្ឍន៍ឧស្សាហកម្មគាំទ្រសម្រាប់ការផលិតទោចក្រយាន ដើម្បីបង្កើនតម្លៃបន្ថែមក្នុងស្រុកសម្រាប់ផលិតផលនេះ និងនាំចេញផលិតផលសម្រេច ១០០% ទៅកាន់ទីផ្សារអន្តរជាតិ ។
លោក ប៉ាន សូរស័ក្តិ នាឱកាសចូលរួមជាគណៈអធិបតីភាពជាមួយលោកជំទាវ អ៊ីណា ហានីងត្យាស គ្រីស្នាមឺទី (Ina Hagningtyas Krisnamurthi) ប្រឹក្សាពិសេសក្រសួងការបរទេសទទួលបន្ទុកសេដ្ឋកិច្ចការទូតឥណ្ឌូនេស៊ី ក្នុងពិធីសម្ពោធពិព័រណ៍ពាណិជ្ជកម្មមិត្តភាពកម្ពុជា-ឥណ្ឌូនេស៊ី ឆ្នាំ២០១៩ ដែលរៀបចំឡើងនៅក្រុងសៀមរាប កាលពីរសៀលថ្ងៃសុក្រ ទី១៩ ខែកក្កដា ឆ្នាំ២០១៩ បានលើកឡើងទំនាក់ទំនងពាណិជ្ជកម្មទ្វេភាគីកម្ពុជា-ឥណ្ឌូនេស៊ី សម្រេចបានទឹកប្រាក់ ៥៥៨.៦២លានដុល្លារ (កម្ពុជានាំចូល ៥២៥,៦លានដុល្លារ និងនាំចេញ ៣៣លានដុល្លារ) ក្នុងឆ្នាំ២០១៨ និងកិច្ចសហប្រតិបត្តិការលើវិស័យសេដ្ឋកិច្ច (ការមិនយកពន្ធត្រួតគ្នា និងទប់ស្កាត់អំពើបន្លំពន្ធពាក់ព័ន្ធប្រាក់ចំណូល) ក៏ដូចជាវិស័យទេសចរណ៍ (ការបើកជើងហោះហើរត្រង់ពីទីក្រុងហ្សាកាតា-ភ្នំពេញ) ដែលប្រទេសទាំងពីរបានចុះអនុស្សរណៈនាពេលថ្មីៗនេះ។
លោករដ្ឋមន្ត្រីបានបញ្ជាក់ថា ដើម្បីបង្កើនពាណិជ្ជកម្មរវាងគ្នាបន្ថែមទៀត កម្ពុជា និងឥណ្ឌូនេស៊ី ក៏បានរៀបចំនូវព្រឹត្តិការណ៍ពិព័រណ៍ពាណិជ្ជកម្មមួយនៅខេត្តសៀមរាប ដើម្បីអោយពាណិជ្ជករនៃប្រទេសទាំងពីរអាចជួបគ្នា និងស្វែងរកឱកាសនាំចេញនាំចូលផលិតផលទាំងពីរប្រទេសបម្រើអោយសេចក្តីត្រូវការរបស់ប្រជាពលរដ្ឋកម្ពុជា និងឥណ្ឌូនេស៊ី ។
សូមជម្រាបថា គិតត្រឹមខែមេសា ឆ្នាំ២០១៩នេះ ទំហំពាណិជ្ជកម្មទ្វេភាគីនៃប្រទេសទាំងពីរ សម្រេចបានទឹកប្រាក់ ១៩៦.២៦លានដុល្លារ គឺបានកើនឡើង ១០.៤៨% ធៀបរយៈពេលដូចគ្នា ក្នុងឆ្នាំ២០១៨ ក្នុងនោះ ការនាំចេញរបស់កម្ពុជាទៅឥណ្ឌូនេស៊ី បានកើនឡើង ៧.៧៥% និងនាំចូលកើនឡើង ៥៤.១៨%។
ដោយឡែកសម្រាប់ឧស្សាហកម្មទោចក្រយាន កម្ពុជាបាននាំចូលបំណែក និងគ្រឿងបន្លាស់ (លីប, តួ, ដៃ, ចង្កៀង, អំព្រីយ៉ា…) ពីឥណ្ឌូនេស៊ីចំនួន ៧,១៩លានដុល្លារ នៅក្នុងឆ្នាំ២០១៨ ។ ដោយឡែកសម្រាប់ការនាំចេញអង្កររបស់កម្ពុជាវិញ ក្នុងរយៈពេល៦ខែនេះ បើតាមរបាយការណ៍របស់ការិយាល័យច្រកចេញចូលតែមួយ បានបង្ហាញថា កម្ពុជាបាននាំចេញអង្ករទៅកាន់ទីផ្សារអន្តរជាតិមានបរិមាណ ២៨១.៥៣៨តោន ខណៈឆ្នាំ ២០១៨ពេញមួយឆ្នាំ កម្ពុជានាំចេញអង្ករបានប្រមាណ៦២៦ពាន់តោន ៕ កែសម្រួលដោយ ៖ សុឃាក់
ចែករំលែកព័តមាននេះ