ប្រទេសអង់គ្លេស-អុីរ៉ង់ ៖ ប្រទេសអុីរ៉ង់បានប្រាប់កាលពីថ្ងៃទី២១កក្កដាថា វាសនារបស់នាវាដឹកប្រេងដោតទង់ជាតិអង់គ្លេស ដែលខ្លួនចាប់ពឹងលើកិច្ចសហការល្អ របស់ក្រុមនាវិកនៃនាវានោះ ខណៈអង់គ្លេសបានបដិសេធជាថ្មីការបកស្រាយរបស់អុីរ៉ង់ លើឧប្បត្តិហេតុដែលកើតមាន២ថ្ងៃមុននេះ ក្នុងចក្រសមុទ្រយុទ្ធសាស្ត្រORMUZ។
សង្ស័យមិនគោរពច្បាប់សមុទ្រអន្តរជាតិនាវាដឹកប្រេងSTENA IMPERO និងសមាជិកក្រុមនាវិក២៣នាក់ ត្រូវឃុំទុកក្នុងដែនទឹកនៃកំពង់ផែក្រុងBANDAR ABBAS ភាគខាងត្បូងអុីរ៉ង់។ លោកALLAH MORAD AFIFIPOUR អគ្គនាយកនៃអាជ្ញាធរកំពង់ផែនិងសមុទ្រមូលដ្ឋានថ្លែងថា ការស៊ើបអង្កេតពឹងផ្អែកលើកិច្ចសហការរបស់បណ្ដាសមាជិកនៃក្រុមនាវិក និងបណ្ដាភស្ដុតាងដែលយើងមានដើម្បីពិនិត្យរឿងនោះ។ នាវិកទាំងនេះមានសុខភាពល្អទេ។
នាវាដឹកប្រេងជារបស់ម្ចាស់មានសញ្ជាតិស៊ុយអែត ត្រូវបានកងកម្លាំងឆ្មាំបដិវត្តន៍អុីរ៉ង់ ចាប់កាលពីថ្ងៃទី១៩កក្កដា។ តាមក្រុងតេហេរ៉ង់ថា នាវានេះបានបុកជាមួយនាវានេសាទ១គ្រឿង ហើយអាជ្ញាធរអុីរ៉ង់បានបើកការស៊ើបអង្កេតមួយ រកមូលហេតុនៃគ្រោះថ្នាក់នោះ។ ក្រុងឡុងដ៏បានបដិសេធការបកស្រាយនោះ ក្នុងសារមួយផ្ញើទៅអ.ស.ប។ ក្នុងសារលិខិតនោះ តំណាងអង់គ្លេសប្រចាំអ.ស.បសរសេរថា អីុរ៉ង់ចង់ថានាវាដឹកប្រេងនេះ ចូលក្នុងច្រកសមុទ្រORMUZ ហើយពុំព្រមឆ្លើយតបចំពោះសារព្រមាននានា។ អីុរ៉ង់គ្មានភស្ដុតាងណាមួយក្នុងន័យនេះឡើយ ហើយអ្វីដែលកើតមានគឹនាវាSTENA IMPEROស្ថិតក្នុងដែនទឹកអូម៉ង់ មានន័យថាអីុរ៉ង់ពុំមានសិទិ្ធចាប់នាវានោះឡើយ។
ដោយយល់ថាការចាប់នាវានេះជាការមិនសមស្របហើយមិនអាចទទួលយកបាន ក្រុងឡុងដ៏បានទាមទារកាលពីថ្ងៃទី២០កក្កដា ឲ្យដោះលែងនាវានោះ។ ចំណែកនាយករដ្ឋមន្ត្រីអង់គ្លេស លោកស្រីTHERESA MAYដឹកនាំនាព្រឹកថ្ងៃទី២២កក្កដា កិច្ចប្រជុំអន្តរក្រសួងមួយ ស្ដីពីរឿងនោះ៕ (កែសម្រួលដោយ ៖ បុប្ផា)
ចែករំលែកព័តមាននេះ