យោងតាមការសិក្សាថ្មីមួយធ្វើឡើងដោយក្រុមអ្នកវិទ្យាសាស្ត្រប្រទេសស្វ៊ីសចុះផ្សាយក្នុងព្រឹត្តិបត្រ Nature Medicineបង្ហាញថា ការទទួលទានបន្លែនិងផ្លែឈើច្រើនអាចបង្កាមិនឱ្យរលាកសួត កាត់បន្ថយបានគ្រោះហានិភ័យពីជំងឺហឺត ។
ការពិសោធទៅលើសត្វកណ្តុរពីសំណាក់ក្រុមអ្នកស្រាវជ្រាវមកពីសាកលវិទ្យាល័យ University of Lausanne រកឃើញថា របបអាហារដែលផ្ទុកទៅដោយសារធាតុសរសៃច្រើន មានប្រសិទ្ធភាពជួយទប់ស្កាត់ការរលាកសួត ហើយបញ្ចៀសបានការកើតជំងឺហឺត ។ ក្រៅពីនេះ របបអាហារមានសារធាតុសរសៃ(មានច្រើនបំផុតក្នុងបន្លែនិងផ្លែឈើ )ខ្ពស់ផ្តល់អត្ថប្រយោជន៍ផ្សេងៗទៀតចំពោះសុខភាព ក្នុងនោះមានដូចជា កាត់បន្ថយហានិភ័យពីជំងឺបេះដូង និងជំងឺមហារីកផងដែរ ។
វេជ្ជបណ្ឌិត Benjamin Marsland អ្នកដឹកនាំការសិក្សាស្រាវជ្រាវបាននិយាយថា ៖«ប៉ុន្មានទសវត្សចុងក្រោយនេះ តួលេខអ្នកកើតជំងឺទាក់ទងនឹងសួតបានកើនឡើងគួរឱ្យកត់សម្គាល់នៅតាមបណ្តាប្រទេសកំពុងអភិវឌ្ឍ ពោលគឺនៅខណៈពេលដែលបរិមាណនៃការប្រើប្រាស់សារធាតុសរសៃក្នុងរបបអាហារតាមបណ្តាប្រទេសទាំងនេះបានថយចុះ »។ លោកបានបន្ថែមថា ៖«លទ្ធផលនៃការរកឃើញនៅពេលនេះអាចត្រូវបកស្រាយក្នុងបរិបទនៃការសិក្សាពីជំងឺរាតត្បាតដោយបង្ហាញថា ខណៈបរិមាណសារធាតុសរសៃក្នុងរបបអាហារថយចុះ នោះហានិភ័យកើតមានជំងឺរលាកផ្សេងៗនឹងកើនឡើង ។ ដូច្នេះ របបអាហារទទួលទានដែលសម្បូរដោយសារធាតុសរសៃ មិនត្រឹមតែអាចទប់ស្កាត់បណ្តាជំងឺពាក់ព័ន្ធនឹងពោះវៀននោះទេ ប៉ុន្តែក៏អាចជួយទប់ស្កាត់ជំងឺរលាកប្រព័ន្ធផ្លូវដង្ហើមផងដែរ »៕
ចែករំលែកព័តមាននេះ