រាជធានីភ្នំពេញ ៖ សេចក្តីរាយការបឋមបានឲ្យដឹងថា កម្លាំងសមត្ថកិច្ចនគរបាលការិយាល័យព្រហ្មទណ្ឌកម្រិតស្រាលក្រសួងមហាផ្ទៃ កាលពីថ្ងៃទី១៦ ខែកក្កដានេះបានធ្វើការឃាត់ខ្លួននាយកក្រុមហ៊ុនម្នាក់ ពាក់ព័ន្ធចេញមូលប្បទានប័ត្រគ្មានសាច់ប្រាក់ (សែកស្អុយ) ប្រមាណជាង១លានដុល្លារអាមេរិក ។ ក្រោយពីកម្លាំងសមត្ថកិច្ចនគរបាលព្រហ្មទណ្ឌឃាត់ខ្លួន ជនសង្ស័យរូបនោះត្រូវបានប្រគល់ឲ្យទៅនាយកដ្ឋានសន្តិសុខផ្ទៃក្នុងកសាងសំណុំរឿងបញ្ជូនទៅ កាន់សាលាដំបូងរាជធានីភ្នំពេញ នៅព្រឹកថ្ងៃទី១៩ កក្កដានេះវិញ ។
សេចក្តីរាយការបានបន្តថា ជនសង្ស័យឈ្មោះ ឌីម សួនណាត ភេទប្រុស អាយុ៣៦ឆ្នាំ មុខរបរជានាយកក្រុមហ៊ុន អ៊ីណារីតា ឌីវេឡុបម៉ិន ឯ.ក ជាប់ចោទពីបទ ឆបោករំលោភលើទំនុកចិត្ត និងចេញមូលទានប័ត្រគ្មានសាច់ប្រាក់ ដែលមិនបំពេញកាតព្វកិច្ចចំពោះឧបករណ៍ដែលអាចជួញដូរបានតាមពាក្យបណ្តឹងវរបស់ឈ្មោះ គង់ លាកឃាង ជាពាណិជ្ជករដូចគ្នា ។
ដើមឡើយបណ្តាលឲ្យមានការឃាត់ខ្លួននាយកក្រុមខាងលើនេះ សមត្ថកិច្ចបានឲ្យដឹងថា កាលពីអំឡុងខែធ្នូ ឆ្នាំ២០១៨ នៅក្រុមហ៊ុនផ្ទះលេខ៣៤ ផ្លូវ១០០៧ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ឈ្មោះ ឌីម សួនណាត បានទៅប្រើល្បិចបញ្ចុះបញ្ចូលឈ្មោះ គង់ លាកឈាង ឲ្យដាក់ទុនវិនិយោគលើការជួញដូររូបបិយប័ណ្ណអន្តរជាតិ (Forex trading) ជាមួយខ្លួនលើទឹកប្រាក់ចំនួនប្រមាណ១.៣៤៧.២៦០ លានដុល្លារអាមេរិក (មួយលានបីសែនប្រាំពីរពាន់ពីររយហុកសិបលានដុល្លារអាមេរិក) ដើម្បីឲ្យខ្លួន (ឌីម សួនណាត) ធ្វើការជួញដូររូបិយប័ណ្ណអន្តរជាតិ(លេងភាគហ៊ុន) ។
ដោយក្នុងនោះឈ្មោះ ឌីម សួនណាត បានអះអាងថា និងទទួលបានប្រាក់ចំណេញមកវិញខ្ពស់ ដូច្នេះហើយបានជាដើមបណ្តឹងឈ្មោះ (គង់ លាកឈាង) សម្រេចចិត្តដាក់ទុនវិនិយោគ ដោយធ្វើការផ្ញើប្រាក់ឲ្យទៅឈ្មោះ ឌីម សួនណាត ដែលមានការិយាល័យក្រុមហ៊ុនផ្ទះលេខ៣៤ ផ្លូវ១០០៧ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ តាមរយៈធនាគារ ABA តាំងពីអំឡុងខែធ្នូ ឆ្នាំ២០១៨ រហូតមកដល់បច្ចុប្បន្ននេះ ។ បន្ទាប់មកឈ្មោះ ឌីម សួនណាត បានទទួលប្រាក់ទាំងអស់នោះ រួចហើយ ក៏ចេញមូលប្បទានប័ត្រទុកឲ្យដើមបណ្តឹង (គង់ លាកឈាង) សម្រាប់ទូទាត់ ។ លុះដល់ថ្ងៃ កំណត់ដើមបណ្តឹងបានទៅធនាគារ ABA ដើម្បីបើកប្រាក់ ប៉ុន្តែគណនីធនាគាររបស់ឈ្មោះ ឌីម សួនណាត នៅទីនោះគ្មានសាច់ប្រាក់ទេ ។ បន្ទាប់មកដើមបណ្តឹងបានព្យាយាមទាក់ទងទៅកាន់ឈ្មោះ ឌីម សួនណាត ជាច្រើកលើកដែរ តែឈ្មោះខាងលើបានបិទទូរស័ព្ទ ដោយមានចេតនាគេចវេស គេចខ្លួន មិនអាចទាក់ទងបាន ដូច្នោះទើបដើមបណ្តឹង សម្រេចចិត្តប្តឹងសមត្ថកិច្ចឲ្យជួយចាត់ការលើឈ្មោះ ឌីម សួនណាត តាមផ្លូវច្បាប់ ។
សមត្តកិច្ចបានបង្ហើបទៀតថា ជនជាប់សង្ស័យឈ្មោះ ឌីម សួនណាត នាយកក្រុមហ៊ុនមួយនោះនៅមានជាប់បណ្តឹងជាច្រើនទៀតដែលសុទ្ធតែរឿងចេញសែកស្អុយប្រហាក់ប្រហែលគ្នាដូចដើមបណ្តឹងនេះដែរ ៕ កែសម្រួលដោយ ៖ សុឃាក់
ចែករំលែកព័តមាននេះ