ក្រុមអ្នកស្រាវជ្រាវមកពីសាកលវិទ្យាល័យ Harvard University ប្រទេសអង់គ្លេសបានរកឃើញថា ឱកាសកើតមានជំងឺទឹកនោមផ្អែមប្រភេទ-២ជាពិសេសទៅលើស្ត្រីអាចទប់ស្កាត់បានចន្លោះពី៣០ភាគរយទៅ៤០ភាគរយដោយគ្រាន់តែហាត់ប្រាណឱ្យបាន៣ម៉ោងកន្លះក្នុងមួយសប្តាហ៍ ។ ប្រសិនជាហាត់ប្រាណត្រឹមកន្លះម៉ោង៧ថ្ងៃក្នុងមួយសប្តាហ៍ គេអាចកាត់បន្ថយហានិភ័យបាន១៣ភាគរយ ។
ការពិសោធលើស្ត្រីចំនួន១០ម៉ឺននាក់បានបង្ហាញថា ការហាត់ប្រាណអ៊ែរ៉ូប៊ិកមានដូចជា ដើរញាប់ រត់យឺតឬលឿន ហែលទឹក ធាក់កង់ឱ្យបានយ៉ាងហោចណាស់១៥០នាទីក្នុងមួយសប្តាហ៍ ឬក៏លើកទម្ងន់ឱ្យបានយ៉ាងហោចណាស់១ម៉ោងក្នុងមួយសប្តាហ៍ផ្តល់ប្រសិទ្ធភាពក្នុងការទប់ស្កាត់ជំងឺទឹកនោមផ្អែមប្រភេទ-២បានយ៉ាងល្អប្រសើរបំផុតពោលគឺអាចកាត់បន្ថយហានិភ័យបានដល់ទៅ១/៣ ។
តាមរយៈព្រឹត្តិបត្រ PLOS Medicine ក្រុមអ្នកស្រាវជ្រាវបានគូសបញ្ជាក់ថា ៖«ការសិក្សារបស់យើងលើកនេះបានបង្ហាញថា ការជាប់ពាក់ព័ន្ធក្នុងសកម្មភាពដែលនាំឱ្យសាច់ដុំកម្រើក តឹងណែននិងសកម្មភាពដូចជា លើកដៃ លើកជើងពត់ពេនដងខ្លួនគឺជាប់ទាក់ទងនឹងការធ្វើឱ្យថយចុះហានិភ័យ កើតជំងឺទឹកនោមផ្អែមប្រភេទ-២ ។ ការជាប់ពាក់ព័ន្ធក្នុងសកម្មភាពទាំងអ៊ែរ៉ូប៊ិក MVPA(ប្រើកម្លាំងមធ្យមនិងប្រើកម្លាំងខ្លាំង)និងទាំងសកម្មភាពនាំឱ្យសាច់ដុំតឹងណែន(លើកទម្ងន់ ឬអាវ៉ង់)គឺសុទ្ធតែធ្វើឱ្យថយចុះយ៉ាងពិតប្រាកដនូវហានិភ័យកើតជំងឺទឹកនោមផ្អែមប្រភេទ-២ចំពោះស្ត្រីវ័យកណ្តាល និងវ័យចាស់ »។
យោងតាមសមាគមជំងឺទឹកនោមអង់គ្លេសឱ្យដឹងថា ចំពោះបុគ្គលធាត់ៗដែលអាចបញ្ចុះទម្ងន់ខ្លួនបាន១គីឡូក្រាមគឺមានន័យថា គេអាចកាត់បន្ថយហានិភ័យកើតជំងឺទឹកនោមផ្អែមបាន១៥ភាគរយ ។ វេជ្ជបណ្ឌិត Richard Elliott អ្នកនាំពាក្យរបស់សមាគម បានថ្លែងថា ៖«បើទោះជា ការសិក្សាលើកនេះផ្តោតសំខាន់ទៅលើតែស្ត្រី ប៉ុន្តែវាក៏ជាសារដ៏ច្បាស់លាស់មួយដែលបង្ហាញថា បែបបទរស់នៅប្រចាំថ្ងៃពេញដោយសកម្មភាព ពិតជាអាចជួយកាត់បន្ថយហានិភ័យពីជំងឺដ៏រ៉ាំរ៉ៃមួយនេះបាន ។ សព្វថ្ងៃ យើងទាំងអស់គ្នាដឹងហើយថា មធ្យោបាយល្អតែមួយគត់ដើម្បីទប់ស្កាត់ជំងឺទឹកនោមផ្អែមគឺ រក្សាទម្ងន់ខ្លួនឱ្យស្ថិតក្នុងកម្រិតសុខភាពតាមរយៈការទទួលទានរបបអាហារផ្តល់អត្ថប្រយោជន៍សម្រាប់រាងកាយនិងហាត់ប្រាណជាប្រចាំទៀងទាត់ »៕
ចែករំលែកព័តមាននេះ