រាជធានីភ្នំពេញ ៖ ជាការពិតណាស់ ភ្នែកឡើងបាយជំងឺបាយភ្នែកគឺជាប្រភេទជំងឺដែលកើតមកពីការស្រអាប់នៃកែវភ្នែក ដោយសម្លឹងទៅវត្ថុមួយ ស្រាប់តែឃើញបែកជាពីរ ជាបី ឬជួនកាលស្រវាំងភ្នែករកមើលអ្វីមិនយល់មួយរំពេច ។ អាការៈបែបនេះ បើសិនជាអ្នកមិនប្រញាប់ធ្វើការព្យាបាលឱ្យបានទាន់ពេលវេលាទេ ភ្នែកនឹងអាចវិវឌ្ឍន៍ទៅរកពិការភាពបាន ។
លោកវេជ្ជបណ្ឌិត ងី ម៉េង ប្រធានកម្មវិធីជាតិសុខភាពភ្នែកបានប្រាប់កោះសន្ដិភាពថា ជំងឺបាយភ្នែកកើតមកពីភាពស្រអាប់របស់កែវភ្នែកធ្វើឱ្យសរសៃប្រាសាទបាតភ្នែកទទួលពន្លឺបានមិនពេញលេញល្អ បង្កឱ្យកែវភ្នែកស្រអាប់ ប្រៀបដូចសម្លឹងឆ្លងកាត់កញ្ចក់ដែលជាប់ដោយធូលី តែមិនមានអាការៈហើម រលាក ឬក៏ឈឺចាប់ទេ តែកែវភ្នែកស្រអាបឡើងៗ ហើយពន្លឺក៏កាន់តែធ្លាក់ចុះផងដែរ ។
ចំពោះមូលហេតុដែលបណ្ដាលឱ្យកើតបាយភ្នែកនេះភាគច្រើនបណ្ដាលមកពីកត្ដាមួយចំនួនដូចជា ៖
១-កត្ដាវ័យ៖ ភាពជរាដែលធ្វើឱ្យកែវភ្នែកស្រអាប់ ហើយឡើងរឹង ។ បាយភ្នែកប្រភេទនេះអាចកើតឡើងចំពោះមនុស្សដែលមានអាយុចាប់ពី៤០ឆ្នាំឡើងទៅ ។
២-ឧប្បត្ដិហេតុ៖ បាយភ្នែកកើតឡើងចំពោះមនុស្សគ្រប់វ័យ ប្រសិនបើគ្រាប់ភ្នែកប៉ះទង្គិចយ៉ាងធ្ងន់ធ្ងរជាមួយសារធាតុគីមី ឬពន្លឺកាំរស្មី ។
៣-បង្កឡើងដោយជំងឺ៖ បាយភ្នែកក៏អាចបង្កឡើងដោយជំងឺមួយចំនួនដូចជា ការឆ្លងមេរោគ ជំងឺទឹកនោមផ្អែម ការប្រើប្រាស់ឱសថមិនត្រូវតាមប្រភេទជំងឺ វាអាចជាមូលហេតុធ្វើឱ្យកែវភ្នែកស្រអាប់ ។ លក្ខណៈតំណពូជ ដែលអ្នកខ្លះកើតជំងឺនេះតាំងពីកំណើតមកម៉្លេះ ខណៈនៅក្នុងផ្ទៃ ស្រ្ដីជាម្ដាយកើតជំងឺស្អូច ។
លោកវេជ្ជបណ្ឌិតបានបន្ដថា បាយភ្នែកស្ដែងឱ្យដឹងតាមរយៈអាការៈមួយចំនួនដូចជា កែវភ្នែកស្រវាំងលឿន ឬយឺតអាស្រ័យទៅតាមកម្រិតនិងទីតាំងរបស់ភាពស្រអាប់ក្នុងកែវភ្នែក ប្រសិនជាកើតនៅបរិវេណខាងៗអ្នកជំងឺអាចនៅមើលឃើញច្បាស់ធម្មតា ។ ប៉ុន្ដែពេលខ្លះ អ្នកជំងឺអាចឃើញវត្ថុបែកជាពីរជួរ Diplopia និងស៊ូពន្លឺមិនបានត្រូវការវ៉ែនតាជាជំនួយ ។ សភាពភ្នែកមានអាការៈបែបនេះ កាលណាលោកអ្នកទុកយូរ រហូតបាយភ្នែកឡើងទុំហួសអាចវិវឌ្ឍន៍ទៅរកជំងឺទឹកដក់ក្នុងភ្នែក និងជំងឺរលាកប្រស្រីភ្នែកដែលធ្វើឱ្យភ្នែកឡើងក្រហម និងអាចឈានទៅពិការបាន ។
លោកអ្នកគួរចងចាំថា បាយភ្នែកមិនមែនជាជំងឺឆ្លង ឬរាលដាលពីភ្នែកម្ខាងទៅភ្នែកម្ខាងទៀតទេ ទោះបីភាគច្រើននឹងកើតឡើងព្រមគ្នាទាំងសងខាង តែអាការៈអាចធ្ងន់ឬស្រាលមិនស្មើគ្នាឡើយ ។ បាយភ្នែករមែងកើតឡើងយឺតៗ ធ្វើឱ្យកែវភ្នែករបស់អ្នកជំងឺស្រអាប់ ស្រវាំង មើលមិនច្បាស់ តែជាទូទៅបាយភ្នែកជាជំងឺដែលគេអាចព្យាបាលបានទទួលផលល្អ ។
វិធីព្យាបាលជំងឺភ្នែកឡើងបាយ
លោកវេជ្ជបណ្ឌិត ងី ម៉េង ប្រធានកម្មវិធីជាតិសុខភាពភ្នែកបានពន្យល់ពីរបៀបព្យាបាលជំងឺភ្នែកឡើងបាយដូចតទៅ ៖
ករណីខ្លះ គ្រូពេទ្យអាចព្យាបាលដោយប្រើថ្នាំបន្ដក់ភ្នែក ដើម្បីព្យាយាមបង្អន់ភាពធ្ងន់ធ្ងររបស់បាយភ្នែក តែមិនមានថ្នាំប្រភេទណាអាចកាត់បន្ថយ ឬបញ្ឈប់បាយភ្នែកបានទេ ពេលកែវភ្នែកស្រអាប់ ឬស្រវាំង ។ ការវះកាត់ ឬការបំបែកបាយភ្នែកជាវិធីព្យាបាលដែលជួយធ្វើឱ្យកែវភ្នែករបស់អ្នកជំងឺឡើងថ្លា និងមើលឃើញបានដូចដើម ។ ការព្យាបាលត្រូវបែងចែកទៅតាមដំណាក់កាល ដំបូងគ្រូពេទ្យឯកទេសធ្វើរោគវិនិច្ឆ័យលើគ្រាប់ភ្នែកយ៉ាងលម្អិត ដើម្បីរកមើលទីតាំង និងភាពធ្ងន់ធ្ងររបស់បាយភ្នែក ក្រៅពីនេះ វេជ្ជបណ្ឌិតត្រូវការវាស់សម្ពាធទឹកភ្នែក និងពិនិត្យទឹកចាហួយភ្នែកជាមួយសរសៃប្រសាទភ្នែកយ៉ាងលម្អិត ដើម្បីឱ្យដឹងច្បាស់ថា បាយភ្នែកជាមូលហេតុមួយដែលធ្វើឱ្យកែវភ្នែកឡើងស្រអាប់ស្រវាំង ឬមានជំងឺផ្សេងៗមកផ្សំជាមួយ។ វិធីបកបាយភ្នែកដែលនិយមប្រើជាទូទៅមាន២របៀប ក្រោយពីការយកបំណែកបាយភ្នែកចេញហើយ វេជ្ជបណ្ឌិតនឹងដាក់កែវភ្នែកសិប្បនិម្មិតជំនួសដើម្បីឱ្យមើលឃើញច្បាស់ធម្មតា ។
១-វិធីបំបែកបាយភ្នែកដោយប្រើ LILTRA SOUND (Phacoemulsification Machine) ការរំលាយបាយភ្នែកដោយប្រើ LILTRASOUND ជាវិធីចុងក្រោយដែលទទួលបានការពេញនិយមយ៉ាងខ្លាំង ក្នុងការបំបែកបាយភ្នែក តែគួរបន្ថែមការប្រុងប្រយ័ត្នក្នុងការថែរក្សា ។ ត្រូវធ្វើការសម្អាតគ្រាប់ភ្នែកដោយទទួលទានថ្នាំ និងបន្ដក់ថ្នាំតាមការណែនាំរបស់វេជ្ជបណ្ឌិត ។
២-ការវះកាត់ភ្នែកឡើងបាយបែបបើកមុខរបួសធំៈ ដោយបើកមុខរបួសប្រមាណជា១០មីល្លីម៉ែត្រ ដើម្បីយកគ្រាប់កែវភ្នែកដែលឡើងបាយនោះចេញ រួចគ្រូពេទ្យនឹងដាក់កែវភ្នែកសិប្បនិម្មិតចូលទៅជំនួស ក្រោយមកទើបដេរបិទមុខរបួសដោយប្រើចេសនីឡុងប្រភេទពិសេស ។
លោកវេជ្ជបណ្ឌិតបានបញ្ជាក់ថា មានសំណួរចោទសួរថា ហេតុអ្វីត្រូវដាក់កែវភ្នែកសិប្បនិម្មិត IOL (Intra Ocular Lens)ជំនួស? ដោយហេតុថា ក្រោយពីការបញ្ចេញបំណែកបាយភ្នែកអស់ហើយ មិនមានកែវភ្នែកបញ្ចេញពន្លឺជាហេតុធ្វើឱ្យភ្នែកនៅស្រវាំង ។ ដូចនេះ ទើបគ្រូពេទ្យដាក់កែវភ្នែកសិប្បនិម្មិតជំនួសដើម្បីឱ្យមើលឃើញធម្មតា ។ កែវភ្នែកសិប្បនិម្មិតនេះមានអាយុកាលយូររហូតមួយជីវិត ។ បច្ចុប្បន្ន គេប្រើកែវភ្នែកសិប្បនិម្មិតពណ៌លឿង ដើម្បីជួយទប់ពន្លឺព្រះអាទិត្យ និងការពារសរសៃប្រសាទបាតភ្នែក ព្រមទាំងធ្វើឱ្យគំហើញកាន់តែប្រសើរ ៕
ចែករំលែកព័តមាននេះ