រាជធានីភ្នំពេញ ៖ អ្នកនាំពាក្យរាជរដ្ឋាភិបាលលោក ផៃ ស៊ីផាន បានហៅទង្វើរបស់លោក សម រង្ស៊ី និងគូកនមួយចំនួន ព្រមទាំងពលរដ្ឋខ្មែរ -អាមេរិកាំង ដែលបាននាំគ្នាធ្វើបាតុកម្មនៅលើទឹកដីអាមេរិក ដើម្បីឲ្យអាមេរិកប្រឆាំងនឹងសម្តេចតេជោ ហ៊ុន សែន នាយករដ្ឋមន្ត្រីកម្ពុជា គឺជាពួកបំផ្លាញជាតិទៅវិញទេ មិនមែនធ្វើឡើង ដើម្បីជាតិ ដូចពួកគេអះអាងនោះទេ ។
ការលើកឡើងរបស់អ្នកនាំពាក្យរាជរដ្ឋាភិបាលបន្ទាប់ពីលោកស្រី មួរ សុខហួរ អតីត អនុប្រធានគណបក្សសង្គ្រោះជាតិ និងជាមនុស្សជំនិតរបស់លោក សម រង្ស៊ី បានលើកឡើងលើបណ្តាញសង្គមហ្វេសប៊ុក កាលពីថ្ងៃទី១៧ ខែកក្កដនេះឲ្យដឹងថា «លោកប្រធានស្តីទីសម រង្ស៊ី ខ្ញុំជាមួយលោកតំណាងរាស្ត្រ ស្ទីវ ឆាបុត លោកតំណាងរាស្ត្រ អាឡាន់ ឡូវ៉ាន់ ថល តំណាងរាស្ត្រសហរដ្ឋអាមេរិកបានចូលរួមជាមួយពលរដ្ឋខ្មែរ- អាមេរិកាំងធ្វើបាតុកម្ម នៅមុខវិមានរដ្ឋសភាជាតិសហរដ្ឋអាមេរិក ដើម្បីធ្វើការទាមទារឲ្យអាមេរិកប្រឆាំងនឹងរបបផ្តាច់ការ ហ៊ុន សែន ដែលបានបំផ្លាញលទ្ធិប្រជាធិបតេយ្យនៅកម្ពុជាជំរុញឲ្យមានដំណោះស្រាយនយោបាយ និងឲ្យមានការស្តារលទ្ធិប្រជាធិបតេយ្យនៅកម្ពុជា» ។
យ៉ាងណាក្តីរាល់ការទាមទារនេះ ត្រូវបានលោក ផៃ ស៊ីផាន តបទៅវិញនៅព្រឹកថ្ងៃទី១៨ កក្កដាថា លទ្ធិប្រជាធិបតេយ្យនៅកម្ពុជាមិនបាច់ស្តាទេ ព្រោះមានដំណើរការល្អហើយ ទាំងការគោរពសិទ្ធិមនុស្សជាដើម ។ លោកថា អ្នកចូលរួមធ្វើបាតុកម្មទាមទារឲ្យអាមេរិកប្រឆាំងកម្ពុជាមិនដល់២០០នាក់ទេ ។ លោកបានហៅបាតុកម្មនោះថា ជាបាតុកម្មខ្យល់ប៉ុណ្ណោះ គឺគ្មានទម្ងន់អ្វីមកកៀបស ង្កត់មកលើកម្ពុជាឡើយ ។ លោកអ្នកនាំពាក្យបន្ថែមថា កម្ពុជាបានដើរលើផ្លូវត្រូវ ប៉ុន្តែក្រុមនោះទៅ វិញទេ ដែលមិនមកចូលរួមចំណែករួមសុខទុក្ខជាមួយពលរដ្ឋកម្ពុជា គឺបានតែស្រែកពីក្រៅប្រទេសមកដោយឥតប្រយោជន៍ ។ អ្នកនាំពាក្យរាជ្យរដ្ឋាភិបាលបានបញ្ជាក់ថា «រាជរដ្ឋាភិបាលបានប្រមូលគៀងគរខ្មែរគ្រប់ទិសទីឲ្យមានការរួបរួម ដើម្បីជាតិ និងជាធនធានរបស់សង្គមជាតិ ។ ប៉ុន្តែជាពួកគេ មកនាំគ្នាបំផ្លាញជាតិទៅវិញ ហើយពួកគេមិនមែនជាធនធាន ដើម្បីជួយកសាងជាតិទេ» ។ ជាមួយគ្នានោះដែរអ្នកនាំពាក្យរាជរដ្ឋាភិបាលបានរំលឹកពីអតីតកាលថា ពួកគេមិនហ៊ាន និយាយមួយម៉ាត់នៅពេលកងកម្លាំងរបស់ថៃដែលដឹកនាំដោយអតីតនាយករដ្ឋមន្ត្រីថៃ អាប់ភីស៊ី វីចាជីវ៉ា ចូលវាយលូកប្រាសាទព្រះវិហារ ។
ចំណែកលោក សុខ ឥសាន អ្នកនាំពាក្យគណបក្សប្រជាជនកម្ពុជាបាន ឲ្យដឹងតាមប្រព័ន្ធតេឡេក្រាមថា ទណ្ឌិតរត់ចោលស្រុក និងបរិវារសប្បាយណាស់ ពេលឃើញបរទេសសម្លាប់ខ្មែរ ។ លោកបន្តថា នេះជាទង្វើក្បត់ជាតិរបស់មេក្រុមឧទ្ទាមក្រៅច្បាប់ ជាការបិទផ្លូវមិនអាចចូលស្រុកបាន ។ លោកបន្ថែមប្រជាជនកម្ពុជាជិតកន្លះនគរលែងមានជំនឿលើមេក្រុមឧទ្ទាមក្រៅច្បាប់ហើយ ចំណែកមេបក្សប្រឆាំងថា មានប្រជាជនកន្លះនគរគាំទ្រខ្លួននោះ គឺលែងមានកន្លះនគរទៀតហើយ នៅសល់តិចតួចបំផុតដែលងប់ងល់នឹងការភូតភររបស់មេខ្លួន ។
ទាក់ទិននឹងការស្នើច្បាប់របស់សភាអាមេរិកវិញ ត្រូវលោកផៃ ស៊ីផាន បានលើកឡើងថា មានចរិតនយោបាយ ។ លោកថា ជាការគួរឱ្យភ្ញាក់ផ្អើល និងសោកស្តាយនៅពេលដែលខ្ញុំទទួលបានព័ត៌មាន តាមរយៈសារព័ត៌មានស្តីពីសេចក្តីស្នើច្បាប់របស់សភាថ្នាក់ក្រោមអាមេរិកដែលបានបញ្ចប់ក្នុងនីតិវិធីរបស់ខ្លួន ។ លោកបញ្ជាក់ថា «ខ្ញុំចាត់ទុកច្បាប់នេះ មានចរិតនយោបាយ និងគោលបំណងប្រឆាំងទៅនឹងសុច្ឆន្ទៈនយោបាយរបស់ប្រជាជនកម្ពុជាដែលបានជ្រើសរើសមេដឹកនាំខ្លួនតាមផ្លូវច្បាប់ តាមរយៈដំណើរការបោះឆ្នោតប្រកបដោយសន្តិភាព និងប្រជាធិបតេយ្យ ។ លោកបន្ថែមថា ថ្នាក់ដឹកនាំនៃរាជរដ្ឋាភិបាល និងប្រជាជនកម្ពុជាមិនអាចទទួលយកបានទេ ដោយសារតែសេចក្តីស្នើច្បាប់នេះបានធ្វើឡើងផ្អែកទៅលើការចោទប្រកាន់ ដោយគ្មានមូលដ្ឋានច្បាស់លាស់បង្ហាញតែមហិច្ឆិតានយោបាយជាប្រវត្តិប្រឆាំងនឹងរដ្ឋាភិបាលកម្ពុជាតែបុណ្ណោះ ។
លោកសង្កត់ធ្ងន់ថា ផលរំពឹងទុករបស់ខ្ញុំ គឺព្រឹទ្ធសភាអាមេរិកក៏ដូចជា ប្រធានាធិ បតីសហរដ្ឋអាមេរិក ដែលជាអំណាចនីតិប្រតិបត្តិច្បាស់ជាយកចិត្តទុកដាក់ចំពោះទំនាក់ទំនងល្អ និងកិច្ចសហប្រតិបត្តិការអន្តរជាតិដែលប្រជាជាតិទាំងពីររបស់យើងបាននឹងកំពុងតែខិតខំប្រឹងប្រែង ដើម្បីបន្តរក្សាផលប្រយោជន៍រួមគ្នាជាដាច់ខាត ៕ កែសម្រួលដោយ ៖ សុឃាក់
ចែករំលែកព័តមាននេះ