ខេត្តឧត្តរមានជ័យ ៖ អ្នកភូមិនិយាយថា ក្រោយពីភ្ជាប់ពាក្យរួចមក គេសង្កេតឃើញស្ត្រីជាម្តាយកូនស្រីនាំកូនដើរស្រោចទឹកនៅតាមទីអារាមនានាដោយអះអាងថា កូនស្រីរបស់គាត់ត្រូវគេដាក់ស្នេហ៍ទើបចេះតែធ្វើអ្វីប្លែកៗ ហើយបន្ទាប់មកស្រាប់តែយកកូនស្រីទៅបង្ខាំងទុក ដោយដាក់ច្រវាក់នៅក្នុងផ្ទះខាងដន្លងមួយទៀតនៅឯឃុំបាក់អន្លូង ស្រុកត្រពាំងប្រាសាទ ។…
ខេត្តឧត្តរមានជ័យ ៖ អ្នកភូមិនិយាយថា ក្រោយពីភ្ជាប់ពាក្យរួចមក គេសង្កេតឃើញស្ត្រីជាម្តាយកូនស្រីនាំកូនដើរស្រោចទឹកនៅតាមទីអារាមនានាដោយអះអាងថា កូនស្រីរបស់គាត់ត្រូវគេដាក់ស្នេហ៍ទើបចេះតែធ្វើអ្វីប្លែកៗ ហើយបន្ទាប់មកស្រាប់តែយកកូនស្រីទៅបង្ខាំងទុក ដោយដាក់ច្រវាក់នៅក្នុងផ្ទះខាងដន្លងមួយទៀតនៅឯឃុំបាក់អន្លូង ស្រុកត្រពាំងប្រាសាទ ។
ប៉ុន្តែក្រោយមក កូនស្រីរត់រួចក៏ទៅពួនសម្ងំនៅក្នុងព្រៃ ហើយទូរស័ព្ទមកបងស្រីបង្កើតឱ្យទៅយក តែបងស្រីបានទូរស័ព្ទប្តឹងលោកមេភូមិតាសំ ពីការដែលម្តាយបង្ខាំងប្អូនស្រី ហើយលោកមេភូមិទូរស័ព្ទទៅនគរបាល ទើបមានការភ្ញាក់ផ្អើល ហើយនគរបាលក៏ទៅនាំខ្លួនកូនស្រីនោះមកសាកសួរ និងឈានទៅឃាត់ខ្លួនស្ត្រីជាម្តាយតែម្តង ។
សូមបញ្ជាក់ថា រឿងរ៉ាវស្មានមិនដល់មួយ រហូតលោកព្រះរាជអាជ្ញាអមសាលាដំបូងខេត្តចេញដីកាឃាត់ខ្លួនស្ត្រីម្នាក់ ដែលជាប់ពាក់ព័ន្ធពីបទបង្ខាំងកូនស្រីបង្កើតដាក់ច្រវាក់នៅក្នុងផ្ទះអស់រយៈពេលមួយថ្ងៃមួយយប់ កាលពីវេលាម៉ោង៤និង៤៥នាទីរសៀលថ្ងៃទី១៤ ខែកក្កដា ។ ហេតុការណ៍នេះកើតឡើងនៅភូមិតាសំ ឃុំអូរស្វាយ ស្រុកត្រពាំងប្រាសាទ ។ ស្ត្រីដែលនគរបាលឃាត់ខ្លួននេះឈ្មោះ ហៀង ម៉ុម អាយុ៤៦ឆ្នាំ មានប្តីឈ្មោះ សុំ វ៉ាន និង មានកូន៧នាក់ ក្នុងនោះស្រី៤នាក់ ជាកសិករ និងមានទីលំនៅក្នុងភូមិ ឃុំ ខាងលើ ។
យោងតាមប្រភពព័ត៌មានពីអ្នកភូមិរស់នៅជិតខាងឱ្យដឹងថា កូនស្រីរបស់ស្ត្រីរូបនេះឈ្មោះ សុំ ស្រីនិច អាយុ១៩ឆ្នាំ បានជាប់ចិត្តស្នេហាជាមួយយុវជនម្នាក់នៅភូមិអភិវឌ្ឍន៍ ឃុំអូរស្វាយស្រុកត្រពាំង ប្រាសាទ ហើយបានចុះចេញពីផ្ទះរបស់ខ្លួនទៅរស់នៅផ្ទះខាងប្រុស ។ ក្រោយមកស្ត្រីជាម្តាយកូនស្រីនេះបានទៅផ្ទះខាងប្រុសធ្វើការសម្របសម្រួលគ្នា ហើយខណៈនោះម្តាយឪពុកខាងប្រុសបានព្រមព្រៀងភ្ជាប់ពាក្យចូលស្តីដណ្តឹងទៅតាមប្រពៃណី ដោយផ្តល់លុយ៥០០ដុល្លារជាថ្លៃទឹកដោះ ។
ការព្រមព្រៀងក៏ឈានដល់ការរៀបចំពិធីភ្ជាប់ពាក្យ ដោយមានអញ្ជើញភ្ញៀវពីទីជិតទីឆ្ងាយ ព្រមទាំងមានតាអាចារ្យចៅមហាចូលរួមយ៉ាងច្រើនកុះករផងដែរ និងរៀបមង្គលការកូនប្រុសកូនស្រីនៅក្នុងអំឡុងខែ វិច្ឆិកាខាងមុខ ។
មន្ត្រីនគរបាលប៉ុស្គិ៍អូរស្វាយបានឱ្យដឹងថា ក្រោយពីបានសាកសួរ និងស្តាប់ការបំភ្លឺរួចមក សមត្ថកិច្ចបានរាយការណ៍សុំយោបល់ទៅលោកព្រះរាជអាជ្ញាអមសាលាដំបូងខេត្ត ទើបលោកព្រះរាជអាជ្ញាចេញដីកាឱ្យនាំខ្លួនស្ត្រីជាម្តាយបញ្ជូនទៅសាលាដំបូងខេត្ត ចាត់ការទៅតាមនីតិវិធី ៕ (សម្រួលដោយ៖ ស្រីណា)
ចែករំលែកព័តមាននេះ