ខេត្តព្រៃវែង ៖ «ធ្វើស្រែប្រវ៉ាស់មេឃ អត់ភ្លៀងក៏ពិបាក លុះភ្លៀងច្រើនក៏ពិបាក មិនដឹងធ្វើម៉េចទេខ្ញុំ» ។នេះ គឺជាសម្តីពិតរបស់ប្រជាកសិករនៅឃុំច្រេះ ស្រុកមេសាង ដែលកំពុងតែរងគ្រោះដោយសារតែជំនន់ទឹកភ្លៀង…
ខេត្តព្រៃវែង ៖ «ធ្វើស្រែប្រវ៉ាស់មេឃ អត់ភ្លៀងក៏ពិបាក លុះភ្លៀងច្រើនក៏ពិបាក មិនដឹងធ្វើម៉េចទេខ្ញុំ» ។នេះ គឺជាសម្តីពិតរបស់ប្រជាកសិករនៅឃុំច្រេះ ស្រុកមេសាង ដែលកំពុងតែរងគ្រោះដោយសារតែជំនន់ទឹកភ្លៀង ធ្វើឱ្យលិចរលួយសំណាបអស់ ។
ប្រជាកសិករទាំងនោះបានប្រាប់កោះសន្តិភាពថា នៅដើមរដូវវស្សានេះ ឃុំរបស់ពួកគាត់ភ្លៀងធ្លាក់រាល់ថ្ងៃ សំណាបរបស់ពួកគាត់ដែលទើបតែសាបព្រួសរួច លូតឡើងមិនរួចត្រូវទឹកជន់លិចរលួយស្ទើអស់ អ្នកខ្លះនាំគ្នាព្រួស២ទៅ៣ដង ទើបសំណាបដុះផុតទឹក ហើយត្រូវដើរជួសកន្លែងរង្វើលទៀត អស់ទុនច្រើនណាស់ ហើយអ្នកដែលរងផលប៉ះពាល់ដោយសារតែជំនន់ទឹកភ្លៀងនេះមានចំនួន៥ភូមិ គឺភូមិពោន ព្រហ៊ារ ត្រពាំងស្គន់ ត្រោក និងភូមិបឹង។
ប្រជាកសិករទាំងនោះបានបញ្ជាក់ថា ការងារធ្វើស្រែ គឺជាមុខរបរដែលពួកគាត់ប្រកបយូរឆ្នាំមកហើយ ដោយឆ្នាំមុនៗមេឃអំណោយផល នៅដើមរដូវវស្សាម្នាក់ៗព្រួសគ្រាប់ពូជតែម្តងស្រូវដុះពេញស្រែ តែឆ្នាំនេះគ្រាន់តែព្រួសពូជហើយភ្លាម សំណាបចាប់លូត ភ្លៀងជ្រំយកតែម្តង ទឹកភ្លៀងជន់លិចភ្លឺស្រែលិចវាលអស់ ពួកគាត់មិនដឹងបូមទឹកចេញទៅណា មានតែទុករហូតទឹកស្រកអស់វិញ សំណាបរលួយអស់ នាំគ្នាព្រួសពូជម្តងទៀត អ្នកខ្លះព្រួសពូជស្រូវ២ដង ខ្លះ៣ដងទំរាំបានសំណាបដុះផុតទឹក ហើយដុះរង្វើលៗមិនល្អទៀត ទើបធ្វើអោយពួកគាត់បារម្មណ៌ខ្លាចស្រូវអោយផលមិនបានច្រើន ធ្វើអោយខាតទាំងថវិកាខាតទាំងកំលាំង និងប៉ះពាល់ដល់ជីវភាពគ្រួសារថែមទៀត។
ប្រជាកសិករនៅឃុំច្រេះ ស្រុកមេសាង ខេត្តព្រៃវែង បានលើកឡើងថា ពួកគាត់ចង់ធ្វើស្រែឲ្យបានច្រើនដងក្នុង១ឆ្នាំ ព្រោះមិនចង់ទុកដីទំនេរចោល តែតំបន់របស់ពួកគាត់គ្មានប្រភពទឹកទេ ការធ្វើស្រែត្រូវប្រវ៉ាស់និងមេឃ អ្នកមានលទ្ធភាពត្រូវបុកអណ្តូងជំនួយ បើគិតពីថ្លៃចំណាយ ទាំងថ្លៃប្រេង ពូជ ជី និងថ្នាំកម្ចាត់សត្វល្អិតគ្រប់បែបយ៉ាង គឺចំណាយច្រើនណាស់។ ឆ្នាំមុនៗស្រូវបានថ្លៃគួរសម ១គីឡូក្រាមលក់បាន៧០០ទៅ៨០០រៀល ច្រូតកាត់ប្រមូលផលហើយ លក់ទូទាត់ប្រាក់ចំណាយ ឃើញសល់ប្រាក់ចំណេញបន្តិចបន្តួចដែរ ប៉ុន្តែឆ្នាំនេះ រងគ្រោះដោយជំនន់ទឹកភ្លៀងផង ហើយថែមទាំងតម្លៃស្រូវចុះថោកខ្លាំងទៀត ១គីឡូក្រាមបានតែ៦០០រៀលប៉ុណ្ណោះ ពួកគាត់ខ្លាចតែមិនរួចខ្លួនទេមើលទៅឆ្នាំនេះ ។ (សម្រួលដោយ៖ ស្រីណា)
ចែករំលែកព័តមាននេះ