ខេត្តបាត់ដំបង ៖ បើតាមសេចក្តីរាយការណ៍បឋមបានឱ្យដឹងថា សាកសពបុរសម្នាក់ដែលសភាពស្អុយរលួយទៅហើយ ត្រូវបានអ្នកភូមិប្រទះឃើញ បង្កឱ្យមានការភ្ញាក់ផ្អើលកាលពី ម៉ោង២និង៣០នាទីរសៀល ថ្ងៃទី១៦ ខែកក្កដា ឆ្នាំ២០១៩ នៅក្បែរមាត់ស្រះក្នុងចំការមួយកន្លែង ស្ថិតក្នុងភូមិព្រៃទទឹង ឃុំឆ្នាល់មាន់ ស្រុកគាស់ក្រឡ។
យោងតាមរបាយការណ៍បឋមរបស់សមត្ថកិច្ចបានឲ្យដឹងថា សាកសពខាងលើនោះឈ្មោះ ស៊ុន ស៊ីម ភេទប្រុស អាយុ៥៤ឆ្នាំ រស់នៅចំណុចឆ្លាក ភូមិព្រៃទទឹង ឃុំឆ្នាល់មាន់ ស្រុកគាស់ក្រឡ។ ហើយជនរងគ្រោះត្រូវម្ចាស់ចំការផ្ទាល់ជាអ្នកប្រទះឃើញ ទើបមានការភ្ញាក់ផ្អើល និងរាយការណ៍ប្រាប់សមត្ថកិច្ចភ្លាមៗតែម្ដង។
បើតាមព័ត៌មានពីក្រុមគ្រួសារថា ជនរងគ្រោះរូបនេះបានដើរបាត់ដំណឹងពីផ្ទះប្រមាណ១០ថ្ងៃកន្លងមកហើយ មុនពេលប្រទះឃើញក្នុងសភាពបែបនេះ។ សមត្ថកិច្ចហាក់មិនទាន់ធ្វើការសន្និដ្ឋានឲ្យជាក់លាក់អំពីមូលហេតុនៃការស្លាប់របស់ជនរងគ្រោះរូបនេះនៅឡើយទេ។ ប៉ុន្តែការសន្និដ្ឋានជាបឋមរបស់មន្ត្រីជំនាញដែលបានត្រួតពិនិត្យ ដោយយោងតាមការបំភ្លឺខ្លះៗពីសាច់ញាតិថា ជនរងគ្រោះទំនងអាចស្លាប់ដោយសារខ្យល់គរ តែយ៉ាងណាមន្ត្រីជំនាញនៅតែបន្តការស្រាវជ្រាវនៅឡើយ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។ (កែសម្រួលដោយ ៖ បុប្ផា)
ចែករំលែកព័តមាននេះ