ប្រទេសបារាំង ៖ យោងតាមប៉ូលិសក្រុងប៉ារីសថា កងកម្លាំងសន្តិសុខបានចាប់ខ្លួនមនុស្ស១៥២នាក់ ខាងក្រៅការហែក្បួនព្យុហៈយាត្រាថ្ងៃបុណ្យជាតិបារាំង១៤កក្កដា។ ចំំណែកអយ្យការក្រុងប៉ារីសនិយាយថា ក្នុងចំណោមអ្នកត្រូវចាប់ខ្លួនទាំងនេះ មានអ្នកតវ៉ាអាវកាក់លឿង៣នាក់។ ក្នុងចំណោមអ្នកទាំងបី ២នាក់ត្រូវឃុំឃាំងពីបទរៀបចំបាតុកម្មដោយខុសច្បាប់។ ក្រៅពីអ្នកត្រូវចាប់ខ្លួនមនុស្សច្រើននាក់ក៏រងរបួសដែរ ពេលប៉ះទង្គិចគ្នារវាងពួកបាតុករនិងកងកម្លាំងប៉ូលិសនៅវិមានCHAMPS-ELYSEES។
កាលពីថ្ងៃទី១៤កក្កដាពួកអាវកាក់លឿងជាច្រើនសិបនាក់ បានផ្គើនចំពោះប្រធានាធិបតី លោកអេម៉ានុយអែលម៉ាក្រូនពេលលោកចុះពីរថយន្តCOMMANDANT CARមួយគ្រឿង នៅមហាវិថី នៃវិមានCHAMPS-ELYSEES មុនពេលក្បួនព្យុហៈយាត្រាយោធាមួយ។
ពួកអាវកាក់លឿងជាច្រើនសិបនាក់ ចែកជាក្រុមតូចៗ បានប៉ុនប៉ងធ្វើបាតុកម្មជាច្រើនលើកតាមដងវិថីនានា ជុំវិញវិមានCHAMPS-ELYSEES ក្នុងពេលនិងក្រោយពេលព្យុហៈយាត្រា តែពួកគេ ត្រូវបានរារាំងភ្លាមៗដោយកងកម្លាំងប៉ូលិសដែលឡោមព័ទ្ធពួគគេ។
នាយប់ថ្ងៃទី១៤កក្កដានោះការសប្បាយរបស់ពួកអ្នកគាំទ្រក្រុមបាល់ទាត់អាល់ហ្សេរីដែលឈ្នះ នាំឲ្យមានការប៉ះទង្គិចគ្នារវាងពួកយុវជននិងកងកម្លាំងប៉ូលិសនៅក្រុងលីយ៉ុង ម៉ាសីនិងនៅCHAMPS-ELYSEES។ ព្រឹកថ្ងៃទី១៥កក្កដា ក្រសួងមហាផ្ទៃបារាំងរៀបរាប់ពីមនុស្ស២៨២នាក់ត្រូវចាប់ខ្លួននៅទូទាំងប្រទេសបារាំង ក្នុងនោះ២៤៩នាក់ត្រូវឃុំខ្លួន។ ពួកអ្នកពន្លត់ភ្លើងលើកឡើងពីរថយន្តច្រើនសិបគ្រឿងត្រូវដុតបំផ្លាញ នៅក្រុងលីយ៉ុងព្រមទាំងនៅបណ្ដាទីក្រុងជិតខាង៕ (កែសម្រួលដោយ ៖ បុប្ផា)
ចែករំលែកព័តមាននេះ