ខេត្តពោធិ៍សាត់ ៖ រថយន្តឡង់គ្រីស្សរ័មួយគ្រឿងដែលលួចដឹកឈើគ្រញូងខុសច្បាប់ បានត្រូវកងរាជអាវុធហត្ថលើផ្ទៃប្រទេសស្ទាក់ចាប់បានកាលពីវេលាម៉ោង៧និង៤៥នាទីយប់ ថ្ងៃទី១៨ មីនា ឆ្នាំ២០១១ ត្រង់ចំណុចភូមិព្រែក១ ឃុំសំរោង ស្រុកភ្នំក្រវាញ ខេត្តពោធិ៍សាត់។ រថយន្តនោះព៌ណសំបកឪឡឹក ពាក់ស្លាកលេខ ភ្នំពេញ2F-3475 ផ្ទុកឈើគ្រញូងចំនួន២៧៦ ដុំស្មើនឹង១.០៨៨ម៉ែត្រគូប អ្នកបើកបររត់គេចខ្លួនបាត់។
តាមប្រភពពីលោកព្រិន្ទបាលឯក ហេង ហៃ ប្រធានក្រុមកងរាជអាវុធហត្ថលើផ្ទៃប្រទេស ដែលដឹកនាំកំលាំងបង្ក្រាបផ្ទាល់ឲ្យដឹងថា នៅយប់នោះ បន្ទាប់ពីភ្នាក់ងារផ្ដល់ព័ត័មានថា មានរថយន្តប្រភេទឡង់គ្រីស្សរ័មួយគ្រឿង ពាក់ស្លាកលេខខាងលើលួចផ្ទុកឈើគ្រញូងកំពុងធ្វើដំណើរពីស្រុកវាលវែងឆ្ពោះទៅកាន់ផ្លូវជាតិលេខ៥ ភ្លាមនោះលោកបានចាត់កំលាំងចល័តចាំស្ទាក់ជាបន្ទាន់។ លុះនៅវេលាម៉ោងជិត៨យប់ ទើបឃើញរថយន្តនោះធ្វើដំណើរមកដល់ភូមិព្រែក១ ឃុំសំរោង ស្រុកភ្នំក្រវាញ។ ឃើញដូច្នេះលោកបានបើករថយន្តប្រដេញតាមពីក្រោយជាប់រហូតចំងាយប្រហែលមួយគីឡូម៉ែត្រ រថយន្តនោះទំនងជាដឹងថា ក្រុមរបស់លោកជាសមត្ថកិច្ចក៏បត់ចូលក្នុងព្រៃរួចឈប់រថយន្តរត់គេចខ្លួនបាត់តែម្ដង ដែលជនល្មើសមានគ្នាចំនួន៣នាក់។ នៅពេលពិនិត្យក្នុងរថយន្តឃើញមានដឹកឈើប្រណីតក៏បានយកមករក្សាទុកនៅផ្នែករដ្ឋបាលព្រៃឈើស្រុកភ្នំក្រវាញទាំងយប់ លុះព្រឹកឡើងទើបធ្វើពិធីប្រគល់ជាផ្លូវការទាំងរថយន្ត និងឈើគ្រញូងចំនួន២៧៦ដុំ ស្មើនឹង១.០៨៨ម៉ែត្រគូបនោះ។
លោកហេង ហៃ បន្តថា អ្នកបើកបររត់គេចខ្លួនក៏ពិតមែន ប៉ុន្តែក្នុងរថយន្តបន្សល់ទុកវត្ថុតាងគឺអាវប៉ារ៉ាមានស្លាកឈ្មោះសួន សំអឿន ឋានន្តរស័ក្តិអនុសេនីយ៍ឯកមិនដឹងអង្គភាពណាទេ ប៉ុន្តែក្នុងនាមបណ្ណ័ដាក់ថាក្រុមហ៊ុនដឹកជញ្ជូនសួន សំអឿន មានគ្រឿងចក្រសំរាប់ជួលទទួលដឹកដី ថ្ម ក្រួស និងខ្សាច់គ្រប់ប្រភេទដែលមានអាសយដ្ឋានភូមិខ្នាចរមាស ឃុំបឹងខ្នារ ស្រុកបាកាន។ លោកជា ហួត នាយផ្នែករដ្ឋបាលព្រៃឈើ ស្រុកភ្នំក្រវាញបានឱ្យដឹងថា ឥឡូវនេះយើងកំពុងប្រកាសឲ្យឈ្មោះសួន សំអឿន ចូលខ្លួនមកបង់ការផាកពិន័យដើម្បីយករថយន្តទៅវិញ។ បើក្នុងរយៈពេលមួយខែឈ្មោះសួន សំអឿន មិនចូលខ្លួនមកដោះស្រាយទេ យើងនឹងបញ្ជូនសំណុំរឿងទៅតុលាការដើម្បីចាត់ការតាមនីតិវិធី៕
ចែករំលែកព័តមាននេះ