ខេត្ដកំពង់ឆ្នាំង ៖ ព្រឹកនេះនៅព្រលានយន្ដហោះខេត្ដកំពង់ឆ្នាំងមានការបាញ់សាកល្បងគ្រាប់ “BM” ហៅកាំជ្រួចហ្វូងប្រមាណជាង២០០គ្រាប់ ជាគ្រាប់ពិត ដោយមានការអញ្ជើញចូលរួមពីមន្ដ្រីយោធាជាន់ខ្ពស់នៃក្រសួងការពារជាតិ និងមន្ដ្រីអ្នកមុខអ្នកការជាច្រើនរូបទៀត ។
លោកថោង ស៊ីម ប្រធានក្រុមប្រឹក្សាឃុំក្រាំងលាវ ដែលជាភូមិសាស្ដ្រនៃការបាញ់សាកល្បងគ្រាប់ BM ពិត បានឱ្យដឹងថា តាមសេចក្ដីជូនដំណឹងរបស់លោកទូច ម៉ារីម អភិបាលខេត្ដលេខ៩៥ ស.ជ.ណ ចុះ ថ្ងៃទី២២ កុម្ភៈ បានធ្វើការណែនាំហាមមិនឱ្យប្រជាពលរដ្ឋចេញចូលប្រកបរបរអាជីវកម្មនៅព្រលានយន្ដហោះដែលជាចំណុចបាញ់គ្រាប់ពិត និងចំណុចគ្រាប់ធ្លាក់ទេ ដោយលោកបានបញ្ជាក់ថា ចំណុចបាញ់គ្រាប់ពិត គឺស្ថិតនៅព្រលានយន្ដហោះខេត្ដ ស្ថិតនៅក្នុងភូមិសាស្ដ្រឃុំក្រាំងលាវ ចំណែកចំណុចគ្រាប់ដែលត្រូវបានកំណត់ឱ្យធ្លាក់ គឺនៅភ្នំមួយចំនួនក្នុងស្រុកទឹកផុសមានចំងាយប្រមាណជាង២០គីឡូម៉ែត្រ ពីទីតាំងដែលបាញ់ ។
យោងតាមសេចក្ដីជូនដំណឹងដដែលបានបញ្ជាក់ថា ប្រជាពលរដ្ឋត្រូវហាមចូលទៅចំណុចគ្រាប់ធ្លាក់ដែលមាន៣ចំណុច គឺ ចំណុចទី១ E1 ភ្នំពាមលោក ចតុកោណ X៣៥.៤២ និង Z៣៨.៤៣ ។ ចំណុចទី២ E2 ភ្នំចំឡឹង ចតុកោណ X២៧.៣៥ និង Z៣៩.៤៤ និងចំណុចទី៣ គឺ E3 ភ្នំទឹកចែក និងភ្នំកន្ធាយធំ ចតុកោណ X១៩.២៧ និង Y៣៩.៤៦។ លោកបានបន្ដថា ក្រោយពីបានទទួលសេចក្ដីជូនដំណឹងនេះ លោកបានធ្វើការផ្សព្វផ្សាយហាមប្រាមប្រជាពលរដ្ឋមិនឱ្យទៅចំណុចហាមឃាត់ខាងលើជាដាច់ខាត ក្នុងរយៈពេល៣ថ្ងៃ គឺថ្ងៃទី២-៣ និងទី៤ មីនា ។
លោកទឹម សារ៉េត អភិបាលស្រុកទឹកផុស បានមានប្រសាសន៍ដែរថា នៅស្រុករបស់លោកគឺសមត្ថកិច្ចប៉ូលិសស្រុក ប៉ូលិសប៉ុស្ដិ៍បានផ្សព្វផ្សាយសេចក្ដីជូនដំណឹង ហាមប្រជាពលរដ្ឋដែលធ្លាប់ចូលព្រៃនៅចំណុចហាមឃាត់មានភ្នំពាមលោក ភ្នំចំឡឹង ភ្នំទឹកចែក និងភ្នំកន្ធាយធំ ដើម្បីបោចវល្លិ កាប់អុស ឬកាប់ឈើជាដើម សូមផ្អាកចាប់ពីថ្ងៃជូនដំណឹងរហូតផុតថ្ងៃទី៥ ខែមីនា ឆ្នាំ ២០១០ ។
ក្នុងវិធានការហាមឃាត់នេះដែរ មន្ដ្រីប៉ូលិសម្នាក់ទៀតបានដើរជាមួយមេភូមិមេឃុំ តាមផ្ទះហាមប្រជាពលរដ្ឋឡើងភ្នំដូចខាងលើ ឬធ្វើដំណើរឆ្លងកាត់ឬនៅក្បែរដាច់ខាត រយៈពេល៣ថ្ងៃនេះ គឺថ្ងៃទី២-៣-៤ មីនា ។ មិនត្រឹមប៉ុណ្ណោះ ប្រជាពលរដ្ឋដែលបានហាមហើយត្រូវឱ្យផ្ដិតមេដៃទទួលដឹងឮ និងគោរពការហាមជាដាច់ខាត ព្រោះក្រែងមានគ្រោះថ្នាក់ជាយថាហេតុពីការមិនគោរពបំរាមខាងលើ។ លោកអធិការរូបនោះបានបញ្ជាក់ថា នឹងមានការបំពងសម្លេង តាមរយៈឧទ្ធម្ភាគចក្រផងដែរ ពីបំរាមចូលព្រៃនៅរសៀលថ្ងៃទី២ មីនា នៅក្នុងភូមិសាស្ដ្រស្រុករបស់លោក ។
យោងតាមប្រភពជិតស្និទ្ធពីមន្ដ្រីយោធា ដែលរៀបចំការបាញ់ BM គ្រាប់ពិតនេះ បានឱ្យដឹងថា អាវុធធុន BM ឬហៅថា កាំជ្រួចហ្វូងនេះ នឹងបាញ់ចំនួនជាង២០០គ្រាប់ ដែលក្នុងមួយគ្រាប់មានតម្លៃពី១២០០ទៅ ៣៨០០ដុល្លារ ។
សក្ដានុពលរបស់កាំជ្រួច BM-21 ផលិតដោយអតីតសហភាពសូវៀត
កាំជ្រួចហ្វូង BM-21 ត្រូវបានផលិតឡើងដោយសហភាពសូវៀត នៅដើមទសវត្សឆ្នាំ ១៩៦០ ។ ពាក្យថា BM តំណាងឱ្យពាក្យជាភាសាសូវៀតថា “boyevaya mashina” ដែលភាសាអង់គ្លេសមានន័យថា “Combat vehicle” ប្រែជាភាសាខ្មែរថា “រថយន្ដប្រយុទ្ធ” ។ BM-21 មានចំនួន៤០កាណុង ប្រើប្រាស់ដោយដាក់លើជើងទំររថយន្ដមួយប្រភេទដែលរឹងមាំបំផុត។ សហភាពសូវៀត បានផលិតកាំភ្លើង BM-21 ដើម្បីជំនួសកាំភ្លើងធំ BM-14 ដែលមានលក្ខណៈចាស់ទៅហើយ។ កាណុងកាំជ្រួច BM-21 នីមួយៗ មានប្រវែង២,៨៧ម៉ែត្រ ត្រូវបានដាក់តំរៀបគ្នាលើរថយន្ដជើងទំរ។ ជាមួយគ្នានេះ រថយន្ដដែលជាជើងទំរកាំភ្លើងធំ BM-21 ប្រើម៉ាស៊ីនទាំងអស់រត់បានល្បឿន៧៥គីឡូម៉ែត្រក្នុងមួយម៉ោង ។
កាំភ្លើងធំ BM-21 អាចបាញ់ចេញក្នុងរយៈពេលតែ២០វិនាទីប៉ុណ្ណោះ ដោយបាញ់ម្ដងមួយក៏បាន បាញ់ម្ដងទាំងអស់ក៏បាននិងបានរយៈចំងាយជាង២០គីឡូម៉ែត្រ ។
ចែករំលែកព័តមាននេះ