អំពើហិង្សារវាងកងកម្លាំងសន្តិសុខជាមួយនឹងបាតុករប្រឆាំងរដ្ឋាភិបាលនៅប្រទេសស៊ីរីមានការកើនឡើងកាន់តែខ្លាំងកាលពីថ្ងៃទី២៣ មីនា កន្លងមក ញ៉ាំងឱ្យមានការប៉ះទង្គិចគ្នាបណ្តាលឱ្យស្លាប់មនុស្ស១៥នាក់ នៅក្រុង Daraa ។ តាមប្រភពព័ត៌មានថា ការប៉ះទង្គិចគ្នាបណ្តាលឱ្យស្លាប់មនុស្ស១៥នាក់នោះ ធ្វើឱ្យរដ្ឋាភិបាលបណ្តេញអភិបាលក្រុង Daraa ចេញពី
តំណែង។ ក្រុង Daraa ជាកន្លែងធ្វើបាតុកម្មប្រឆាំងរដ្ឋាភិបាលដ៏ក្តៅគគុក ។
តាមសកម្មជនសិទ្ធិមនុស្ស និងសាក្សីទាំងឡាយនិយាយថា មនុស្ស៧នាក់បានស្លាប់ភ្លាមៗ ខណៈពេលកងកម្លាំងសន្តិសុខព្យាយាមសម្រុកចូលតំបន់ដែលក្រុមបាតុករកាន់កាប់ដើម្បីទាមទារឱ្យរដ្ឋាភិបាលធ្វើកំណែទម្រង់ ។ ក្រោយមកបាតុករប្រហែល៣.០០០នាក់មកពីកន្លែងនានាប្រមូលផ្តុំគ្នានៅខាងក្រៅក្រុង Daraa ហើយប៉ះទង្គិចគ្នាជាមួយកងយោធាដែលមានភក្តីភាពចំពោះលោកប្រធានាធិបតី Bashar al-Assad បណ្តាលឱ្យស្លាប់មនុស្ស៨នាក់ទៀត ។ ការស្លាប់មនុស្ស១៥នាក់នេះធ្វើឱ្យចំនួនអ្នកស្លាប់ក្នុងអំឡុងពេលនៃការធ្វើបាតុកម្មនៅប្រទេសស៊ីរី កើនឡើងដល់២១នាក់ ចាប់តាំងពីការបះបោរក្នុងក្រុង Daraa តាំងពីថ្ងៃទី១៨ មីនា មក ៕
ចែករំលែកព័តមាននេះ