រាជធានីភ្នំពេញ ៖ សេចក្តីរាយការណ៍បឋមម៉ូតូកង់៣ មួយគ្រឿងត្រូវរថភ្លើងបុកជាប់អូសជាច្រើនម៉ែត្រ ខណៈពេលដែលបើកឆ្លងផ្លូវដែកមិនបានប្រុងប្រយ័ត្នមើលមុខក្រោយ ។ ទោះបីជាយ៉ាងណាពុំបណ្តាលអោយមនុស្សរងរបួសឡើយ ដោយអ្នកបើកបរបានលោតចេញគេចផុតពីគ្រោះថ្នាក់ ដែល ហេតុការណ៍គ្រោះថ្នាក់នេះ បានកើតឡើងកាលពីវេលាម៉ោងប្រមាណ១០និង៣០នាទីព្រឹកថ្ងៃទី១៤ ខែកក្កដានេះ ស្ថិតនៅចំណុចផ្លូវដែក ក្នុងភូមិដីថ្មី សង្កាត់គោកឃ្លាង ខណ្ឌសែនសុខ ។
សេចក្តីរាយការណ៍បានបន្តថា ម៉ូតូកង់បីឥណ្ឌាដែលត្រូវរថភ្លើងបុកនោះពណ៌លឿង ពាក់ស្លាកលេខ ភ្នំពេញ 1GS-3933 បើកបរដោយបុរសម្នាក់បានគេចខ្លួនបាត់ ។
តាមសាក្សីបានអោយដឹងថា នៅមុនពេលកើតហេតុគេឃើញម៉ូតូកង់៣បានធ្វើដំណើរតាមផ្លូវលំ និងឆ្លងផ្លូវរថភ្លើងក្នុងទិសដៅពីជើងទៅត្បូង ។ ខណៈពេលដែលធ្វើដំណើរមកដល់លើផ្លូវដែកស្រាប់តែរថភ្លើងដឹកអ្នកដំណើរធ្វើដំណើរមកពីទិសខាងកើតទៅលិចមកបុកពេញទំហឹងតែ ។
តាមព័ត៌មានបានអោយដឹងទៀតថា នៅក្នុងគ្រោះថ្នាក់នោះរថភ្លើងបុកចំកណ្តាលម៉ូតូកង់៣កៀបជាប់ ហើយអូសជាច្រើនម៉ែត្រ ។
មុនពេលបុកអ្នកបើកបរដឹងខ្លួនក៏បានស្ទុះគេចខ្លួនយកតែរួចខ្លួន ។ ចំណែករថភ្លើងពុំបានរងការខូចខាតឡើយ ។ ម៉ូតូកង់៣ត្រូវបាននគរបាលខណ្ឌសែនសុខនាំយកទៅទុកអធិការដ្ឋាន ដើម្បីអោយម្ចាស់ចូលខ្លួនដោះស្រាយ ៕ កែសម្រួលដោយ ៖ សុឃាក់
ចែករំលែកព័តមាននេះ