រាជធានីភ្នំពេញ ៖ បន្ទាប់ពីមានគេហទំព័រដែលបុគ្គលមួយចំនួនតូចបានបង្ហោះនិងចុះផ្សាយលាបពណ៌នូវព័ត៌មានមិនពិតមួយ ជុំវិញករណីជ្រេីសរេីសទ័ពដោយខុសច្បាប់កាលពីថ្មីៗនេះរួចមក លោកលោក ម៉ែន ច័ន្ទរិទ្ធី ដែលជាមន្ត្រីរាជការម្នាក់បានធ្វេីសន្និសីទកាសែតមួយ កាលពីព្រឹកថ្ងៃទី១២ កក្កដា នេះ ដោយបានស្រាយបំភ្លឺបញ្ហា៣ចំណុចសំខាន់ៗ ដែលជាហេតុធ្វើឲ្យមានការប៉ះពាល់ដល់កិត្តិយស និងសេចក្តីថ្លៃថ្លូរយ៉ាងធ្ងន់ធ្ងរ មកលើរូបលោក ពិសេសក្រសួងការពារជាតិ ។
លោក ម៉ែន ច័ន្ទរិទ្ធី បានបញ្ជាក់ថា ចំណុចទីមួយថា សូមឱនកាយគោរពដល់ថ្នាក់ដឹកនាំប្រមុខរាជរដ្ឋាភិ បាល ជាពិសេសសម្តេចពិជ័យសេនា ទៀ បាញ់ ឧបនាយករដ្ឋមន្ត្រីនិងជារដ្ឋមន្ត្រក្រសួងការពារជាតិ ជុំវិញការលាបពណ៌ និងចុះផ្សាយព័ត៌មានមិនពិត ពាក់ព័ន្ធការងារកងទ័ព ដែលធ្វេីឱ្យប៉ះពាល់ដល់រូបលោកពិសេសថ្នាក់ដឹកនាំក្រសួងការពារជាតិ ដែលមិនបានដឹងរឿងអីបន្តិចសោះនោះ ។
លោកម៉ែន ច័ន្ទរិទ្ធី បានបន្តថា កាលពីម្សិលមិញ លោកបានទទួលព័ត៌មានថា មានជនខិលខូចបានផ្សាយលាបពណ៌ជុំវិញការរេីសទ័ព តាមបណ្តាញសង្គមហ្វេសប៊ុក និងគេហទំព័រមួយចំនួនតូច ដោយយកឈ្មោះលោកទៅប្រើ និងមានការភ័នច្រឡំថា រូបលោកជាកូនឧកញ៉ា មែន សារុន ទៀតផង ពេលនេះលោកបានបដិសេធ និងច្រាលចោលទាំងស្រុង ចំពោះព័ត៌មានមិនពិតនោះ ។ លោកមិនទទួលយកការលាបពណ៌ ដែលធ្វេីឱ្យខូចកិត្តិយសដល់រូបលោកផ្ទាល់ និងថ្នាក់ដឹកនាំក្រសួងការពារជាតិនោះឡើយ ។ ហើយករណីនោះបើសិនរូបលោក បានប្រព្រឹត្តពិប្រាកដមែន លោកសូមទទួលខុសត្រូវទាំងស្រុងចំពោះមុខច្បាប់ ។
ចំពោះចំណុចទី២ លោក ម៉ែន ច័ន្ទរិទ្ធី បានបញ្ជាក់ថា ជុំវិញការសរសេរថា រូបលោកជាកូនរបស់លោកឧកញ៉ាម៉ែន សារុន នោះលោកសូមបដិសេធទាំងស្រុង គឺលោកមិនមានជាប់សាច់សារលោហិតជាមួយលោកឧកញ៉ា ម៉ែន សារុននោះទេ គ្រាន់តែមានត្រកូលដូចប៉ុណ្ណោះ ដែលអ្នកសរសេរមួយចំនួនគិតខ្លួនឯង ខុសពីការពិត ។ លោកក៏សូមខន្តីអភ័យទោសដល់ក្រុមគ្រួសារលោកឧកញ៉ា ម៉ែន សារុន ប្រសិនមិនពេញចិត្តឬប្រតិកម្មលេីរឿងនេះ សូមទំនាក់ទំនងទៅអ្នកសរសេរផ្ទាល់ដេីម្បីសួរពីការពិត លោកមិនទទួលខុសត្រូវឡេីយ ។
លោកម៉ែន ច័ន្ទរិទ្ធី បានបញ្ជាក់នៅចំណុចទី៣ថា ចាប់ពីថ្ងៃនេះទៅ ប្រសិនមានបុគ្គលណា ឬសារព័ត៌មានណាចុះផ្សាយខុសពីការពិត អំពីករណីខាងលេីនេះ លោកនឹងចាត់វិធានការតាមផ្លូវច្បាប់លើបុគ្គលនោះ កុំឲ្យច្រឡំទៀត ៕ (សម្រួលដោយ៖ ស្រីណា)
ចែករំលែកព័តមាននេះ