រាជធានីភ្នំពេញ ៖ នៅក្នុងជំនួបរវាងមន្ត្រីជាន់ខ្ពស់នៃក្រសួងសំខាន់ៗចំនួនពីរនៅកម្ពុជា តំណាងធុរជនមកពីអាមេរិករួមទាំងក្រុមហ៊ុន Facebook ផងនោះ ហាក់បានបង្ហាញពីការចាប់អារម្មណ៍លើការវិនិយោគនៅក្នុងប្រទេសកម្ពុជា ដោយប្ដេជ្ញានឹងបន្ថែមការវិនិយោគរបស់ខ្លួនបន្ថែមទៀតនៅក្នុងឆ្នាំបន្តបន្ទាប់ ខណៈឆ្នាំ២០១៨កន្លងទៅទំហំពាណិជ្ជកម្មកម្ពុជា-អាមេរិកមានកំណើន ២៣% ធៀបនឹងឆ្នាំ២០១៧ ។
ជាមួយគ្នានោះផងដែរ គិតត្រឹមខែមេសា ឆ្នាំ២០១៩ ទំហំពាណិជ្ជកម្មសរុបនៃប្រទេសទាំងពីរ សម្រេចបានទឹកប្រាក់ ១.៦៥៦លានដុល្លារ គឺបានកើនឡើង ២៣,៧១% ធៀបនឹងរយៈពេលដូចគ្នា នៅក្នុងឆ្នាំ២០១៨ ។ របាយការណ៍ដដែលនេះ បង្ហាញផងដែរថា ក្នុងទំហំពាណិជ្ជកម្មរវាងប្រទេសទាំងពីរ ភាគច្រើនគឺជាការនាំចេញរបស់កម្ពុជា ទៅកាន់សហរដ្ឋអាមេរិក ហើយអាមេរិកនាំចូលមកវិញនូវទំហំទឹកប្រាក់តិចតួច ។
នៅក្នុងជំនួបជាមួយមន្ត្រីជាន់ខ្ពស់ក្រសួងសេដ្ឋកិច្ចនិងហិរញ្ញវត្ថុ លោក Alexander Feldman តំណាងក្រុមហ៊ុនចំនួន១៥មកពីអាមេរិក បានអោយដឹងថា ខ្លួនមកកម្ពុជាពេលនេះ គឺដើម្បីសិក្សាស្វែងយល់បន្ថែម ពីសក្ដានុពលនៅកម្ពុជា ថាតើកម្ពុជានៅមានអ្វីបន្ថែមដើម្បីអោយខ្លួនអាចវិនិយោគបាន ។
Alexander Feldman បានមានប្រសាសន៍ថា «យើងមកលើកនេះ ដើម្បីជួបជាមួយមន្ត្រីធំៗកម្ពុជា និងសិក្សាពីបញ្ហាប្រឈមទៅវិញទៅមកលើការវិនិយោគក្នុងប្រទេសកម្ពុជា ព្រោះតំណាងកក្រុមហ៊ុនដែលមកដល់កម្ពុជា នាពេលនេះសុទ្ធតែជាក្រុមហ៊ុនធំៗ និងអាចមានលទ្ធភាពបណ្ដាក់ទុនវិនិយោគបាន។
លោក វង្សី វិស្សុត រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុបានមានប្រសាសន៍ថា កម្ពុជាចង់បានការវិនិយោគច្រើនថែមទៀតពីអាមេរិក ដើម្បីជួយធ្វើ ពិពិធកម្មបង្កើតការងារ និងបង្កើនតម្លៃបន្ថែមក្នុងសេដ្ឋកិច្ចកម្ពុជា ។
លោកបានបញ្ជាក់ជូនធុរជនអាមេរិកថា «ក្នុងពេលសេដ្ឋកិច្ចប្រទេសកម្ពុជា កំពុងមានការរីកចម្រើនបែបនេះ ក្នុងកំណើនប្រមាណ៧ភាគរយក្នុងមួយឆ្នាំ កម្ពុជាចង់បានការវិនិយោគបន្ថែមកាន់តែច្រើនពីអាមេរិក ដើម្បីធ្វើពិពិធកម្ម, បង្កើតការងារ និងបង្កើនតម្លៃបន្ថែមនៅក្នុងសេដ្ឋកិច្ចកម្ពុជា ក៏ដូចជាដើម្បីតភ្ជាប់កម្ពុជាទៅកាន់ខ្សែសង្វាក់ផលិតកម្មនៅតំបន់ និងពិភពលោក ជាពិសេសការផ្ទេរនូវចំណេះដឹង, បច្ចេកវិទ្យា, នានុវត្តន៍ និងសហគ្រិនភាពជាដើម » ។
បន្ទាប់ពីជួបជាមួយមន្ត្រីជាន់ខ្ពស់នៃក្រសួងសេដ្ឋកិច្ចហើយនោះ ធុរជនអាមេរិកមួយក្រុមហ៊ុននេះ ក៏បានជួបជាមួយរដ្ឋមន្ត្រីក្រសួងពាណិជ្ជកម្មកម្ពុជាផងដែរ ។ ក្នុងជំនួបនោះដែរ លោក Alexander Feldman បានបង្ហាញពីសុទិដ្ឋិនិយមចំពោះទីផ្សារកម្ពុជា និងមានបំណងបណ្តាក់ទុនបន្ថែម ដើម្បីជំរុញកំណើនសេដ្ឋកិច្ច និងពាណិជ្ជកម្មនៃប្រទេសទាំងពីរ ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានមានប្រសាសន៍ថារាជរដ្ឋាភិបាលកម្ពុជា បានដាក់ចេញនូវយុទ្ធសាស្ត្រ និងកម្មវិធីកំណែទម្រង់នានា ដើម្បីលើកកម្ពស់ឧត្តមភាពប្រកួតប្រជែងរបស់កម្ពុជា និងការពារអត្ថប្រយោជន៍ជូនវិស័យឯកជន ដែលជាក្បាលម៉ាស៊ីនដ៏សំខាន់នៃកំណើនសេដ្ឋកិច្ចជាតិ ។
រដ្ឋមន្ត្រីក្រសួងពាណិជ្ជកម្មបានបញ្ជាក់ថា «ក្នុងនាមជាអ្នកសម្របសម្រួល ក្រសួងពាណិជ្ជកម្ម ប្តេជ្ញាចិត្ត ក្នុងការបន្តលើកស្ទួយបរិយាកាសធុរកិច្ច និងវិនិយោគ ព្រមទាំងកិច្ចសម្រួលពាណិជ្ជកម្ម ដើម្បីទាក់ទាញការវិនិយោគបន្ថែមពីបរទេស » ។
យោងតាមរបាយការណ៍របស់ក្រសួងពាណិជ្ជកម្ម បានអោយដឹងថា ទំហំពាណិជ្ជកម្មរវាងកម្ពុជា និងអាមេរិកកាលពីឆ្នាំ២០១៨ កន្លងទៅ សម្រេចបានប្រមាណ ៤.២៦៤លានដុល្លារ គឺបានកើនឡើងប្រមាណ ២៣% ធៀបនឹងឆ្នាំ២០១៧ ៕ (កែសម្រួលដោយ ៖ បុប្ផា)
ចែករំលែកព័តមាននេះ