ការចាប់ផ្តើមអាជីវកម្មគឺស្រដៀងគ្នាទៅនឹងការចាប់ផ្តើមទំនាក់ទំនងជាមួយនរណាម្នាក់ដែរ។ ពេលដែលល្អបំផុតក្នុងការចាប់ផ្តើមអាជីវកម្មគឺជាពេលដែលអ្នកមានពេលវេលាក្នុងការវិនិយោគស្មារតីរបស់អ្នកលើវា។
ប្រាកដណាស់ មនុស្សម្នាក់ៗមានកម្រិតថាមពល និងសមត្ថភាពខុសៗគ្នា។ មនុស្សមួយចំនួនអាចធ្វើជាម្ចាស់អាជីវកម្មច្រើនជាងមួយក្នុងពេលតែមួយ ខណៈដែលអ្នកឯទៀតធ្វើការបណ្តើរធ្វើជាម្ចាស់អាជីវកម្មខ្លួនឯងបណ្តើរ។ ប៉ុន្តែវាមិនប្រាកដថាអ្នកអាចធ្វើបានដែរទេ។
ដូច្នេះតើពេលណាជាពេលល្អសម្រាប់ការចាប់ផ្តើមអាជីវកម្មមួយ? ដើម្បីឆ្លើយនឹងសំណួរនេះ អ្នកគួរតែពិនិត្យមើលចំណុចខាងក្រោម ៖
១. អត្តចរិតរបស់អ្នក ៖ ការធ្វើជាម្ចាស់អាជីវកម្មមួយរូបទាមទារឲ្យមនុស្សមានអត្តចរិតមួយចំនួនដែលអាចជះឥទ្ធិពលដល់ភាពជោគជ័យរបស់អាជីវកម្ម។ ក្រៅពីចំណេះដឹងទាក់ទិននឹងអាជីវកម្មដែលអ្នកចង់ចាប់ផ្តើមហើយ អ្នកត្រូវតែចេះជំរុញដល់ទឹកចិត្តខ្លួនឯង និងមានជំនាញក្នុងការគ្រប់គ្រងច្បាស់លាស់ និងជំនាញផ្នែកទីផ្សារផងដែរ។ លើសពីនេះទៅទៀត ម្ចាស់អាជីវកម្មដែលជោគជ័យភាគច្រើនមានសមត្ថភាពក្នុងការដោះស្រាយរាល់បញ្ហាដែលមានជាមួយនឹងអតិថិជន និងអ្នកលក់ផងដែរ។ តើអ្នកគិតថា ខ្លួនមានអត្តចរិត និងជំនាញទាំងនេះឬទេ?
២. ស្ថានការហិរញ្ញវត្ថុ ៖ ស្ថានការហិរញ្ញវត្ថុរបស់អ្នកគឺជាកត្តាដ៏សំខាន់ដែលអ្នកគួរតែពិចារណាលើពេលដែលអ្នកចង់ចាប់ផ្តើមអាជីវកម្ម។ តើអ្នកអាចទទួលយកហានិភ័យកម្រិតណា? តើអ្នកមានការងារច្បាស់លាស់ឬទេ? តើអ្នកមានសមត្ថភាពកម្រិតណាក្នុងការចំណាយលើរាល់សម្ភារៈដែលចាំបាច់សម្រាប់អាជីវកម្មរបស់អ្នក? តើអ្នកមានប្រាក់សន្សំគ្រប់គ្រាន់ ឬមានក្រុមគ្រួសារជួយទេ? តើអ្នកមានសមត្ថភាពក្នុងការខ្ចីធនធានពីធនាគារ ឬស្ថាប័នហិរញ្ញវត្ថុផ្សេងៗឬទេ? ទាំងនេះសុទ្ធតែជាសំណួរទាក់ទិននឹងលុយដែលអ្នកត្រូវតែឆ្លើយមុននឹងដឹងថា អ្នកត្រៀមខ្លួនឬនៅក្នុងការក្លាយជាម្ចាស់អាជីវកម្មម្នាក់។
៣. ឥទ្ធិពលលើគ្រួសារ ៖ ប្រសិនបើអ្នកបានចាប់ផ្តើមគ្រួសារមួយហើយ អ្នកត្រូវដឹងថា ការធ្វើជាម្ចាស់អាជីវកម្មគឺជាកិច្ចការគ្រួសារមួយដែរ។ ការចាប់ផ្តើមអាជីវកម្មតម្រូវឲ្យអ្នកចំណាយ និងវិនិយោគពេលវេលារបស់អ្នកលើអ្វីដែលអ្នកបានចាប់ផ្តើម ហើយភាគច្រើនវាកាត់បន្ថយពេលវេលាដែលអ្នកមានសម្រាប់ក្រុមគ្រួសាររបស់អ្នក។
ពេលវេលាដែលបាត់បង់ ផ្គួបផ្សំជាមួយនឹងសម្ពាធ និងភាពមិនប្រាកដប្រជាផ្សេងៗទាក់ទិននឹងអាជីវកម្មរបស់អ្នកអាចបង្កផលប៉ះពាល់ដល់ទំនាក់ទំនងក្នុងគ្រួសារ។ យ៉ាងណាក្តី ប្រសិនបើអ្នកចេះចាត់ចែងបានល្អនោះ អ្នកអាចនឹងជួយពង្រឹងទំនាក់ទំនងក្នុងគ្រួសារទៅទៀតដោយឆ្លងកាត់ឧបសគ្គជាមួយគ្នា ឬឲ្យក្រុមគ្រួសារជួយគ្រប់គ្រងអាជីវកម្មរួមគ្នាជាដើម។
គ្រួសារនីមួយៗមានស្ថានការខុសៗគ្នា តែអ្នកគិតថាគ្រួសាររបស់អ្នកកំពុងស្ថិតក្នុងស្ថានការមួយរឹងមាំដែលអនុញ្ញាតឲ្យអ្នកចាប់ផ្តើមអាជីវកម្មដោយខ្លួនឯងឬទេ? (កែសម្រួលដោយ ៖ បុប្ផា)
ចែករំលែកព័តមាននេះ