ខេត្តក្រចេះ ៖ អនុវត្ដទៅតាមមាត្រានៃច្បាប់ស្ដីពីព្រៃឈើ និងដើម្បីជំរុញឱ្យប្រជាពលរដ្ឋមានចិត្ដស្រលាញ់ ថែរក្សាការពារព្រៃឈើទាំងអស់គ្នា អាជ្ញាធរខេត្ត រៀបចំដោយខណ្ឌ និងផ្នែករដ្ឋបាលព្រៃឈើក្រចេះ ដោយមានការចូលរួមសហការពីសំណាក់អាជ្ញាធរមូលដ្ឋាន បង្កើតជាសួនអាពាហ៍ពិពាហ៍សម្រាប់គូស្រករកូនកំលោះកូនក្រមុំដាំកូនឈើព្រៃទុកជាអនុស្សារីយ៍ក្នុងថ្ងៃរៀបការ។
ការបង្កើតសួនអាពាហ៍ពិពាហ៍សម្រាប់គូស្រករកូនកំលោះកូនក្រមុំដាំកូនឈើព្រៃគ្រប់ប្រភេទទុកជាអនុស្សារីយ៍ក្នុងថ្ងៃរៀបការនេះ ត្រូវបានគេចាត់ទុកថា ជាលើកទីមួយហើយសម្រាប់មន្ដ្រីរដ្ឋបាលព្រៃឈើខេត្ដក្រចេះ ដែលទង្វើនេះធ្វើឱ្យមហាជនមានការគាំទ្រយ៉ាងពេញទំហឹងថា បានជំរុញឱ្យប្រជាពលរដ្ឋ ជាពិសេសកូនកំលោះកូមក្រមុំចូលរួមដាំកូនឈើព្រៃជាសក្ខីភាពនៃការចូលរួមថែរក្សាព្រៃឈើ និងទុកជាអនុស្សារីយ៍សម្រាប់កូនៗរបស់ពួកគេឱ្យចូលរួមថែរក្សាទាំងអស់គ្នា។
ជាងនេះទៅទៀត អ្វីដែលគួរឱ្យភ្ញាក់ផ្អើលទៀតនោះ កាលពីរសៀលថ្ងៃទី៧ មេសា មានកូនកំលោះកូនក្រមុំមួយគូដែលបានរៀបអាពាហ៍ពិពាហ៍នៅស្រុកចិត្របុរី ខេត្ដក្រចេះ បានសម្រេចនាំគ្នាទៅដាំកូនឈើទាលពីរដើមដែលបានពីលោកព្រាប សុធារ៉ា នាយផ្នែករដ្ឋបាលព្រៃឈើក្រចេះ។
នៅក្នុងពិធីដាំកូនឈើព្រៃពីសំណាក់កូនកំលោះកូនក្រមុំទាំងពីរក្នុងថ្ងៃរៀបអាពាហ៍ពិពាហ៍នៅល្ងាចនោះ ក៏មានការអញ្ជើញចូលរួមលើកទឹកចិត្ដពីសំណាក់លោកសួន ញ៉ាក អភិបាលស្រុកចិត្របុរី លោកនាយខណ្ឌរដ្ឋបាលព្រៃឈើ លោកព្រាប សុធារ៉ា នាយផ្នែករដ្ឋបាលព្រៃឈើក្រចេះ រួមទាំងមន្ដ្រីរដ្ឋបាលព្រៃឈើក្រោមឱវាទ លោកមេឃុំ និងមេភូមិជាច្រើនរូបទៀត។
លោកព្រាប សុធារ៉ា នាយផ្នែករដ្ឋបាលព្រៃឈើក្រចេះបានថ្លែងថា តបទៅតាមមាត្រា៦០នៃច្បាប់ស្ដីពីព្រៃឈើដែលបានចែងថា ប្រជាពលរដ្ឋទាំងពីរភេទដែលជាគូស្រករថ្មី ត្រូវបានលើកទឹកចិត្ដដាំដើមឈើពីរដើមក្រោមកិច្ចសម្របសម្រួលនិងផ្ដល់កូនឈើដោយមន្ដ្រីរដ្ឋបាលព្រៃឈើមានសមត្ថកិច្ច និងអនុវត្ដទៅតាមអនុសាសន៍លោករដ្ឋមន្ដ្រីក្រសួងកសិកម្ម និងលោកប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលព្រៃឈើ ខណ្ឌនិងផ្នែករដ្ឋបាលព្រៃឈើក្រចេះបានបង្កើតជាសួនអនុស្សារីយ៍ក្នុងបរិវេណសួនអាពាហ៍ពិពាហ៍លើផ្ទៃដី៦ហិកតា ដែលមានទីតាំងនៅក្នុងបរិវេណដីសម្បទានសង្គមកិច្ច ស្ថិតក្នុងឃុំសំបុក ស្រុកចិត្របុរី ជាប់នឹងផ្លូវជាតិលេខ៧ (អាស៊ាន)។
លោកនាយផ្នែកបានថ្លែងបន្ដថា ការបង្កើតជាសួនអាពាហ៍ពិពាហ៍សម្រាប់ឱ្យកូនកំលោះកូនក្រមុំចូលរួមដាំកូនឈើទុកជាអនុស្សារីយ៍នេះ គឺដើម្បីជំរុញឱ្យប្រជាពលរដ្ឋទាំងពីរភេទចូលរួមស្រលាញ់ និងថែរក្សានូវដើមឈើព្រៃទាំងអស់គ្នា និងសម្រាប់បង្ហាញជូនកូនចៅឱ្យបានឃើញពីការចូលរួមលើវិស័យអភិរក្ស ថែរក្សាព្រៃឈើរបស់ឪពុកម្ដាយពួកគេ។ លោកនាយផ្នែកបានបញ្ជាក់ថា ផ្នែករដ្ឋបាលព្រៃឈើបានបង្កើតជាថ្នាលបណ្ដុះកូនឈើព្រៃគ្រប់ប្រភេទមានចំនួនរាប់ម៉ឺនកូនទុកសម្រាប់តម្រូវការរបស់កូនកំលោះកូនក្រមុំផ្សេងទៀត ដែលចង់ចូលរួមដាំកូនឈើព្រៃនៅក្នុងសួនអាពាហ៍ពិពាហ៍នេះ៕
ចែករំលែកព័តមាននេះ